Homielskija pravaabaroncy paskardzilisia ŭ AAN na parušeńnie ich prava na mirny schod — i vyjhrali spravu
Kamitet AAN pa pravach čałavieka (Šviejcaryja) apublikavaŭ rašeńnie №2330/2014, pryniataje pa skarzie eks-staršyni Homielskaha harvykankama Śviatłany Haldade. Ad biełaruskaha ŭrada z AANaŭskaj trybuny čarhovy raz zapatrabavali źmianić nacyjanalny zakon i padychody da praviadzieńnia masavych mierapryjemstvaŭ (mirnyja schody hramadzian), piša gomelspring.org.
U 2012 hodzie eks-mer Homiela Śviatłana Haldade razam z pravaabaroncami Leanidam Sudalenkam i Anatolem Papłaŭnym pratestavali suprać kryminalnaha pieraśledu pravaabaroncy Alesia Bialackaha, jakoha ŭ 2011 hodzie kinuli na 4,5 hoda ŭ turmu.
Jany padali kalektyŭnuju zajavu ŭ harvykankam ab praviadzieńni ŭ hadavinu aryštu Bialackaha pikietu. Pratestnaja akcyja płanavałasia ŭ centry horada kala ŭniviermaha «Homiel». Čynoŭniki mierapryjemstva zabaranili, spasłaŭšysia na patrabavańnie da pačatku mierapryjemstva zaklučyć damovy ź milicyjaj, stancyjaj chutkaj dapamohi i kamunalnikami.
Usie sudy, u tym liku Viarchoŭny, stali na bok haradskich čynoŭnikaŭ.
U skarzie ŭ Kamitet AAN pa pravach čałavieka hamielčuki pastavili nie tolki pytańni ab parušeńni pravoŭ na mirny schod i svabodnaje vykazvańnie mierkavańniaŭ, ale prasili abaviazać aficyjny Minsk źmianić nacyjanalny zakon «Ab masavych mierapryjemstvach».
Mižnarodnyja ekśpierty pryjšli da adnahałosnaj vysnovy, što pradstaŭlenyja hrupaj hamielčukoŭ fakty śviedčać ab parušeńni Respublikaj Biełaruś pravoŭ aŭtaraŭ na mirny schod i svabodnaje vykazvańnie ich mierkavańniaŭ (artykuły 19 i 21 Mižnarodnaha Pakta ab hramadzianskich i palityčnych pravach). U suviazi z aficyjnaj admovaj Minska ad supracoŭnictva pa skarzie, Kamitet pa pravach čałavieka kanstatavaŭ i parušeńnie artykuła 2 Pakta, jaki abaviazvaje ŭsie krainy dobrasumlenna vykonvać uziatyja na siabie mižnarodnyja abaviazacielstvy.
Pryniataje ŭ Šviejcaryi rašeńnie źjaŭlajecca kančatkovym, abskardžańniu nie padlahaje. Na praciahu paŭhoda (180 dzion) biełaruski ŭrad abaviazany:
— dać aŭtaram skarhi efiektyŭny srodak pravavoj abarony. Heta patrabuje, u pryvatnaści, dać adekvatnuju kampiensacyju paciarpiełym;
— raspačać kroki, nieabchodnyja dla praduchileńnia padobnych parušeńniaŭ u budučyni šlacham pierahladu svajho nacyjanalnaha zakanadaŭstva i praktyki jaho prymianieńnia;
— na praciahu 180 dzion paviedamić u Kamitet AAN pa pravach čałavieka ab vykanańni pryniataha rašeńnia i apublikavać jaho ŭ srodkach masavaj infarmacyi na dziaržaŭnych movach.
Kamientary