U Osła adkryli 13-paviarchovy muziej mastaka Edvarda Munka. Adnu jaho karcinu vy viedajecie dakładna
Na nabiarežnaj Osła 22 kastryčnika adkryŭsia novy muziej, pryśviečany narviežskamu mastaku Edvardu Munku, piša Reuters. Prajekt 13-paviarchovaha budynka vyšynioj 57 mietraŭ raspracavała ispanskaje architekturnaje biuro Estudio Herreros.
U novym pamiaškańni 11 vystavačnych załaŭ. Jano ŭ piać razoŭ bolšaje za raniejšy muziej Munka, jaki pracavaŭ u Osła z 1963 hoda. U novaj ustanovie budzie zachoŭvacca samaja vialikaja ŭ śviecie kalekcyja rabot mastaka, u tym liku try viersii jaho znakamitaj karciny «Kryk». Akramia tvoraŭ Munka tut buduć pakazvać pałotny aŭtaraŭ, na jakich paŭpłyvała jaho tvorčaść.
Vierchniaja častka budynka nachilenaja ŭ bok histaryčnaha centra Osła, što, pavodle zadumy stvaralnikaŭ, simvalizuje pryvitańnie. Zbudavańnie ŭzvyšajecca nad opiernym teatram, biblijatekaj i žyłymi damami — usio heta było pabudavana ŭ apošnija hady ŭ ramkach prajekta rekanstrukcyi horada.
Viestybiul muzieja padzieleny na dźvie častki: adna adviedziena pad handlovyja płoščy, druhaja pryznačana dla adpačynku naviedvalnikaŭ i praviadzieńnia mierapryjemstvaŭ. Tut buduć prachodzić kancerty, lekcyi i majstar-kłasy. Na vierchnim paviersie raźmieščany restaran i naziralnaja placoŭka ź vidam na horad.
U 2018-m Muziej Munka vykłaŭ u adkryty dostup anłajn-archiŭ hrafiki mastaka. Kalekcyja naličvaje kala 7,6 tysiačy rabot i ŭklučaje ŭ siabie dziciačyja malunki, knižnyja ilustracyi, karykatury i nakidy, vykananyja Munkam u roznyja hady.
Kamientary