Viarchoŭny sud pakinuŭ u sile paśmiarotny prysud zabitamu ŭ Breście Hienadziu Šutavu
14 maja Viarchoŭny sud pakinuŭ u sile prysud pa spravie Alaksandra Kardziukova i Hienadzia Šutava, jakoha śmiarotna paranili siłaviki ŭ Breście, kali tam prachodzili akcyi pratestu. Fihuranty pryznanyja vinavatymi ŭ supracivie (Šutaŭ — paśmiarotna), Kardziukoŭ da taho ž u zamachu na zabojstva siłavika, jon atrymaŭ 10 hod kałonii. Paciarpiełymi prachodzili vajennasłužačyja sił śpiecyjalnych apieracyj.
Alaksandr Kardziukoŭ ź viersijaj śledstva niazhodny. U sudzie jon raspavioŭ, što 11 žniŭnia Hienadź pryjšoŭ da jaho ŭ haraž. Jany vypili kala 350 hramaŭ nastojki na dvaich i pajšli ŭ bok DK prafsajuzaŭ, kab pahladzieć, što tam adbyvajecca. Kali padyšli da skryžavańnia vulicy Maskoŭskaj i Partyzanskaha praśpiekta, zaŭvažyli vialikuju kolkaść ludziej. Hienadź i Alaksandr pajšli na parapiet da doma № 334. U abvinavačanaha ŭ ruce byŭ abrezak mietaličnaj truby, jaki jon padabraŭ kala parku «dla samaabarony». Za pratestam jany hladzieli zdalok. Prykładna praz 40 chvilin siabry zaŭvažyli dvuch chłopcaŭ (jak vyśvietliłasia paźniej, heta i byli vajskoŭcy z Marjinaj Horki) i padyšli da ich. Pa słovach Alaksandra, jon chacieŭ u ich pacikavicca tym, što adbyvajecca.
Abvinavačany padkreśliŭ, što nie viedaŭ, što pierad im siłaviki, tyja byli ŭ cyvilnym, pistalety trymali ŭ sumkach, tamu kali źbiahaŭ, dumaŭ, što za im biažyć bandyt. Momant ranieńnia Šutava Kardziukoŭ nie bačyŭ. U sudzie jon kazaŭ, što «adčuvaŭ vielizarny hruz viny z-za jaho śmierci».
Brescki abłasny sud pryznaŭ vinavatymi Šutava (paśmiarotna) i Kardziukova, apošniamu pryznačyli pakarańnie ŭ vyhladzie 10 hadoŭ kałonii. Dačka Hienadzia Šutava padała skarhu ŭ Viarchoŭny sud. Na jaje dumku, vajskoŭcy złoŭžyli słužbovymi paŭnamoctvami, pavodzili siabie nieapraŭdana ahresiŭna i niepravamierna ŭžyli zbroju. Videazapis z kamiery nazirańnia dvara, u jakim adbyŭsia kanflikt, nie paćviardžaje napadu Kardziukova i Šutava na vajennasłužačych i baraćby ź imi, adznačana ŭ skarzie. Abarona Kardziukova taksama padała skarhu na prysud. Adnak Viarchoŭny sud pakinuŭ prysud bieź źmien. U chutkim časie Kardziukova nakirujuć u kałoniju ŭzmocnienaha režymu.
U Łukašenki znajšłasia pazašlubnaja dačka Kryścina? Voś što viadoma21
Kamientary