Jakija źviestki pra nas zachoŭvaje Telegram i što moža źmianicca dla karystalnikaŭ, kali jon stanie raskryvać ich śpiecsłužbam?
Paśla taho, jak Pavieł Duraŭ pabyvaŭ u francuzskaj turmie, na aficyjnych resursach servisa vyjšła zajava pra źmieny va ŭmovach pracy. Ciapier miesiendžar budzie supracoŭničać z pravaachoŭnymi orhanami roznych krain i vydavać infarmacyju, jakuju jany zapytajuć.
Jakija źviestki ŭvohule zachoŭvaje telehram?
Samaje važnaje — heta pierapiski. Pryčym zachoŭvajucca ŭsie pierapiski, ale kiraŭnictva Telegram dekłaruje, što ŭ asnoŭnym u zašyfravanym vyhladzie.
U sakretnych čatach zašyfroŭka i rasšyfroŭka robicca na pryładach karystalnikaŭ, a voś da zvyčajnych čataŭ i supołak kiraŭnictva maje klučy, ale kaža, što nikomu ich nie vydaje. Spraŭdzić heta napeŭna niemahčyma, jak i ŭ vypadku sa mnohimi inšymi papularnymi sacsietkami dy miesiendžarami.
Telegram zachoŭvaje vašy telefonny numar dy kantakty, kali vy abrali ich sinchranizavać z prahramaj ci dadali ŭručnuju. Zachoŭvajucca i tyja kantakty, jakija nie dałučanyja da telehrama, kab vy mahli prapanavać im dałučycca.
Telegram zachoŭvaje IP-adrasy i pryłady, ź jakich vy znachodziciesia anłajn u telehramie. A taksama e-mail, abrany ŭ jakaści sposabu dla ŭznaŭleńnia parola dvuchfaktarnaj aŭtentyfikacyi.
Jašče zachoŭvajucca asnoŭnyja źviestki akaŭnta, jakija vy dadajecie ŭłasnaručna (imiony, imiony karystalnika, vaš dzień narodzinaŭ i hetak dalej).
Telegram dekłaruje, što zachoŭvaje ich nadziejna dy šyfruje, a ŭsie kampanii siervisa, jakija ich apracoŭvajuć, znachodziacca ŭ dvuch jurysdykcyjach — Dubai i Brytanskaj Virhinii. Abiedźvie krainy viadomyja jak afšornyja zony, dzie ciažka jurydyčna abhruntavać patrebu ŭ vydačy źviestak.
Jak raniej Telegram pieradavaŭ źviestki karystalnikaŭ śpiecsłužbam?
Jašče z 2018 hoda Telegram pryznavaŭ, što supracoŭničaje sa śpiecsłužbami. Ale zamiežnyja miedyja adznačali, što dla siłavikoŭ heta ŭjaŭlaje prablemu, bo źviestak pieradajecca zamała.
Pry hetym źjaŭlalisia paviedamleńni pra toje, što telehram vydaŭ źviestki ludziej ź Indyi, jakija publikavali piracki kantent, a taksama što jon pieradavaŭ źviestki niamieckim śpiecsłužbam.
Takim čynam realny abjom supracoŭnictva Telegram i śpiecsłužbaŭ nieviadomy.
Što źmianiłasia?
Pa słovach samoha Durava, śpiecsłužbam buduć pieradavacca telefonnyja numary i IP-adrasy ludziej, «jakija parušajuć zakon». Pry hetym jon śćviardžaje, što heta musić być dobra abhruntavany zapyt.
Taksama byŭ źmienieny punkt 8.3 palityki kanfidencyjnaści telehrama. Raniej miesiendžar kazaŭ, što pieradaje źviestki tolki padazravanych u teraryźmie. Ciapier ža tam skazana, što «kali Telegram atrymaje ad śpiecsłužbaŭ zapyt, jaki paćviardžaje, što vy padazravany pa kryminalnaj spravie, źviazanaj sa złačynnaj dziejnaściu, jakaja parušaje ŭmovy vykarystańnia Telegram, to my … možam raskryć vaš IP-adras i numar telefona śpiecsłužbam».
