Padtrymajma prezidenta

Vodhuk čytača NN Kastusia Traŭnia na artykuł «Kirhizski scenar dla Biełarusi: ci buduć u Minsku stralać» z «NN» № 27 ad 21 lipienia 2010.

Artykuł Andreja Dyńko karysny, ale patrabuje dalejšaha analizu. Uvieś čas našy analityki źviartajuć uvahu na «rašeńni», «mierkavańni» i zabyvajucca pra «siłu». Miž tym, jak u suśviecie, tak i ŭ palitycy «siła» jość asnoŭnym arhumientam!

Dyńko pytajecca: «Čaho dabivajecca Rasija?» I adkazvaje: «Zachavańnia status-kvo ŭ adnosinach ź Biełaruśsiu i pry hetym źmianšeńnia enierhietyčnaha hranta». Cho-cho-chie-chie… Dla Rasii piać miljardaŭ dołaraŭ u hod lišnich trataŭ ničoha nie vyrašajuć.

Niejak naš prezident vykazaŭ svajo žadańnie: «Vy, Rasija, pavinny stavicca da nas, jak ZŠA da Izraila!» Lepš i nie skažaš! Usie sto adsotkaŭ hramadzian našaj Biełarusi padtrymajuć hetuju tezu!

Darečy, ZŠA nie prymušaje izrailcian admovicca ad svajoj movy, ad svajoj viery i ad svajoj historyi, što robić u dačynieńni da Biełarusi Rasija. Miž tym, pahłynańnie našaj krainy RF łahodna nazyvajuć «jadnańniem dvuch brackich narodaŭ».

Rasija i siońnia — heta drapiežnaja impieryja! Meta jaje navat siońnia — dałučeńnie satelitaŭ i vysmoktvańnie žyćciovych sił z hetych satelitaŭ. Meta RF — dałučeńnie Biełarusi da Rasii ŭ jakaści subjekta fiederacyi.

Darečy, pošliny na naftapradukty byli pryniaty Pucinym paśla taho, jak jon na samicie SND u Minsku ŭbačyŭ našu Nacyjanalnuju biblijateku. Zajeła, uziało za žyvoje, udaryła pa samalubstvie rasijskaha nośbita ŭłady.

Niekatorych rasijskich čynoŭnikaŭ da siońnia zajadaje navat isnavańnie našaj futbolnaj zbornaj i pośpiechi BATE. U Rasii jašče i siońnia ŭsie impieryjalisty: ad bamža da prezidenta, navat internacyjanalist Ziuhanaŭ — taksama rasiejski impieryjalist.

I ŭ Kirhizstanie Rasija dziejničała pierš za ŭsio dziela taho, kab zachavać i ŭzmacnić svoj upłyŭ.

Dalej Dyńko vykazvaje dumku: «Kali nakanavana adbycca źmienam, jany adbuducca pad tymi ściahami, jakija zapanujuć na vulicy». Ściahi ŭ dadzienym vypadku — heta rekvizit. Hałoŭnaje, chto pryjdzie pad tymi ściahami da ŭłady?

Kaniečnie,

jak palityk naš «baćka» pieraros rolu palityčnaha pasłuhača RF.

Naš prezident siońnia — heta pieršy biełaruski palityk za apošnija sto hod, paśla Antona Łuckieviča, jaki ŭ svoj čas vykłaŭ ideju stvareńnia niezaležnaj Biełarusi. Palityk — heta kapitan karabla, jaki ŭvieś čas łović pieramienlivy viecier u vietrazi svajho paruśnika.

Pierachod ad rasijskaha tatalitaryzmu da jeŭrapiejskaj demakratyi ŭ našaj krainie — heta ŭtopija, da ŭłady pryjdzie impierskaja mafija.

Kali ciapierašni prezident viernie nam movu, bieł-čyrvona-bieły ściah, «Pahoniu», histaryčnuju spadčynu VKŁ, skarystaje ŭ dziaržaŭnaj palitycy nacyjanalnuju ideju, to za im pojduć miljony ludziej.

Što datyčyć apazicyi, to joj treba pomnić, što «rozum» taksama źjaŭlajecca «siłaj». Tolki treba znajści supolnyja hramadskija intaresy miž uładaj i patryjatyčnaj apazicyjaj.

* * *

Kamientar Redaktara. Siakiera pad łavaj.

Dumki daŭniaha čytača i aŭtara «NN» u dadzienym vypadku padalisia mnie tearetyčna pravilnymi, jak haz u kołbie, ale mała karysnymi pry sutyknieńni z realnaściu.

