Jak Ukraina zładziła zasadu na rasijskija samaloty z dapamohaj rakiet savieckich časoŭ
Arhanizacyja zasad dazvoliła vyvieści sa stroju rasijski fłot samalotaŭ-raźviedčykaŭ A-50 i stratehičny bambardziroŭščyk Tu-22M3.
Jak piša The Times, dla źniščeńnia rasijskich samalotaŭ dalokaha radyjołakacyjnaha vyjaŭleńnia i kiravańnia A-50 Siły abarony Ukrainy vykarystoŭvali sistemy Patriot i staryja savieckija rakietnyja kompleksy.
Detali apieracyi vydańniu raskryŭ vysokapastaŭleny aficer vajennaj raźviedki Ukrainy HUR. Pavodle jaho słoŭ, u mai 2022 hoda było pryniata rašeńnie adnavić kompleks S-200, jaki byŭ raspracavany šeśćdziesiat hadoŭ tamu dla źniščeńnia celaŭ na vialikich adlehłaściach i na vialikich vyšyniach. Dla hetaha znajšli śpiecyjalistaŭ-inžynieraŭ i aficeraŭ, jakija raniej ekspłuatavali hetyja zienitna-rakietnyja kompleksy.
Pieršy zapusk byŭ praviedzieny vosieńniu 2023 hoda. Jon akazaŭsia biezvynikovym z-za taho, što A-50 źmianiŭ trajektoryju palotu. Tym nie mienš heta pasłužyła kaštoŭnym urokam, asabliva dla kaleh z VPS Ukrainy, ź jakimi jany supracoŭničali.
«My padali prykład vajenna-pavietranym siłam, kab jany nie bajalisia, što pa ich buduć stralać. Pry pieršaj sprobie, kali my zapuścili dźvie rakiety, jany ŭbačyli, jak chutka my schavali puskavyja ŭstanoŭki i evakuiravalisia — nichto navat nie zaŭvažyŭ, dzie my znachodzilisia», — raspavioŭ vydańniu aficer HUR.
VPS pryniali vyklik i stali vykarystoŭvać niamieckija batarei Patriot, ustalavanyja na hruzavikach.
«Heta było vielmi ryzykoŭna, tamu što my pavinny byli padvieźci Patriot vielmi blizka da frontu. Heta radar, puskavaja ŭstanoŭka, krynica siłkavańnia, mašyna achovy. Heta piać ci šeść vialikich mašyn», — raskazaŭ padpałkoŭnik VPS Ukrainy.
14 studzienia 2024 hoda batareja ZRK zładziła zasadu na rasijski A-50, jaki lacieŭ nad Azoŭskim moram u pary z samalotam kamandnaha centra Ił-22 za 150 kiłamietraŭ ad linii frontu. Rasijanie byli pierakananyja, što znachodziacca ŭ zonie niedasiažnaści luboj naziemnaj pahrozy. U ich było mienš za dźvie chviliny, kab zreahavać, pierš čym rakiety nanieśli ŭdar. Samalot A-50 upaŭ u mora, a Ił viarnuŭsia na bazu z paškodžańniami.
Jak tolki Kreml zrazumieŭ, što samaloty A-50 uraźlivyja, jon advioŭ ich nazad z Azoŭskaha mora, za miežy dasiažnaści Patriot. Adnak jany ŭsio jašče zastavalisia ŭ miežach dasiažnaści sistemy S-200. Ź jaje dapamohaj 23 lutaha 2024 hoda byŭ źbity druhi rasijski A-50 — prykładna za 170 kiłamietraŭ ad linii frontu.
Padrabiaznaści inšaj apieracyi vydańniu raspaviała pałkoŭnik pamočnik načalnika štaba kamandavańnia supraćpavietranaj i supraćrakietnaj abarony 10-j armii ZŠA Razana Klemiente (Rosanna Clemente).
Pavodle jaje słoŭ, siły abarony Ukrainy vykarystoŭvali sistemu S-300 z uklučanym radaram jak prynadu i zamanili samaloty ŭ zonu dziejańnia Patriot.
«Jany z radaściu vylecieli źniščać S-300 i tut źjaviŭsia Patriot. Z šaści samalotaŭ dva byli źbity S-300, a čatyry — Patriot», — cytuje vydańnie słovy padpałkoŭnika VPS ZŠA.
19 krasavika 2024 hoda HUR znoŭ razharnuła svaju batareju S-200, na hety raz naceliŭšy jaje na rasijski stratehičny bambardziroŭščyk Tu-22M3. Samalot upaŭ nad Krasnahvardziejskim rajonam Staŭrapalskaha kraju, prykładna za 300 kiłamietraŭ ad frontu. U momant krušeńnia jon vykonvaŭ zadańnie pa zapusku kryłatych rakiet nad Ukrainaj. Maskva admaŭlaje, što samalot byŭ źbity, śćviardžajučy, što jon atrymaŭ techničnuju niaspraŭnaść.
«Z taho času jany źmianili dystancyju zapusku rakiet. My adahnali ich ad niekatorych celaŭ, jakija jany mahli b atakavać», — zaznačaje aficer HUR.
Pres-słužba AAN nazvała Cichanoŭskuju «prezident-elekt»14
Kamientary