Na prezidenckich vybarach u Charvatyi nivodny z kandydataŭ nie zdoleŭ nabrać bolš za 50% hałasoŭ
Dziejny kiraŭnik dziaržavy Zoran Miłanavič atrymaŭ 49% hałasoŭ. Jaho asnoŭny kankurent, pradstaŭnik kiroŭnaj kansiervatyŭnaj partyi Drahan Prymorac, nabraŭ 19,35%. Zaraz jany sustrenucca ŭ druhim tury 12 studzienia, piša Radyjo Svaboda.
Inšyja kandydaty, jakich na vybarach było vosiem, nie zmahli nabrać bolš za 10% hałasoŭ.
Charvatyja — parłamienckaja respublika, dzie bolšaść klučavych rašeńniaŭ prymaje premjer-ministr, u toj čas jak prezident vykonvaje funkcyju hałoŭnakamandujučaha ŭzbrojenymi siłami.
Miłanavič viadomy svajoj krytykaj vajennaj dapamohi Ukrainie. U pryvatnaści, jon zabaraniŭ navučańnie ŭkrainskich vajskoŭcaŭ na terytoryi Charvatyi.
Premjer-ministr Andrej Plenkavič nazyvaje jaho «prarasijskim palitykam» i śćviardžaje, što Miłanavič «źniščaje reputacyju Charvatyi ŭ NATO i ES». U adkaz na heta prezident zajaŭlaje, što imkniecca praduchilić «udzieł Charvatyi ŭ niepatrebnaj vajnie» i što va Ukrainie «suprać Rasii vajujuć ZŠA i NATO».
Drahan Prymorac — piedyjatr, sudovy ekśpiert, śpiecyjalist u halinie miedycynskaj hienietyki i ministr navuki, adukacyi i sportu Charvatyi ŭ 2003—2009 hadach.
Na hetych prezidenckich vybarach jon bałatavaŭsia jak niezaležny kandydat. Tym nie mienš, kansiervatyŭnaja partyja padtrymlivała jaho kampaniju, padčas jakoj Prymorac uskosna krytykavaŭ papulizm Miłanaviča.
Čynoŭniki prahavarylisia, što ŭ Biełarusi zastałosia tolki 8,8 miljona čałaviek? Heta niapravilnaja vysnova4
Kamientary