Сахашчык, Пракоп'еў і Ягораў запісалі супольны навагодні зварот
Вадзім Пракоп'еў запісаў сваю частку звароту з Нью-Ëрка, Андрэй Ягораў — са Свябодзіна, а Валер Сахашчык — з Кіева.
У сваім звароце з Нью-Ёрка Вадзім Пракопʼеў адзначыў, што ён звяртаецца да беларусаў як грамадзянін, які адчувае вялікую трывогу за стан рэчаў. «Калі нам яшчэ калі-небудзь трэба ўласная дзяржава, трэба ратаваць становішча. Украіна не стане трамплінам. Штаб у Вільні не будуе цэнтра сілы, аддаючы перавагу працы ў якасці Міністэрства замежных справаў. МЗС — штука карысная, аднак ён не мяняе ўладу ў краіне. Ён афармляе дамовы, якія ўжо адбыліся».
Палітык лічыць, што ёсць некалькі варыянтаў выхаду з сітуацыі, якая склалася.
«Лукашэнка так старанна пазбаўляўся ад сотняў тысяч нязгодных, так заўзята выдушваў лішніх людзей, што сфармаваў цэлую армію беларусаў за мяжою — разумных, таленавітых, самадастатковых і патрыятычных».
Вадзім Пракопʼеў прапануе беларусам замежжа абʼяднацца ў магутны палітычны рух. Для пачатку ён заклікае ўзяць удзел у выбарах у Каардынацыйную раду, як толькі правілы выбараў будуць абвешчаныя.
«Гэтыя два ходы — новая Каардынацыйная рада і рух дыяспар — яшчэ не выйграная партыя. Але моцны пачатак у вялікай гульні за будучыню нашай краіны. Усе мы павінны намацаць палітычныя мускулы і замест статыстаў стаць нарэшце гульцамі. Фігуры расстаўленыя. Час пайшоў. Ход за намі. Няхай наступны год стане годам нашай дзяржаўнай мудрасці», — падкрэслівае Пракопʼеў.
З Вадзімам Пракопʼевым салідарны Андрэй Ягораў. Спікер Каардынацыйнай рады запісаў свой зварот у горадзе Свябодзін у Польшчы на фоне самай вялікай у свеце статуі Ісуса Хрыста як сімвала веры.
Ягораў адзначыў, што беларусаў абʼядноўвае не толькі прыналежнасць да адной нацыі, але і вера ў супольны поспех, супольную перамогу.
«Але адной веры недастаткова. Нам патрэбны дзеянні. Патрэбны план перамогі. І гэта план абʼяднання ў сапраўды масавы рух соцень тысяч беларусаў, якія гатовыя працягваць барацьбу. І гэта план стварэння нашага протапарламента, які стане маяком для тых, хто змагаецца ўнутры Беларусі. Ім павінна стаць выбраная беларусамі Каардынацыйная рада. <…> Яна стане асновай для сапраўднага цэнтра сілы, магутнай палітычнай альтэрнатывай».
Ягораў заклікае беларусаў узяць актыўны ўдзел у будучых выбарах у Каардынацыйную раду. «Толькі вярнуўшыся ў палітычную актыўнасць, мы атрымаем шанц не праспаць наступнае акно магчымасцей і вызваліць нашу краіну ад тыраніі».
Валерый Сахашчык звярнуўся да беларусаў з Кіева, знаходзячыся каля манумента «Радзіма-маці», які сімвалізуе гераізм продкаў, што адстаялі для нас свабоду ў Другой сусветнай вайне.
Як і папярэднія спікеры, Сахашчык заклікаў стварыць Каардынацыйную раду такой, каб яна «сапраўды рэпрэзентавала волю народу, выбіралася народам і была падсправаздачная народу, і ўпэўнена павяла беларускі народ да лепшай будучыні.
Давайце зробім так, каб генакодам беларусаў была ўзаемная падтрымка, узаемадапамога, давер і жаданне дапамагаць адно аднаму. Пры выбудове правільных інстытутаў дэмакратыі, стварэнні сістэмы стрымак і супрацьваг, сістэмы падзелу галін улады менавіта тое, што мы па-рознаму бачым нашу будучыню, дазволіць пазбегнуць фатальных памылак і дазволіць упэўнена рухацца наперад.
Мы знаходзімся напярэдадні Новага года. Гэта час, калі кожны чалавек спадзяецца на перамены да лепшага. Перамены ў Беларусі непазбежныя. Але якімі яны будуць — вельмі моцна залежыць ад нас».
Чытайце яшчэ:
Стала вядома, як і калі збіраюцца праводзіць выбары ў Каардынацыйную раду
Хутка выбары ў Каардынацыйную раду. А ведаеце, колькі там зарабляюць?
Трыа Сахашчык, Пракоп'еў і Ягораў паехала ў турнэ. Пра што гавораць на сустрэчах з беларусамі
Васкрасенскі: Трэба, каб Сікорскі прывёз падарунак Лукашэнку. А Бяляцкі і 20 завадатараў выйдуць апошнімі26
Каментары