Навукоўцы высветлілі, што людзі чытаюць Вікіпедыю абсалютна па-рознаму — усё залежыць ад узроўню адукацыі
Даследчыкі вызначылі тры асноўныя стылі цікаўнасці пры чытанні свабоднай энцыклапедыі. Праверце, да якога належыце вы.
Даследчая каманда з Пенсільванскага ўніверсітэта выявіла некаторыя адрозненні ў патэрнах узаемадзеяння з сайтам, калі вывучыла звычкі 482 760 карыстальнікаў Вікіпедыі з 50 краін свету. Пра гэта піша тэлеграм-канал cybulinka.
Навукоўцам стала зразумела, што тое, якому стылю пошуку інфармацыі людзі аддаюць перавагу, можа шмат сказаць пра культуру, у якой яны выраслі.
Выявілася, што ў краінах з нізкім узроўнем адукацыі і гендарнай роўнасці людзі часцей шукаюць толькі цесна звязаную з запытам інфармацыю. Гэты стыль даследчыкі называюць «паляўнічы» (hunter).
У краінах з большай роўнасцю і даступнасцю адукацыі Вікіпедыю праглядалі шырэй, ахопліваючы разнастайныя тэмы.
Многія заходзяць пачытаць артыкул у Вікіпедыі, а пасля ў тэксце пстрыкаюць на спасылку, затым яшчэ раз, і з імпэтам чытаюць артыкул, які зусім не быў звязаны з тэмай іх першапачатковага пошуку. Гэты стыль атрымання інфармацыі даследчыкі назвалі «пляткар» (busybody).
Самым цікавым, па словах даследчыкаў стала тое, што яны змаглі пацвердзіць наяўнасць трэцяга стылю пошуку інфармацыі, якому яны далі назву «танцор» (dancer). У гэтым выпадку чалавек таксама пераходзіць ад тэмы да тэмы, але робіць гэта не выпадкова, а такім чынам, каб яны выбудоўваліся ў цэльную карціну.
Гэты стыль сведчыць пра творчы падыход і міждысцыплінарнае мысленне, што дазваляе бачыць сувязі там, дзе іншыя іх не заўважаюць.
Аўтары мяркуюць, што такія вынікі сведчаць пра значны ўплыў культуры на цікаўнасць і пазнанне. Дакладна вызначыць, з чым менавіта звязаныя розніцы ў стылях пошуку, пакуль складана, але існуюць гіпотэзы.
Былы афіцэр, выжыў у страшным баі. Хто той каліновец Верамейчык, якога В’етнам аддаў беларускаму КДБ?32
Каментары