Zimoŭski: «U palitycy abiacańni vykonvajucca pa abstavinach»

Zajavu prezydenta Rasiei D.Miadźviedzieva nakont taho, što prezydent Biełarusi A.Łukašenka abiacaŭ pryznać niezaležnaść Abchazii i Paŭdniovaj Asetyi prakamentavaŭ u interviju našamu radyjo staršynia Biełteleradyjokampanii Alaksandar Zimoŭski.

Radyjo Svaboda: Jak by vy prakamentavali zajavu prezydenta Rasiei Dźmitryja Miadźviedzieva, što prezydent Biełarusi Alaksandar Łukašenka abiacaŭ pryznać niezaležnaść Abchazii i Paŭdniovaj Asetyi? Jak vy miarkujecie, ci sapraŭdy prezydent Łukašenka davaŭ takoje abiacańnie?

Zimoŭski: Ja miarkuju, što spadar Miadźviedzieŭ lepš viedaje pra heta, bo jon spasyłajecca na niejkaje mierapryjemstva ŭ miežach ADKB, na jakim ja nie prysutničaŭ. Sa słovaŭ Miadźviedzieva taki fakt mieŭ miesca.

Radyjo Svaboda: Na vaš pohlad, čamu takaja zajava prezydenta Miadźviedzieva źjaviłasia mienavita ciapier? Raniej rasiejskija kiraŭniki kazali, što było b pažadana, ale my nie nastojvajem, adnak nikoli prezydenta Biełarusi nie paprakali tym što jon havoryć nia toje, što robić.

Zimoŭski: Razumiejecie, u palitycy abiacańni dajucca pa mierkavańniach, a vykonvajucca pa abstavinach. Heta tyčycca ŭsich palityčnych dziejačoŭ, ja miarkuju, što naš prezydent u hetym sensie nie vyklučeńnie. Tamu kali prezydent Rasiei kaža, što niechta abiacaŭ jamu razhledzieć pytańnie ab pryznańni Paŭdniovaj Asetyi i Abchazii, mahčyma, jon maje na ŭvazie sam fakt, ale pra terminy tam ničoha nie havorycca.

Kali ja pravilna pryčytaŭ jahonuju zajavu, tam nie było skazana, što heta budzie zroblena zaŭtra ci paślazaŭtra albo ŭ ahladnaj budučyni. Ja nie chaču abvinavačvać Miadźviedzieva ŭ tym, što jon vyrvaŭ niejki skaz z kantekstu, ale ja nie pačuŭ, u miežach čaho heta było skazana. I ja nie pačuŭ druhuju pałovu frazy: «Zrazumieła, dapuścim, my pryznajem hetyja samaabvieščanyja respubliki, ale…» — i dalej pa tekście. Skažam, paśla taho, jak heta zrobiać… nu, vy razumiejecie.

Radyjo Svaboda: Nakolki vam, mahčyma, nie jak čynoŭniku, a jak analityku, padajecca zaraz imaviernym takoje pryznańnie, asabliva z ulikam źjaŭleńnia na biełaruskich teleekranach prezydenta Hruzii Michaiła Saakašvili?

Zimoŭski: Ja, pa ščyraści, nie razumieju, čamu źjaŭleńnie Saakašvili ŭ biełaruskim teleefiry vyklikaje ŭ niekaha trahičnyja notki ŭ hołasie i śmiarotnuju kryŭdu. Heta narmalna, kali kiraŭnik dziaržavy źjaŭlajecca na teleekranie toj kampanii, jakija pracavała ŭ jaho krainie. Naša telekampanija nieadnojčy źviartałasia z prośbaj ab interviju da kiraŭnikoŭ Rasiei. Heta było i kali Pucin staŭ premjeram, ja sam padpisvaŭ hetyja listy z prośbaj dać interviju biełaruskamu telebačańniu. Ale adkazu my nie atrymlivali. Ja nia baču tut nijakich kalizij — ni praŭnaha, ni emacyjnaha, ni maralnaha planu. Saakašvili taki ž prezydent, jak i ŭsie astatnija.

Radyjo Svaboda: Usio ž jaki adkaz na pytańnie: vam padajecca imaviernym, što Biełaruś zaraz pryznaje niezaležnaść Abchazii i Paŭdniovaj Asetyi? Ci, jak toj kazaŭ, heta rašeńnie, jakoje prymajecca adrazu ci nikoli?

Zimoŭski: Nie, ja miarkuju, što pytańnie pryznańnia Abchazii i Paŭdniovaj Asetyi składana źviazanaje z šeraham inšych pytańniaŭ. Usio budzie zaležać ad taho, ci źmienicca pazycyja Rasiei pa Kosavu. Kali Rasieja nie žadaje pryznavać niezaležnaść Kosava, jana nia maje prava patrabavać ad kahości ci namiakać, što treba pryznać jašče niešta.

Radyjo Svaboda: I, viartajučysia na pačatak našaj hutarki, da pytańnia, čamu raptam prezydent Miadźviedzieŭ vykazaŭ takoje mierkavańnie, čamu raspavioŭ pra «kuchniu» pieramovaŭ. Ci nia ličycie vy, što heta — element toj infarmacyjnaj vajny, jakoj, pavodle premjera Ŭładzimiera Pucina, niama?

Zimoŭski: Dyk heta ž Pucin skazaŭ. što infarmacyjnaj vajny niama, a Miadźviedzieŭ na hety kont ničoha nie kazaŭ. Ja dumaju, što jon nie źviazany takimi abaviazkami, ci jon nie taki daścipny čałaviek, jak Uładzimier Uładzimieravič.

• 0
• 0
• 0
• 0
• 0
• 0