Набліжаны да Лукашэнкі бізнэсовец збудаваў комплекс насупраць Палаца Незалежнасці. Вось як ён выглядае
На праспекце Пераможцаў у Мінску завяршаецца будаўніцтва шматфункцыянальнага комплексу. Яго рэалізуе кампанія «БелГлобалГарант», сузаснавальнік якой — бізнэсмен і экс-кіраўнік Беларускай тэніснай федэрацыі Сяргей Цяцерын. Першапачатковы праект будынка зведаў змены. Як ён выглядае цяпер, паказвае Realt.by.
Узімку 2021 года Мінгарвыканкам перадаў у арэнду кампаніі «БелГлобалГарант» два ўчасткі агульнай плошчай каля 2,6 гектара на месцы аўтастаянкі паміж Рэспубліканскім цэнтрам алімпійскай падрыхтоўкі па тэнісе і праспектам Пераможцаў.
Тады ж тут пачалі будаваць шматфункцыянальны комплекс. Яго праект першапачаткова распрацоўвала «Творчая майстэрня 7». Ён быў такім:
Канчатковы ж праект будынка распрацавала кампанія Viaset. У выніку ён будзе вось такім:
Цяпер будаўніцтва ўжо на фінішнай стадыі. Візуальна комплекс на 32 тысячы квадратных метраў амаль гатовы. Праўда, здаць яго павінны былі яшчэ ў верасні 2022 года.
Будынак уяўляе сабой тры аўтаномныя корпусы, у якіх размесцяцца 40 офісаў класа А: на змену калідорнаму размяшчэнню тут прыходзіць апартаментнае з двухбаковым асвятленнем.
Будзе пабудаваны паркінг. Па суседстве з комплексам месціцца Рэспубліканскі цэнтр тэніса, таму над паркінгам пабудуюць шэсць тэнісных кортаў. Будаўніцтва кортаў, дарэчы, было адной з умоў перадачы «БелГлобалГаранту» зямельных участкаў.
Пад будынкам пабудуюць і падземны паркінг. З яго можна будзе трапіць у хол комплексу, не выходзячы на вуліцу. На цокальным паверсе размесцяцца пяць крам.
Сяргей Цяцерын часта суправаджае Аляксандра Лукашэнку ў паездках і зборы кавуноў, яго называюць асабістым масажыстам беларускага дыктатара.
Лукашэнка пра адключэнне інтэрнэту ў 2020-м: Калі гэта паўторыцца, адключым зусім25
Каментары
якая прыгажэсць