Нунцый Антэ Ёзіч правёў інаўгурацыю Апостальскай адміністратуры для грэка-католікаў у Беларусі
15 ліпеня Боская літургія з удзелам апостальскага нунцыя адбылася з гэтай нагоды ў храме душпастарскага цэнтра Праведнага Язэпа ў Мінску, паведамляюць «Ватыканскія навіны».
Такім чынам распачалася афіцыйная дзейнасць Апостальскай адміністратуры, створанай Папам Францішкам 30 сакавіка 2023 года.
Апостальская адміністратура прыраўноўваецца па статусе да дыяцэзіі, што, у сваю чаргу, прадугледжвае заснаванне іерархіі і пасвячэнне ў біскупскі сан апостальскага адміністратара (сёння ім з'яўляецца Сяргей Гаек), чаго грэка-католікі ў Беларусі не мелі з канца вайны.
Нагадаем, што БПЦ Маскоўскага патрыярхата абурылася дзейнасцю грэка-католікаў у Беларусі і прасіла пасланніка Папы, былога апостальскага нунцыя ў Беларусі Клаўдыа Гуджэроці абмежаваць іх дзейнасць у Беларусі.
***
Па стане на пачатак 2020-х у Беларусі дзейнічае 14 парафій, у тым ліку чатыры ў Мінску, колькасць вернікаў складае некалькі тысяч.
Уніяцкая (грэка-каталіцкая) царква, створаная ў выніку Берасцейскай уніі 1596 года, існавала на тэрыторыі цяперашняй Рэспублікі Беларусь да ліквідацыі яе царскімі ўладамі ў 1839 годзе. На тэрыторыі Падляшша ўніяцтва пратрымалася да 1876 года.
У XVIII i XIX стагоддзях уніятамі была абсалютная большасць беларусаў. Уніяцтва мела шанцы стаць нацыянальнай царквой, бо вылучала беларусаў і ад палякаў, і ад расейцаў.
Адроджаная грэка-каталіцкая царква ў секулярызаванай постсавецкай Беларусі не стала масавай.
Афіцыйнае праваслаўе засталося пад кантролем Масквы, а за апошні час ператварылася ў ідэалагічную структуру дыктатуры, тады як каталікі, пратэстанты і грэка-католікі захоўваюць незалежнасць ад дзяржавы.
«Сяргей» не адзін. Вось як КДБ прапануе зарабіць на сачэнні за беларускімі эмігрантамі2
Каментары
Язэп Сталін пытаў «А сколько дивизий у папы Римского?»