Paŭnočnaja Kareja pryznała praviadzieńnie publičnych pakarańniaŭ śmierciu
Na pasiedžańni AAN u Ženievie pradstaŭniki Paŭnočnaj Karei pryznali, što ŭ krainie pravodziacca publičnyja pakarańni śmierciu asudžanych.
Na abmierkavańni dakłada ab situacyi z pravami čałavieka ŭ krainie, členy paŭnočnakarejskaj delehacyi pryznali, što ŭłady karajuć śmierciu tych, chto ździejśniŭ vielmi ciažkija złačynstvy, i časam heta robicca publična, piša err.ee.
«U asnoŭnym śmiarotnaja kara pryvodzicca ŭ vykanańnie za začynienymi dźviaryma ŭ śpiecyjalna pryznačanym dla hetaha miescy. — skazaŭ staršynia Centralnaha suda KNDR Pak Kvan Cho. — Adnak byvajuć vyklučeńni. Heta vypadki, kali złačyniec u minułym nieadnarazova ŭčyniaŭ ciažkija złačynstvy, u tym liku zabojstvy, i znoŭ žorstka zabiŭ čałavieka, nie raskajvajučysia ŭ zroblenym. Rodnyja achviary mohuć patrabavać publičnaha pakarańnia».
Pravaabarončyja arhanizacyi abvinavačvajuć Pchieńjan u publičnych pakarańniach asudžanych, a ludzi, jakija ŭciakli z krainy, raspaviadajuć pra žudasnyja vypadki, kali katy paŭnočnakarejskaha režymu padviarhali asudžanych katavańniam, spalvali i niaviečyli ich cieły paśla śmierci, a taksama prymušali inšych hladzieć na heta.
Staršynia Centralnaha suda Pak taksama ŭskosna pryznaŭ isnavańnie ŭ krainie palityčnych źniavolenych, chacia Pchieńjan admaŭlajecca vykarystoŭvać hety termin.
«Tyja, chto ździejśniŭ złačynstvy suprać dziaržavy, — heta špijony i terarysty, zasłanyja varožymi siłami, a taksama tyja, chto ździejśniŭ padryŭnyja dziejańni z-za nianaviści da sacyjalistyčnaj sistemy, — skazaŭ Pak. — Takich źniavolenych niašmat, i jany ŭtrymlivajucca ŭ papraŭčych ustanovach, ale asobna ad zvyčajnych źniavolenych».
Zamiežnyja arhanizacyi, a taksama ŭrad ZŠA śćviardžajuć, što bolš za 100 000 čałaviek utrymlivajucca paŭnočnakarejskimi ŭładami ŭ łahierach dla palitviaźniaŭ.
Zialenski zajaviŭ pra pieršych zabitych sałdat KNDR na Kurščynie
Ministr abarony Ukrainy śćviardžaje pra pieršyja bajavyja sutyknieńni z paŭnočnakarejskimi vajskoŭcami
Źjaŭleńnie paŭnočnakarejskich vojskaŭ va Ukrainie — krok da Treciaj suśvietnaj?
Pierabiežčyki z Paŭnočnaj Karei prosiacca va Ukrainu, kab rasprapahandavać surodzičaŭ pa inšy bok frontu
Sudziać hiendyrektara BiełAZa. Pahražaje da 15 hadoŭ9
Kamientary