Tak, Rasija impierskaja i maje ekanamičny intares. Ale najlepš abaraniajuć nacyjanalnyja intaresy nie aŭtarytarnyja kiraŭniki, a demakratyi ŭ składzie ES. U ich upłyŭ Rasii najmienšy, uzrovień žyćcia vysoki, a stan nacyjanalnych kultur — upeŭnieny.

«Niesumniennyja ekanamičnyja pośpiechi» vyhladajuć sumnieŭnymi, jak tolki pierajazdžaješ polskuju miažu.

Čamu Litvie ci Małdovie pa siłach było pierajści ad tatalitaryzmu da demakratyi, a Biełarusi — nie? «Nie adrazu!» — pačuju piarečańnie jak sp.Traŭnia, tak i łukašenkaŭcaŭ (akademika Rubinava, prykładam). Ale ž i pierachodny pieryjad aŭtarytaryzmu doŭžycca ŭžo 20 hadoŭ! Na zachad i poŭnač ad Biełarusi ŭ Jeŭropie niama nivodnaj aŭtarytarnaj dziaržavy. Napeŭna, jašče i tamu, što takija dziaržavy nieefiektyŭnyja ekanamična.

Chto jak nie Łukašenka padtrymlivaŭ i zaachvočvaŭ impierskuju ekspansiju? Damovy pra SPA, siły chutkaha reahavańnia ADKB i Mytny sajuz byli jahonymi niadaŭnimi krokami ŭ tym kirunku.

Padtrymlivać takoha Łukašenku? Zrešty, jon i nie maje patreby ni ŭ jakaj narodnaj padtrymcy. Mienavita tamu naziralnikam zabaroniena sačyć za padlikam hałasoŭ na vybarach, zabaroniena lubaja publičnaja krytyka kiraŭnika dziaržavy, a ŭsie miechanizmy hramadskaha abmierkavańnia pieratvorany ŭ prafanacyju, prystasavany dla «adabriamsa» zahadzia vyznačanych rašeńniaŭ. Daduć vam prava hołasu, spadaru Travień, tady i padtrymajecie.

Spadziavańni, što Łukašenka «piarojdzie na movu», «skarystaje nacyjanalnuju ideju» — heta spadziavańni na cud i dziadźku. Łukašenka 16 hadoŭ abapirajecca na inšyja siły, a kiruje im jahony asabisty intares i intaresy jahonych synoŭ. Vykarystoŭvać nacyjanalnuju ideju jon budzie ŭ toj stupieni, u jakoj jany buduć zdolnyja padoŭžyć jahonaje kiravańnie ci dapamohuć zachavać ułasnaść pad svaim kantrolem.

Što ŭ takim razie ludziam Vašych pierakanańniaŭ, spadaru Travień, karysna rabić dla abarony svaich asabistych i nacyjanalnych intaresaŭ? A toje samaje, što rabili raniej: paśladoŭna padtrymlivać biełaruskamoŭnych i \ ci prajeŭrapiejskich palitykaŭ, stavić za ich podpisy, stavić podpisy pad nacyjanalnymi pietycyjami i zvarotami ŭ abaronu pravoŭ čałavieka i pryvatnaj ułasnaści, udzielničać u niezaležnych ad dziaržavy asiarodkach i supołkach i najpierš finansavać ich dziejnaść, jak i vychad niezaležnych ŚMI, sajtaŭ. I — dbać pra ŭłasnyja siemji, raźvivać ułasny biznes, ułasnyja asiarodki.

Niezaležnaja aktyŭnaść źnizu stvaryła nacyi finskuju, češskuju i litoŭskuju, a «dobryja cary» vymušanyja byli ŭ svaich intaresaŭ toje tryvać.

U čym sa sp.Traŭniem pahadžajusia całkam, dyk heta z dumkaj, što niezaležnamu hramadstvu — asnovie nacyi — varta akuratna łaviravać, kab ni ŭ jakim razie nie spryjać rusifikacyi i ŭzmacnieńniu rasijskich intaresaŭ u Biełarusi.

«Šlach budzie doŭhi, i my pavinny da hetaha pryzvyčaicca, — skazaŭ Zianon Paźniak u svaim niadaŭnim intervju i pryvioŭ prykład. — Kaliści čechi pabudavali teatr «Narodne divadlo», hrošy jany źbirali pa ŭsioj krainie. U dzień jaho adkryćcia nienaviśniki češskaj kultury i dziaržavy spalili teatr. Što robić nacyja? Imhnienna abviaščaje novy zbor srodkaŭ i znoŭ stvaraje teatr. Svaboda — heta doŭhaja praca».

• 0
• 0
• 0
• 0
• 0
• 0
• 0
• 0