У актыўным «стуканні» ў КДБ засвяціўся вядомы магілёўскі фатограф і экаактывіст
Праваабаронцы з Mayday team, вывучыўшы базу зваротаў у КДБ, апублікаваную «Кіберпартызанамі», высветлілі, што яшчэ да выбараў 9 жніўня 2020 года адзін з даволі вядомых магілёўцаў актыўна звяртаўся ў КДБ са скаргамі палітычнага характару. А пасля дня галасавання і агрэсіі з боку сілавікоў мужчына накіраваў гэбістам яшчэ некалькі даносаў.
Гаворка ідзе пра даволі вядомага ў Магілёве фатографа 36-гадовага Міхаіла Капычку. У даносах фігуруе нікнэйм, які мужчына выкарыстоўвае, а таксама пазначаны нумар тэлефона фатографа, які актуальны і цяпер.
Першы данос здарыўся яшчэ 5 чэрвеня 2020 года — у ім адпраўнік папрасіў КДБ «стварыць спецыяльны інфармацыйны аддзел па барацьбе з дэзынфармацыяй, правакацыйнымі і негатыўнымі выказваннямі ў бок дзейнага Прэзідэнта РБ, а таксама палітычнага ладу РБ», тлумачачы гэта «дзеяннямі правакацыйнага характару…, якія вядуцца ў сетцы Інтэрнэт».
Напярэдадні выбараў, 8 жніўня, Міхаіл Капычко запатрабаваў ад чэкістаў заблакаваць сайт ZUBR.in за разгалошванне даных членаў участковых камісій.
А ўжо 10 жніўня — на наступны дзень пасля галасавання — Міхаіл Капычка запатрабаваў ад КДБ «завесці крымінальныя справы па факце паклёпу і закліку да дзяржаўнага перавароту ў Рэспубліцы Беларусь на падставе правакацыйнай і агітуючай да гвалту і беспарадкаў інфармацыі, размешчанай у сацсетках і месенджарах Nexta, «97%» і іншых апазіцыйных рэсурсах».
Больш за тое, ён запатрабаваў ад чэкістаў, каб яны падключылі да гэтага Інтэрпол.
Яшчэ праз некалькі дзён, 13 жніўня, мужчына папрасіў спецслужбу «ўвесці ў адукацыйны працэс курс лекцый па «Канцэпцыі Грамадскай Бяспекі» для ўсяго кіраўнічага складу РБ, дзяржаўных міністэрстваў і ведамстваў, распрацаваны вышэйшым вайсковым саставам СССР».
Варта адзначыць, што так званая «Канцэпцыя Грамадскай Бяспекі» — паўакультная тэорыя расійскага вайскоўца Канстанціна Пятрова, выкладзеная ў курсе відэалекцый. На ўступную лекцыю Пятрова Міхаіл Капычка прымацаваў спасылку ў сваім паведамленні для КДБ. Тады ж, 13 жніўня, фатограф апублікаваў відэа ў сябе на старонцы ва «ВКонтакте».
Апошні вядомы данос мужчыны датуецца 21 верасня. У ім ён просіць прыцягнуць да адказнасці адміністратара суполкі «ВКонтакте» «Рудабельская паказуха» — верагодна, гаворка пра вядомага беларускага блогера Андрэя Павука. Яго Міхаіл Капычка абвінаваціў у «размяшчэнні ў публічным доступе асабістай інфармацыі супрацоўнікаў унутраных спраў РБ з мэтай закліку да цкавання гэтых супрацоўнікаў».
Акрамя фатаграфіі, Міхаіл Капычка вядомы як магілёўскі экаактывіст. Прыкладна ў 2017 годзе ён разам з іншымі магілёўцамі стварыў ініцыятыву «Захаваем Пячэрскі лесапарк», якая займаецца прыцягненнем увагі да праблем гэтага месца. У гэтай ініцыятыве, калі верыць інтэрв'ю Капычкі ад 2020 года, ён займаўся ў асноўным перапіскай з дзяржорганамі, вядзеннем пабліку ва «ВКонтакте» і правядзеннем мерапрыемстваў.
Музыка Аракелян знайшоў у злітым спісе лістоў у КДБ данос на сябе. Ён належыць вядомай асобе
Кандыдата ў Каардынацыйную раду ад «Народнай Грамады» выкінулі са спісу, бо ён даносчык. Стукаў на Аўтуховіча
«Усіх я ў рот **аў, і мараль вашу таксама». Расіяне расказалі, навошта пісалі даносы ў беларускі КДБ
«Я не даносіў, мы ж сябруем». Як апраўдваюцца выкрытыя стукачы
Беларусы напісалі 40 тысяч даносаў? Не, гэта непраўдзівае сцверджанне
Каментары