Biznesmien Knyrovič u sudzie pryznaŭ vinu častkova
Kiraŭnik hrupy kampanij «Sarmat» Alaksandr Knyrovič, jakoha ŭčora pačali sudzić za niavypłatu padatkaŭ i chabarnictva, nie pryznaŭ častku viny i zachacieŭ davać pakazańni paśla apytańnia śviedak, piša Radyjo Svaboda.
19 krasavika ŭ pracesie nad dyrektaram i suzasnavalnikam kampanii «SarmatTerma-Inžynirynh» i čatyrma adkaznymi supracoŭnikami hetaj kampanii prakuror zakončyła abviaščeńnie abvinavačańnia, pačataje 18 krasavika.
Na pytańnie sudździ, ci pryznaje Alaksandar Knyrovič siabie vinavatym, jon adkazaŭ, što «pryznaje častkova». Heta tyčycca abodvuch abvinavačańniaŭ — u niavypłacie padatkaŭ i chabarnictvie.
Pavodle abvinavačańnia ŭ niavypłacie padatkaŭ Knyrovič skazaŭ, što «nia zhodny z metodykaj raźlikaŭ» i z tym, jak śledčyja vyznačyli peryjady zanižeńnia sumy padatkaŭ. Padsudny dapuściŭ, što mahła zakraścisia pamyłka bolš jak na 60 tysiač rubloŭ. Taksama, pavodle Alaksandra Knyroviča, u jaho nie było namieru ŭchilacca ad vypłaty padatkaŭ. Usiaho, pavodle śledztva, z 2008 hodu kampanija Knyroviča nie spłaciła padatkaŭ bolš jak na 3,3 miljona rubloŭ.
Častkova pryznaŭ vinu Alaksandar Knyrovič i pavodle abvinavačańnia ŭ chabarnictvie. Jon pahadziŭsia, što davaŭ zahady padnačalenamu supracoŭniku kampanii «SarmatTerma-Inžynirynh» Jaŭhienu Papoŭskamu ab pieradačy hrošaj peŭnym asobam, ale nazvaŭ heta «ŭznaharodžańniem». Knyrovič pryznaŭ sumu ŭ 14 tysiač rubloŭ, miž tym śledztva kaža pra try vypadki chabaru na ahulnuju sumu 16 tysiač (pieršy chabar 5 tysiač rubloŭ, druhi — 1 tysiača, treci — 10 tysiač rubloŭ i butelka kańjaku).
Padsudnyja Ŭładzimier Daškievič, Andrej Kuskoŭ i Ihar Maksimaŭ pryznali vinu całkam, Jaŭhien Papoŭski pryznaŭ vinu častkova.
«Nie pryznaju, što pieradavaŭ chabar pa zmovie», — udakładniŭ svaju pazycyju były namieśnik dyrektara kampanii.
Pry vyrašeńni pytańnia pra paradak sudovaha śledztva Alaksandar Knyrovič zachacieŭ davać pakazańni paśla vystupu śviedak, abvinavačanych i vyvučeńnia materyjałaŭ spravy.
Palitviazień pravioŭ paŭtara hoda ŭ SIZA — voś jak jon vyhladaŭ paśla hetaha11
Kamientary