Kirhizski scenar: ci buduć u Minsku stralać?

Maskva svaimi filmami i pavodzinami namiakaje: my takoje padtrymajem. Piša Andrej Dyńko.

Rasija dziejničaje ŭ biełaruskim pytańni tak, jak dziejničała z Kirhizijaj pierad skidańniem Bakijeva. Davajcie ž uspomnim, jak skidali Bakijeva. Zbrojna!

Apazicyja dastała aŭtamaty, zachapiła BTRy i ŭ bai zdabyła prezidencki pałac. Pry hetym zahinuła 80 čałaviek.

Varta adznačyć, što biškiekskija paŭličenki nie nadta za Bakijeva staralisia.

Kali b kirhizskaja apazicyja była dziejničała biez zbroi, ułady razahnała b ich demanstracyju, jak i raniejšyja.

Kab kirhizski scenar realizavaŭsia ŭ Biełarusi, tut pavinien znajścisia chtości, chto arhanizuje ŭzbrojenuju baraćbu za ŭładu.

Ale ŭ Biełarusi takoj siły niama, i zbroi niama. I navat kali zbroju nie prablema zavieźci z Rasii praz adkrytuju miažu, to i najomnikaŭ nie znojdziecca, kab stralać. Tradycyi nie takoŭskija. Zrešty, praz hetuju łukašenkaŭskuju psieŭdamiažu pad Chocimskam možna nie tolki zbroju pieravieźci, ale i słana bajavoha. Abo najomnikaŭ, kab z toj zbroi stralali... Tak ža arhanizoŭvali da pary typovyja pieravaroty ŭ afrykanskich krainach.

Voś taki kirhizski scenar byŭ by najhoršym dla Biełarusi varyjantam. Achviary, nielehitymnaja ŭłada, prynižanaje hramadstva, demaralizavanaja palityčnaja elita. I navat, mahčyma, niejki pretaryjaniec typu Kadyrava ŭ prezidenckim pałacy.

Jak pakazvaje dośvied centralnajeŭrapiejskich krainaŭ, mirnaja, śpieŭnaja revalucyja nadzialaje novuju ŭładu vysokaj lehitymnaściu, asabliva kali jana supravadžajecca chutkaj intehracyjaj krainy ŭ jeŭrapiejskija, stabilizujučyja instytuty. A voś pretaryjanski pieravarot, naadvarot, viadzie da čachardy i niestabilnaści.

Cikava, što ŭ Hruzii taksama była sproba arhanizavać uzbrojeny miaciež, ale jana pravaliłasia.

Što značyć vybar Rasijaj kirhizskaha scenara? Jak viadoma, u Kirhizii Rasija padtrymlivała nie jakujuści palityčnuju siłu, a padzieńnie ŭłady bieź jasnaj alternatyvy.

Trapna źviartaje ŭvahu Vital Silicki: Rasija pačała mačyć Łuku, kali jon pasprabavaŭ ad jaje adyści.

Kirhizski scenar aznačaje, što Rasija budzie imknucca najpierš da asłableńnia Biełarusi, da destabilizacyi.

Najhoršaje — kab źmiena ŭłady adbyłasia pieravarotam. Nielha padstaŭlacca pad takija scenary. Nielha, kab praliłasia kroŭ. U toj ža čas samy momant chaładnakroŭna i mirna cisnuć na ŭłady z tym, kab u krainie źmianiłasia sistema. Pamyłkaju było b hurtavacca vakoł dyktatury tolki tamu, što taja śpiekuluje na pytańni niezaležnaści.

Rasija budzie rabić svajo, što zadumała. Ale

biełaruskamu palityčnamu kłasu i, šyrej, hramadstvu treba vykarystoŭvać situacyju nie dla źmieny ŭłady, a dla źmieny sistemy.

• 0
• 0
• 0
• 0
• 0
• 0
• 0
• 0