Abiacajecca i toje, što fakty pieradačy takich źviestak buduć adlustroŭvacca ŭ admysłovym bocie płatformy.
Što moža źmianicca dla biełarusaŭ?
Prynamsi zaraz małaimavierna, što Telegram stanie supracoŭničać sa śpiecsłužbami Biełarusi. Bolšaść hrošaŭ i klijentaŭ miesiendžara znachodziacca pa-za miežami krain byłoha SSSR uvohule i tym bolš pa-za miežami Biełarusi.
Zaŭvažym, što mnohija papularnyja zachodnija miesiendžary, siervisy i sacsietki (naprykład, Google, Facebook dy inšyja) z daŭnich časoŭ adkryta supracoŭničajuć sa śpiecsłužbami roznych krainaŭ i pišuć pra heta ŭ svaich adkrytych spravazdačach. Ale nieviadomyja vypadki, kab jany vydavali źviestki biełaruskich dysidentaŭ.
Što rabić, kab abaranić siabie ad mahčymaj niebiaśpieki?
Kali ŭjavić, što Telegram ź niejkaj pryčyny stanie pieradavać źviestki biełarusaŭ łukašysckim śpiecsłužbam, to abaranicca niaprosta. Tearetyčna vy možacie zarehistravać ananimny akaŭnt u Telegram i pastajanna karystacca VPN abo TOR, ale dla bolšaści karystalnikaŭ heta zanadta składana.
Takim čynam, možna abo pavieryć Telegram i nie rabić ničoha (u bolšaści vypadkaŭ my idziem na taki kampramis padčas karystańnia inšymi siervisami), abo vydalić akaŭnt i pačać karystacca inšym miesiendžaram.
Ahułam, dla čytańnia niezaležnych miedyja dy inšych niezaležnych krynicaŭ lepš karystacca VPN (abirajcie nadziejnyja) abo TOR.
Varta razumieć, što lubaja płatforma, jakoj vy karystajeciesia, źbiraje vašy źviestki ŭ tym ci inšym vyhladzie, i tearetyčna moža pieradać ich kamu zaŭhodna. Usio, što vy možacie z hetym zrabić: śviadoma staracca abirać tyja płatformy, jakim možna daviarać i bałansavać pamiž biaśpiečnaściu i zručnaściu vykarystańnia.
«Naša Niva» — bastyjon biełaruščyny
PADTRYMAĆMnohija VPN źbirajuć danyja i mohuć pieradać ich siłavikam. Raskazvajem, jak ad hetaha abaranicca
Jak čytać niezaležnyja ŚMI i nie padstaŭlacca — padrabiazny hajd
Jak ułasnymi rukami stvaryć VPN-siervier, jaki ciažka budzie zabłakavać — padrabiazny hajd
U Biełarusi błakujuć VPN. Što adbyvajecca i jak abyści błakavańnie?
Jakija źviestki pra nas zachoŭvaje Telegram i što moža źmianicca dla karystalnikaŭ, kali jon stanie raskryvać ich śpiecsłužbam?5
Kamientary
A jašče jość telefon. № taki-ta. I voś ja niadaŭna zadumaŭsia, kali, samo-saboj, nazvaŭ svoj telefon śpiec słužbie ZŠA i potym razmaŭlaŭ ź joj pa svajoj prablemie. Telefona DASTATKOVA, padumaŭ ja. Šmat vierahodna jon staić na viečnym zapisu na dysk i kali patrebien śpiec słužbie z taho zapisu dastajuć usio i pra ŭsio z hataha numaru. U tym liku maju razmovu z mošieńnikami, i ni siońnia dyk zaŭtra dakapajucca da ich.