Piać faktaŭ pra Alaksandra Kosinca, jaki kiravaŭ Administracyjaj prezidenta mienš za dva hady

Alaksandr Łukašenka vyzvaliŭ Alaksandra Kosinca ad pasady kiraŭnika Administracyi prezidenta. Taksama zvolnieny jahony pieršy namieśnik Kanstancin Martyniecki. V.a. kiraŭnika pryznačany Valeryj Mickievič.

Ź vioski Roski Sialec

Pavialičyć

Alaksandr Kosiniec naradziŭsia ŭ 1959 hodzie ŭ vioscy Roski Sialec, u 15 kiłamietrach ad Oršy. U vioscy pa-raniejšamu žyvie rodnaja ciotka Kosinca Viera Mikałajeŭna Łapo. A voś maci pierajechała ŭ horad. Baćki ŭ žyvych užo niama.

Alaksandr Kosiniec zrabiŭ vydatnuju karjeru ŭ miedycynie. Jon byŭ viadomym u krainie chirurham. Užo ŭ 37 hadoŭ staŭ prafiesaram. Mała chto ź miedykaŭ moža pachvalicca takim. Kažuć, što ŭsio heta było zasłužana. Jon aŭtar mnostva navukovych publikacyj i manahrafij. Naprykład, «Nyračna-kletačny rak» (2002), «Prateinazy i ich inhibitary ŭ hnojnaj chirurhii i ankałohii» (2003). U 1997-m staŭ rektaram Viciebskaha mieduniviersiteta.

Syn taksama miedyk

Syn Alaksandra Kosinca Uładzimir pajšoŭ darohaj taty. Jon pastupiŭ u Viciebski miedunivier, na lačebny fakultet, jaki skončyŭ u 2006 hodzie. A ŭžo ŭ 2009 abaraniŭ kandydackuju rabotu na temu «Karekcyja bijaenierhietyčnych pracesaŭ u myšačnaj tkancy tonkaj kiški pry raspaŭsiudžanym hnojnym pierytanicie».

Na hetym svaju adukacyju Uładzimir Alaksandravič Kosiniec nie zaviaršyŭ. Udaskanalvać jaje jon pajechaŭ u Rasiju, dzie ŭ 2013-m abaraniŭ doktarskuju dysiertacyju ŭ Pieršym Maskoŭskim dziaržaŭnym miedycynskim ŭniviersitecie imia Siečanava. Jamu ŭsiaho 34 hady, ale na rachunku maładoha miedyka zvyš 80 navukovych rabot, u tym liku «adzin padručnik, try manahrafii i piać vynachodnictvaŭ».

Pracavaŭ jon taksama ŭ Maskvie, u Jeŭrapiejskim miedycynskim centry, u adździaleńni płastyčnaj chirurhii. Adnak paśla pryznačeńnia baćki ŭ Administracyju viarnuŭsia ŭ Minsk.

Pryjarytetam u pracy Uładzimira Kosinca źjaŭlajecca: pavieličeńnie hrudziej pry dapamozie impłantantaŭ, padciažka hrudziej, konturnaja płastyka cieła.

Haračy charaktar

Staršynia Viciebskaha abłvykankama zaŭsiody byŭ na piarednim płanie baraćby z pjanstvam. Dziaržaŭnyja telekanały navat demanstravali kadry, jak Kosiniec asabista abychodziŭ kvatery ałkaholikaŭ.

Nie moh viciebski načalnik zastacca ŭbaku ad zusim niadaŭniaj palityki baraćby z «darmajedami». «Nie treba ni z kim cyrymonicca, nie chočuć pracavać — značyć, treba prymusić».

Alaksandr Łukašenka niekali na pres-kanfierencyi skazaŭ, što Kosiniec vielmi haračy čałaviek. «Jak pojdzie ź Minska, moža da Viciebska dajści».

Nie tak daŭno Alaksandr Łukašenka krytykavaŭ Kosinca za kiepskuju pracu z kadrami, chacia i davaŭ zadańni na nastupny hod. Siarod imaviernych pierajemnikaŭ Kosinca nazyvajuć byłoha premjer-ministra Siarhieja Sidorskaha.

Dom u Drazdach

Kali Kosinca pieraviali ŭ Viciebsk u 2008-m, to jon, zdajecca, ni na chvilinku nie zasumniavaŭsia ŭ tym, što vierniecca nazad u Minsk. Nie admaŭlaŭsia i ad učastku ŭ Drazdach, inšych staršyni abłvykankamaŭ takoj majomaści ŭ Minsku nie majuć.

«Cikavy elemient, jaki pryjšoŭ da nas z rasijskich katałohaŭ, — vierchniaje akno na haryščy ŭ vyhladzie paŭkoła, jakoje ŭrezana ŭ inšaje paŭkoła. Heta pierasiačeńnie dźviuch niemahčymych fihur», - piša architektar Alaksandra Bajaryna, jakaja vysoka acaniła estetyku doma Kosinca.

Alhierd u Viciebsku

U Viciebsku Kosiniec raźvioŭ burnuju dziejnaść. Naprykład, na centralnaj płoščy pastaviŭ samuju vialikuju ŭ krainie navahodniuju jołku. Vidavočna, što rabiłasia heta, kab źviarnuć na Viciebsk uvahu. «Viciebskaja jołka nie sastupaje minskaj», — pisali ŭ 2009-m hodzie abłasnyja vydańni.

Praŭda, ź jalinkaj toj vyjšaŭ kazus. I ŭ historyju jana ŭvajšła tym, što na jaje bieł-čyrvona-bieły ściah uźniaŭ aktyvist KCHP-BNF Siarhiej Kavalenka, jakoha paźniej sudzili za heta.

Kosiniec patrabavaŭ adkryvać u Viciebsku dobryja kaviarni. Naturalna, što pa vyšejšamu razradu jon staraŭsia pravodzić piesienny konkurs «Słavianski bazar».

Siarod pazityŭnych rečaŭ — adkryćcio ŭ Viciebsku pomnika vialikamu kniaziu Alhierdu, choć spadary rusafiły i pisali šmatlikija listy abureńnia.

«Hety čałaviek — vialiki palityk i dziaržaŭny dziejač. Jon adyhraŭ vialikuju rolu ŭ raźvićci biełaruskaj dziaržaŭnaści, u raźvićci samaha Viciebska. Pa sutnaści spravy, kamienny Viciebsk byŭ pabudavany im. I ŭ tyja časy litvinami nazyvalisia biełarusy. Jon šmat što zrabiŭ dla razhromu ardy i vyzvaleńnia Kijeŭskaj Rusi», - pieraličyŭ zasłuhi kniazia Alaksandr Kosiniec na adkryćci pomnika.

Hladzi taksama: Alaksandr Kosiniec: jak chirurh ź Viciebska staŭ pieršaj asobaj u Administracyi prezidenta

• 0
• 0
• 0
• 0
• 0