Film Ściapana Puciły trapiŭ u trendy jutuba. Jak ałharytm abiraje top i ci časta tam palityčnyja roliki?
Novy film Ściapana Puciły za dzień nabraŭ 1,6 miljona prahladaŭ i trymajecca na pieršaj pazicyi ŭ trendach biełaruskaha YouTube. Ci časta ŭ top vybivajecca nacyjanalny kantent i jak ałharytm abiraje trendy? Tłumačym.
Jość peŭnyja kryteryi, zhodna ź jakimi videa traplajuć u trendy. Heta musić być aryhinalny kantent, cikavy šyrokamu kołu hledačoŭ, niezvyčajny ci niečakany. Abrazy i sceny hvałtu nie dapuskajucca. Maje značeńnie toje, jakija suadnosiny łajkaŭ-dyzłajkaŭ, ci dobra kamientujecca.
«Upłyvaje, nakolki chutka videa nabiraje abaroty. Naprykład, razmova sa Šrajbmanam na kanale Mikity Miełkaziorava «Žyćcio-malina» sabrała bolš za 520 tysiač prahladaŭ, ale jana nie była ŭ trendach. Sam kanał, darečy, taksama, bo jon jašče nie zaŭvažany jutubam.
Važny momant — nakolki videa repościcca ŭ inšyja sacyjalnyja sietki. Naprykład, jutub lubić, kali videa šerycca ŭ fejsbuk. Što jašče zaŭvažana: kali kanał adnojčy trapiŭ u trendy, to pieryjadyčna budzie zachodzić tudy znoŭ i znoŭ, jak my bačym z «Biełsatam».
Ale heta składanaja rabatyzavanaja sistema, i navat supracoŭniki jutuba nie mohuć dakładna skazać, jak jana pracuje, bo heta trymajecca ŭ tajamnicy», — dzielicca žurnalist Vital Zybluk, jaki zajmajecca pradziusavańniem jutub-kanałaŭ.
Kali videa staić na płatnaj pramocyi, heta nijak nie harantuje traplańnie ŭ top, bo dla trendaŭ uličvajucca tolki naturalnyja prahlady.
Što zvyčajna hladziać biełarusy? Biezumoŭna, upłyvaje rasijskaje infapole, tamu intervju Juryja Dudzia, klipy pop-artystaŭ, čelendžy Ułada Bumahi zaŭsiody traplajuć u biełaruskija trendy.
Ale z červienia minułaha hoda ŭvaha da svajho kantentu, asabliva palityčnaha, uzrasła. Tamu ŭ topie časta trymajucca «Biełsat», «Svaboda Premium», błohier Marat Minski. Prabivajucca i kanały z adnosna nievialikaj kolkaściu padpisantaŭ — naprykład spartovy prajekt «ČiestnOk», Marharyta Laŭčuk z humarystyčnymi prypieŭkami. Raniej u trendach byli taksama strymy Siarhieja Cichanoŭskaha.
«Kali adbyvajucca ŭspleski palityčnaj aktyŭnaści, to palityčny kantent vyciaśniaje zabaŭlalny», — kaža surazmoŭca.
Za apošni hod, darečy, staviłasia niekalki rekordaŭ pa prahladzie biełaruskich strymaŭ.
«Adzin ź pieršych byŭ, kali Siarhiej Cichanoŭski vyjšaŭ z sutak i zrabiŭ strym — tam było 30 tysiač hledačoŭ adnačasova. U pikavyja momanty na «Radyjo Svaboda» źbirałasia kala 50 tysiač», — zhadvaje Vital Zybluk.
Film Ściapana Puciły adnačasova hladzieła 100 tysiač karystalnikaŭ.
«Biełaruski jutub kirujecca z maskoŭskaha ofisa. U rasijskich libieralnych kołach isnuje pierakanańnie, što jutub rehulujecca nie tolki ałharytmami, ale i ŭručnuju. Nakolki heta spraviadliva, ciažka skazać. Ale voś jakija maje nazirańni.
Kanał Siarhieja Cichanoŭskaha trymaŭsia ŭvieś čas u trendach, pakul Cichanoŭski byŭ na voli. Kali Śviatłana stała kandydatkaj i pačała burnuju dziejnaść, usio, što źviazana ź jaje imiem, stała traplać u trendy vielmi redka. Ja byŭ ździŭleny, što intervju z Hardonam prasačyłasia. Mahčyma, kali b biełaruski jutub kuryravaŭsia z Kijeva, my pabačyli b inšyja trendy. Ale heta tolki teoryja, jakaja nie maje paćviardžeńnia», — zaŭvažyŭ Zybluk.
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Kamientary