Tozik prapanuje viarnuć u škołach šaścidzionku i abmiežavać nabor u starejšyja kłasy
Adnosiny «nastaŭnik — baćka» treba zamacavać zakanadaŭča, u škoły viarnuć šaścidzionku, a nabory ŭ starejšyja kłasy abmiežavać.
Hetyja dy inšyja prapanovy hučali ŭ čaćvier na pasiadžeńni rabočaj hrupy, stvoranaj dla analizu sistemy adukacyi. Uznačalvaje jaje namieśnik premjer-ministra Biełarusi Anatol Tozik. Mierapryjemstva prajšło na bazie siaredniaj škoły №20 horada Barysava, paviedamlaje ahienctva BiełTA.
Padvodziačy vynik pracy sistemy adukacyi za apošnija niekalki hadoŭ, Anatol Tozik adznačyŭ, što na nastaŭnikaŭ ŭskłali nieŭłaścivyja im funkcyi, až da zboru srodkaŭ na ramont kłasaŭ. Naprykład, nastaŭnikaŭ prymušajuć praviarać, z kim zastajecca dzicia, kali abodva baćki pracujuć u načnuju źmienu.
«My pavinny prapanavać rašeńni, jakija b raźniavolili škołu i dazvolili b rychtavać daśviedčanych i adukavanych ludziej, sapraŭdnych hramadzian svajoj krainy, — adznačyŭ Anatol Tozik. - Treba zabaranić na zakanadaŭčym uzroŭni, kamu b tam ni było ŭmiešvacca ŭ praces, prybrać sa škoły usie lišnija dakumienty».
Členy rabočaj hrupy taksama paviedamili, što płanujecca na zakanadaŭčym uzroŭni zamacavać adnosiny «nastaŭnik—baćka».
Jak adznačyŭ namieśnik ministra adukacyi Vasil Budkievič, prapanujecca ŭstanavić typavuju formu damovy ŭstanovy adukacyi i baćkoŭ, dzie dakładna raźmiežavać adkaznaść škoły i adkaznaść baćkoŭ za navučańnie i vychavańnie dziaciej.
Pierachod na takuju formu pravavych adnosin daść mahčymaść uzmacnić adkaznaść baćkoŭ, daść škole instrumient uździejańnia na vonkava ščaślivych baćkoŭ, ale jakija, tym nie mienš, nie zajmajucca vychavańniem svajho dziciaci.
Uzdymałasia na pasiadžeńni pytańnie nakont praciahłaści navučalnaha hoda.
Na siońniašni dzień u Biełarusi samy karotki navučalny hod — 165 dzion, u Jeŭropie — 230, a ŭ krainach Paŭdniova-Uschodniaj Azii — 260-265 dzion.
Jak miarkuje vice-premjer, z takim adryvam u praciahłaści navučańnia nie atrymajecca vypuścić u žyćcio kankurentazdolnych hramadzian.
Mahčyma, nieabchodna abmierkavać u hramadstvie pytańnie pavieličeńnia navučalnaha hoda, uviadzieńnie ŭ starejšych kłasach rabočaj suboty abo pavieličeńnie kolkaści hadzin, adznačyŭ jon.
Pa vynikach respublikanskaha manitorynhu 77% piedahohaŭ i 65% baćkoŭ ličać mahčymym uviadzieńnie abmiežavańniaŭ na pryjom navučencaŭ u 10-y kłas na padstavie vynikaŭ vučoby za minuły pieryjad.
Jak adznačyŭ Anatol Tozik, členy kamisii pavinny vyvučyć pytańnie ab tym, ci patrebnyja ekzamieny ŭ dziaviatym kłasie naohuł: «Kali rabić pryjom u 10-ja profilnyja kłasy pavodle matyvacyi i siaredniaha bała atestata vyšej za šeść, to navošta nam ekzamieny za kurs bazavaj škoły?».
Apošnija hady śpiecyjalisty adznačajuć rezkuju roźnicu pamiž vynikami centralizavanaha testavańnia i adznakami ŭ atestatach vypusknikoŭ. Pa sutnaści, vypusknyja ekzamieny nabyvajuć farmalny charaktar. Anatol Tozik vykazaŭ mierkavańnie, što para ŭžo spynić aceńvać škołu pa kolkaści pastupiŭšych u tyja ci inšyja navučalnyja ŭstanovy.
Vynikam stała prapanova pravodzić pryjom u 10-ja profilnyja kłasy na konkursnaj asnovie.
Členy rabočaj hrupy padtrymali prapanovu Nacyjanalnaha instytuta adukacyi prymać na starejšuju prystupku škoły navučencaŭ ź siarednim bałam nie nižej za šaści i adznakaj pa profilnym pradmiecie nie nižej za siem bałaŭ.
Taksama na pasiadžeńni abmiarkoŭvalisia pytańni jakaści biełaruskich padručnikaŭ.
U chodzie niadaŭniaha daśledavańnia ŭ jakaści asnoŭnaj pryčyny ciažkaściaŭ pry vyvučeńni vučebnych pradmietaŭ 50% navučencaŭ nazvali «składanaje, nie zaŭsiody zrazumiełaje vykładańnie navučalnaha materyjału ŭ navučalnych dapamožnikach». Kala traciny vučniaŭ 9-11 kłasaŭ skazali, što składanaja mova vykładańnia vučebnaha materyjału ŭ navučalnym dapamožniku padachvočvaje ich źviartacca da repietytaraŭ.
Jašče adnoj temaj dla abmierkavańnia stała estetyčnaja adukacyja navučencaŭ.
«My kažam, što našy dzieci nie vychavany i pry hetym prybirajem sa školnaj prahramy taki važny pradmiet, jak ajčynnaja i suśvietnaja mastackaja kultura», - zaŭvažyŭ vice-premjer Anatol Tozik.
Akramia taho, była padkreślena važnaść zachavańnia i vyvučeńnia biełaruskaj movy. Kali «matčyna mova» sydzie sa škoły, — pamre nacyja, upeŭnieny členy rabočaj hrupy. Na hetaje pytańnie ŭžo nie raz źviartaŭ uvahu i kiraŭnik dziaržavy.
«Heta budzie žachliva, kali my stracim movu. Čym my tady budziem adroźnivacca ad našych susiedziaŭ? Jak heta razumieć, kali ŭ nas historyju i hieahrafiju Biełarusi bolšaść vyvučajuć pa-rusku. Hramadzianin Biełarusi abaviazany vałodać dźviuma dziaržaŭnymi movami», — padkreśliŭ vice-premjer.
Členy kamisii taksama prapanujuć prybrać z nazvy škoł ŭkazańnie na kankretnuju movu navučańnia i ŭvieści abaviazkovy ispyt pa dźviuch dziaržaŭnych movach za kurs siaredniaj škoły (ciapier navučency zdajuć taki ispyt na vybar).
Na pasiadžeńni abmiarkoŭvałasia prapanova ab tym, kab viarnuć u pieršy i druhi kłas adznaki za viedy i pavodziny.
Siońnia nastaŭniki zapaŭniajuć cełyja sšytki, «apisvajučy» acenki słovami, a dasiahnieńni vučniaŭ aceńvajucca to zorkami na palach sšytkaŭ, to ściažkami. Takaja sistema vyklikaje krytyku i ŭ baćkoŭ, i ŭ mnohich piedahohaŭ.
Prapanujecca viarnucca da raniejšaj sistemy i aceńvać viedy vučniaŭ bałami, pačynajučy ŭžo z druhoha paŭhodździa pieršaha kłasa.
Kamientary