Сёння Лукашэнка прызначыў новы ўрад. Новым прэм'ерам прызначаны кіраўнік Дзяржаўнага вайскова-прамысловага камітэта Раман Галоўчанка.
Напярэдадні, 3 чэрвеня, Сяргей Румас быў адпраўлены ў адстаўку. Ён адпрацаваў на пасадзе прэм'ера з 18 жніўня 2018 года.
Раман Галоўчанка нарадзіўся ў 1973 годзе. У 1996-м скончыў МГІМО — Маскоўскі дзяржаўны інстытут міжнародных адносін, кузню кадраў спецслужбаў і дыпламатыі спачатку СССР, а пасля - Расіі. Пазней у Беларусі ён дадаткова «павысіў кваліфікацыю ў Акадэміі кіравання пры прэзідэнце (2003).
На сваім службовым шляху ён напачатку перамяшчаўся па ўстановах следам за ўплывовым сілавіком Віктарам Шэйманам.
Адпаведна, працаваў у Радзе бяспекі ў той перыяд, калі знікалі дзеячы апазіцыі і адбываліся масавыя рэпрэсіі супраць праціўнікаў Аляксандра Лукашэнкі (1997—2002, 2006—2009). Працаваў таксама ў генеральнай пракуратуры (2002—2005), Адміністрацыі прэзідэнта (2005—2006).
У 2009—2013 — першы намеснік старшыні Дзяржаўнага ваенна-прамысловага камітэта.
У 2013—2018 — пасол у ААЭ.
У 2018—2020 — старшыня Дзяржаўнага вайскова-прамысловага камітэта. (Зараз гэту пасаду зойме Дзмітрый Пантус.)
Першым віцэ-прэм'ерам прызначаны Мікалай Снапкоў, які толькі нядаўна быў прызначаны паслом у Кітай, а да таго доўга кіраваў эканомікай з Адміністрацыі прэзідэнта і ва ўрадзе. Снапкоў мае рэпутацыю лаяльнага выканаўцы распараджэнняў зверху.
Дзмітрый Круты, які быў першым віцэ-прэм'ерам, прызначаны, у сваю чаргу, намеснікам кіраўніка Адміністрацыі прэзідэнта.
Віцэ-прэм'ерам стаў Іван Субоцін.
Кіраўніком Дзяржкантролю прызначаны намеснік старшыні КДБ Іван Церцель (раней пасаду займаў ветэран бюракратычнага апарата Леанід Анфімаў).
Міністрам інфармацыі стаў кіраўнік СТБ Ігар Луцкі — ён раней быў намеснікам міністра ў гэтым ведамстве.
Міністрам фінансаў стаў першы намеснік міністра Юрый Селіверстаў. Рыначнік-міністр Ермаловіч пяройдзе на дыпламатычную працу.
Міністрам ЖКГ стаў Андрэй Хмель (быў Аляксандр Церахаў).
«Падлік галасоў як сатанісцкі рытуал». Былы член камісіі расказаў, як у Беларусі фальсіфікуюць выбары11
Каментары