Biełaruskaja delehacyja ŭ ABSIE hatova abmiarkoŭvać z arhanizacyjaj usie pytańni, u tym liku pravy čałavieka, ale nie bačyć sensu ŭ supracoŭnictvie z rabočaj hrupaj pa Biełarusi, tamu što jaje «ŭznačalvaje ekstremist». Tak staršynia pastajannaj kamisii Savieta Respubliki pa mižnarodnych spravach i nacyjanalnaj biaśpiecy Uładzimir Siańko prakamientavaŭ dla BiełaPAN płany biełaruskaha boku pa ŭdziele ŭ čarhovaj siesii Parłamienckaj Asamblei ABSIE ŭ Vienie 18—20 lutaha.
Biełaruskuju delehacyju na pasiadžeńni PA ABSIE ŭznačalić Siańko, ad Pałaty pradstaŭnikoŭ Nacyjanalnaha schodu ŭ delehacyju ŭklučana člen pastajannaj kamisii pa mižnarodnych spravach Valancina Lavonienka.
Kiraŭnik rabočaj hrupy PA ABSIE pa Biełarusi Kryścijan Cholm paviedamiŭ BiełaPAN, što spadziajecca na sustreču biełaruskaj delehacyi z rabočaj hrupaj. Adpaviednuju prapanovu jon užo nakiravaŭ biełaruskamu boku. «Mahu skazać, što z boku hrupy zaŭsiody jość žadańnie sustrecca z delehacyjaj Biełarusi», — adznačyŭ Cholm.
U svaju čarhu kiraŭnik biełaruskaj delehacyi Uładzimir Siańko zajaviŭ, što takaja sustreča nie płanujecca.
«U minuły raz, hod tamu, u mianie była niefarmalnaja razmova z kiraŭnikom hetaj rabočaj hrupy. Ja jamu skazaŭ, što my nie bačym patreby i sensu ŭ isnavańni hetaj hrupy jak takoj, tamu što niama hetaj prablemy. Jana imi vydumana, i chtości prosta choča na hetym hulać», — raspavioŭ BiełaPAN Siańko.
Pavodle jaho słoŭ, jon taksama kamunikavaŭ z hetaj nahody z kiraŭnictvam PA ABSIE. «Ja skazaŭ tahačasnamu staršyni i hienieralnamu sakrataru, što kali vy chočacie pracavać z nami, to davajcie na pryncypach uzajemapavahi. Heta nie prosta honar. Kali vy chočacie z nami razmaŭlać, to i my z vami zacikaŭleny supracoŭničać, u tym liku i ŭ śfiery pravoŭ čałavieka. Ale kali vy nam budziecie dyktavać, naviazvać niešta, kali budziecie z nami pracavać u styli Cholm, to ŭ hetym sensu niama, — skazaŭ Siańko. — I tady, jašče hod tamu, hetyja kiraŭniki Parłamienckaj Asamblei abodva dali mnie zrazumieć, što tak, my padumajem, što hetaha čałavieka treba, mabyć, pamianiać. Ale jon pa-raniejšamu zastajecca pa niejkich pryčynach».
Pry hetym Siańko adznačaje, što prablema nie ŭ kiraŭniku rabočaj hrupy pa Biełarusi, a ŭ jaje isnavańnie. «Dla nas, što budzie «A», što budzie «B», roźnica nievialikaja. My nie bačym sensu ŭ isnavańni hetaj hrupy. A ŭžo kali jaje ŭznačalvaje ekstremist, to, viadoma, razmaŭlać ź im niama sensu, i my nie budziem razmaŭlać, — zajaviŭ Siańko. — Jon jašče nie prajaŭlaje ni najmienšaha žadańnia da narmalnaj razmovy. Chto taki ekstremist? Heta čałaviek, jaki pieršapačatkova nie zdolny ŭsprymać dovady inšaha boku. Navat kali jon nie zhodny, tam ža šmat inšych niazhodnych. My ž nie šukajem čałavieka, jaki budzie hładzić nas pa hałoŭcy, ale jaki zdolny vysłuchoŭvać našy arhumienty i prysłuchoŭvacca da ich. A nie prosta tak barabanić, zaprašać adnaho Sańnikava (eks-kandydat u prezidenty Biełarusi Andrej Sańnikaŭ. — TUT.BY), druhoha, treciaha na trybunu. Heta nie šlach dla taho, kab sapraŭdy ŭzajemadziejničać i vyrašać niejkija prablemy».
Siańko padkreśliŭ, što pazicyja Minska zaklučajecca ŭ tym, što Biełaruś zacikaŭlena ŭ supracoŭnictvie z ABSIE ŭ luboj śfiery, u tym liku ŭ śfiery demakratyzacyi i pravoŭ čałavieka.
U kamientary TUT.BY Cholm zajaviŭ, što mała chto ŭ śviecie moža nazvać jaho ekstremistam: «Ale ja zaŭziaty prychilnik demakratyčnych kaštoŭnaściaŭ i pravoŭ čałavieka».
«Zadača rabočaj hrupy ABSIE — vieści dyjałoh z delehacyjaj Biełarusi. I, zrazumieła, ja hatovy słuchać roznyja punkty hledžańnia. My chočam kantaktavać z aficyjnaj delehacyjaj, ale my kantaktujem i z hramadzianskaj supolnaściu, i ź biełaruskaj apazicyjaj. My chočam raźvivać adnosiny ź Biełaruśsiu i kab u joj prajšli svabodnyja i spraviadlivyja vybary», — zajaviŭ Cholm.
Jon adchiliŭ abvinavačvańni ŭ tym, što rabočaja hrupa dyktuje abo naviazvaje niešta Biełarusi: «U mianie niama mety čytać kamuści lekcyi. My parłamienckaja asambleja ABSIE. I maja zadača — padkreślivać važnaść taho, kab parłamienty byli abranyja demakratyčnym šlacham. Kali kahości heta abražaje, to darma».
Havoračy ab zapłanavanych u ramkach zimovaj siesii sustrečach, Uładzimir Siańko paviedamiŭ, što płanujucca sustrečy biełaruskaj delehacyi z kalehami z Rasii, Kazachstana, Hiermanii, Francyi, Vialikabrytanii i inšymi.
Taksama pryznačany vystupy biełaruskich parłamientaryjaŭ u ramkach pasiadžeńniaŭ siesii. «My budziem vystupać u pieršym kamitecie pa palitycy biaśpieki. U druhim kamitecie budzie vystupać deputat Lavonienka pa hiendarnych prablemach», — skazaŭ Siańko. Jon taksama nie vyklučyŭ, što biełaruskaja delehacyja vystupić na pasiadžeńni, pryśviečanym situacyi va Ukrainie.
Šviedski deputat PA ABSIE Kryścijan Cholm staŭ kiraŭnikom rabočaj hrupy pa Biełarusi ŭ 2013 hodzie. Da jaho na praciahu 11 hadoŭ hetuju pasadu zajmała niamiecki deputat Uta Capf. Cholm viadomy rezkaj krytykaj aficyjnaha Minska i źjaŭlajecca adnym z najbolš aktyŭnych šviedskich deputataŭ, jakija zajmajucca biełaruskaj prablematykaj.
Kamientary