Ва Украіне пацвердзілі: беларус, якога вышуквалі ў Брэсце з 2022 года, мае статус ваеннапалоннага
Ва Украіне пацвердзілі, што беларус, які ў траўні трапіў ва ўкраінскі палон пад Ваўчанскам Харкаўскай вобласці, мае статус ваеннапалоннага. Гэта жыхар Бабруйска Яўген Камянькоў, якога ў ліпені 2022 года ў Беларусі абвяшчалі ў вышук пасля таго, як ён разам з 13-гадовым падлеткам уцёк з брэсцкага манастыра «Афанасія» ў Расію, піша «Радыё Свабода».
«Вайсковец Камянькоў Яўген Андрэевіч, нарадзіўся 17 сакавіка 1999 года, знаходзіцца ва Украіне ў статусе ваеннапалоннага», — адказалі «Радыё Свабода» ў праекце «Хачу знайсці», створаным для перадачы сваякам інфармацыі аб ваеннапалонных, зніклых без звестак ці загінулых расійскіх вайскоўцаў.
Беларус можа быць уключаны ў спіс для абмену, калі ягоныя сваякі звернуцца да ягонага расійскага камандавання з адпаведнай заявай.
У чэрвені 2024 года ўкраінскі праект «Шукай сваіх», які вядзе Уладзімір Золкін, апублікаваў інтэрв'ю з палонным вайскоўцам расійскай арміі. У ім паведамілі толькі, што яго завуць Яўген і ён мае беларускае грамадзянства.
У гэтым інтэрв'ю Яўген Камянькоў расказаў, што мае прыёмных бацькоў, братоў і сясцёр, з якімі не падтрымлівае кантактаў, апошні час займаўся бадзяжніцтвам, жыў у манастырах. Паводле адукацыі ён ветэрынар. У палон трапіў у выніку ранення ад падзення дрона.
Яўген Камянькоў расказаў, што ў школе вучыўся кепска, цікавіўся магіяй, бо хацеў вучыцца добра і мець добрыя адносіны з людзьмі.
Беларус таксама расказаў, што перабіваўся часовымі працамі, пэўны час быў звязаны з цыганамі і прасіў дапамогу для «дзяцей». Шмат ездзіў у Расію, дзе таксама спрабаваў уладкавацца на працу, але заўсёды трапляў у гісторыі, калі яму не аплачвалі працу.
З апошняй працы на цагляным заводзе ў Дагестане ён вымушаны быў уцякаць без дакументаў. На адным з памежных пастоў яго затрымалі для высвятлення асобы. Адзін з мясцовых паліцыянтаў паабяцаў яму дапамагчы і прапанаваў працу. Аднак потым, калі Яўген выкраў у яго пасведчанне, той нібыта адвёз яго ў суд, які пастанавіў выдварыць у Беларусь.
Пасля года знаходжання ў ізалятары Яўген Камянькоў падпісаў кантракт у «спецпрыёмніку» ў канцы красавіка 2024 года — яму паабяцалі добры заробак і грамадзянства Расіі.
На тэрыторыю Украіны яго перакінулі ў траўні 2024 года ў складзе 255-га гвардзейскага мотастралковага палка Сухапутных войскаў Расіі, а праз некалькі тыдняў мужчына трапіў у палон. Ён сцвярджае, што расейцы кідалі яго ў яму без цёплага адзення.
«У далейшым я б хацеў застацца на тэрыторыі Украіны і не вяртацца на вайну, таму што тое, што яны робяць — гэта вар’яцтва. Хацеў бы папрасіць прабачэння ў украінскага народа, што я пагадзіўся на гэтую вайну», — сказаў Яўген у канцы размовы.
Ён заклікаў беларусаў не пагаджацца на ўдзел у вайне супраць Украіны.
Ва ўкраінскі палон трапіў яшчэ адзін беларус, які ваяваў у складзе расійскай арміі
Ці рэальна абмяняць беларускіх палітвязняў на расійскіх ваеннапалонных? Тлумачыць Кабанчук
Сталі вядомыя абставіны вызвалення з беларускіх турмаў грамадзян Украіны
Як Украіна вызваляе з Беларусі сваіх. Тлумачэнне ўкраінскага эксперта
Аўстрыйскі Raiffeisen Bank прадаў Прыёрбанк арабам2
Каментары