Пяць фактаў пра Аляксандра Косінца, які кіраваў Адміністрацыяй прэзідэнта менш за два гады

Аляксандр Лукашэнка вызваліў Аляксандра Косінца ад пасады кіраўніка Адміністрацыі прэзідэнта. Таксама звольнены ягоны першы намеснік Канстанцін Мартынецкі. В.а. кіраўніка прызначаны Валерый Міцкевіч.

З вёскі Роскі Сялец

Павялічыць

Аляксандр Косінец нарадзіўся ў 1959 годзе ў вёсцы Роскі Сялец, у 15 кіламетрах ад Оршы. У вёсцы па-ранейшаму жыве родная цётка Косінца Вера Мікалаеўна Лапо. А вось маці пераехала ў горад. Бацькі ў жывых ужо няма.

Аляксандр Косінец зрабіў выдатную кар’еру ў медыцыне. Ён быў вядомым у краіне хірургам. Ужо ў 37 гадоў стаў прафесарам. Мала хто з медыкаў можа пахваліцца такім. Кажуць, што ўсё гэта было заслужана. Ён аўтар мноства навуковых публікацый і манаграфій. Напрыклад, «Нырачна-клетачны рак» (2002), «Пратэіназы і іх інгібітары ў гнойнай хірургіі і анкалогіі» (2003). У 1997-м стаў рэктарам Віцебскага медуніверсітэта.

Сын таксама медык

Сын Аляксандра Косінца Уладзімір пайшоў дарогай таты. Ён паступіў у Віцебскі медунівер, на лячэбны факультэт, які скончыў у 2006 годзе. А ўжо ў 2009 абараніў кандыдацкую работу на тэму «Карэкцыя біяэнергетычных працэсаў у мышачнай тканцы тонкай кішкі пры распаўсюджаным гнойным перытаніце».

На гэтым сваю адукацыю Уладзімір Аляксандравіч Косінец не завяршыў. Удасканальваць яе ён паехаў у Расію, дзе ў 2013-м абараніў доктарскую дысертацыю ў Першым Маскоўскім дзяржаўным медыцынскім ўніверсітэце імя Сечанава. Яму ўсяго 34 гады, але на рахунку маладога медыка звыш 80 навуковых работ, у тым ліку «адзін падручнік, тры манаграфіі і пяць вынаходніцтваў».

Працаваў ён таксама ў Маскве, у Еўрапейскім медыцынскім цэнтры, у аддзяленні пластычнай хірургіі. Аднак пасля прызначэння бацькі ў Адміністрацыю вярнуўся ў Мінск.

Прыярытэтам у працы Уладзіміра Косінца з’яўляецца: павелічэнне грудзей пры дапамозе імплантантаў, падцяжка грудзей, контурная пластыка цела.

Гарачы характар

Старшыня Віцебскага аблвыканкама заўсёды быў на пярэднім плане барацьбы з п'янствам. Дзяржаўныя тэлеканалы нават дэманстравалі кадры, як Косінец асабіста абыходзіў кватэры алкаголікаў.

Не мог віцебскі начальнік застацца ўбаку ад зусім нядаўняй палітыкі барацьбы з «дармаедамі». «Не трэба ні з кім цырымоніцца, не хочуць працаваць — значыць, трэба прымусіць».

Аляксандр Лукашэнка некалі на прэс-канферэнцыі сказаў, што Косінец вельмі гарачы чалавек. «Як пойдзе з Мінска, можа да Віцебска дайсці».

Не так даўно Аляксандр Лукашэнка крытыкаваў Косінца за кепскую працу з кадрамі, хаця і даваў заданні на наступны год. Сярод імаверных пераемнікаў Косінца называюць былога прэм’ер-міністра Сяргея Сідорскага.

Дом у Драздах

Калі Косінца перавялі ў Віцебск у 2008-м, то ён, здаецца, ні на хвілінку не засумняваўся ў тым, што вернецца назад у Мінск. Не адмаўляўся і ад участку ў Драздах, іншых старшыні аблвыканкамаў такой маёмасці ў Мінску не маюць.

«Цікавы элемент, які прыйшоў да нас з расійскіх каталогаў, — верхняе акно на гарышчы ў выглядзе паўкола, якое ўрэзана ў іншае паўкола. Гэта перасячэнне дзвюх немагчымых фігур», - піша архітэктар Аляксандра Баярына, якая высока ацаніла эстэтыку дома Косінца.

Альгерд у Віцебску

У Віцебску Косінец развёў бурную дзейнасць. Напрыклад, на цэнтральнай плошчы паставіў самую вялікую ў краіне навагоднюю ёлку. Відавочна, што рабілася гэта, каб звярнуць на Віцебск увагу. «Віцебская ёлка не саступае мінскай», — пісалі ў 2009-м годзе абласныя выданні.

Праўда, з ялінкай той выйшаў казус. І ў гісторыю яна ўвайшла тым, што на яе бел-чырвона-белы сцяг узняў актывіст КХП-БНФ Сяргей Каваленка, якога пазней судзілі за гэта.

Косінец патрабаваў адкрываць у Віцебску добрыя кавярні. Натуральна, што па вышэйшаму разраду ён стараўся праводзіць песенны конкурс «Славянскі базар».

Сярод пазітыўных рэчаў — адкрыццё ў Віцебску помніка вялікаму князю Альгерду, хоць спадары русафілы і пісалі шматлікія лісты абурэння.

«Гэты чалавек — вялікі палітык і дзяржаўны дзеяч. Ён адыграў вялікую ролю ў развіцці беларускай дзяржаўнасці, у развіцці самага Віцебска. Па сутнасці справы, каменны Віцебск быў пабудаваны ім. І ў тыя часы літвінамі называліся беларусы. Ён шмат што зрабіў для разгрому арды і вызвалення Кіеўскай Русі», - пералічыў заслугі князя Аляксандр Косінец на адкрыцці помніка.

Глядзі таксама: Аляксандр Косінец: як хірург з Віцебска стаў першай асобай у Адміністрацыі прэзідэнта

• 0
• 0
• 0
• 0
• 0
• 0
• 0
• 0