Padrabiazna pra źmieny pa piensijach — kamu i kolki buduć dapłočvać, jak ciapier atrymać vypłaty
U kancy kastryčnika byŭ padpisany ŭkaz «Ab sacyjalnaj padtrymcy». Dakumientam źniaty abmiežavańni pamieru piensii pracujučym piensijanieram, pavialičany termin padačy zajavy ab pryznačeńni piensii, źmienieny paradak vyznačeńnia zarobku dla vyličeńnia piensii, pašyrany katehoryi hramadzian dla atrymańnia piensii na pošcie.
Ekśpierty patłumačyli padrabiazna asnoŭnyja novaŭviadzieńni, piša Myfin.by.
Biez abmiežavańniaŭ dla pracujučych piensijanieraŭ
Jak paviedamiŭ namieśnik ministra pracy i sacyjalnaj abarony Valeryj Kavalkoŭ, asnoŭnaje novaŭviadzieńnie zakranuła pracujučych piensijanieraŭ i źniało abmiežavańnie na atrymańnie piensii dla ich.
— Na siońnia pracujučyja piensijaniery atrymlivajuć piensiju z abmiežavańniem indyvidualnaha kaeficyjenta zarobku ŭ 1,3. U Biełarusi pracuje kala 446 tys. piensijanieraŭ, jakija dasiahnuli piensijnaha ŭzrostu. Im vypłačvajecca i zarabotnaja płata, i piensija.
Abmiežavańnie pa pamiery piensii indyvidualna dla kožnaha i jano moža składać ad niekalkich da 500 rubloŭ pry maksimalnym stažy 40-45 hadoŭ u žančyn i mužčyn. Piensiju z abmiežavańniem atrymlivajuć siońnia 110 tys. pracujučych piensijanieraŭ.
Meta ŭkaza — pavyšeńnie piensij i vyrašeńnie kadravaha pytańnia. Jak čakajuć u Minpracy, źniaćcie abmiežavańniaŭ pryciahnie na rynak pracy jašče kala 10 tys. čałaviek.
Z 1 studzienia 2025 hoda piensija pracujučym piensijanieram budzie vypłačvacca ŭ poŭnym pamiery. Pryčym, jak adznačyła načalnik hałoŭnaha piensijnaha ŭpraŭleńnia Ministerstva pracy i sacyjalnaj abarony Alena Hamarava, pieraraźlik piensii adbudziecca ŭ aŭtamatyčnym režymie i padavać zajavy, albo inšyja dakumienty va ŭpraŭleńni pa sacabaronie nie treba.
Atrymać piensiju stanie praściej
Zhodna ź dziejučym zakanadaŭstvam prava na atrymańnie piensii nadychodzić u dzień naradžeńnia čałavieka, jaki dasiahnuŭ piensijnaha ŭzrostu. Jak patłumačyła Alena Hamarava, spraščajecca pracedura atrymańnia piensii ŭ častcy padačy dakumientaŭ. Z novaha hoda jany mohuć być padadzienyja za miesiac da dasiahnieńnia piensijnaha ŭzrostu abo na praciahu miesiaca paśla. Piensija budzie pryznačanaja z momantu nastupleńnia prava.
Akramia taho źmieny datyčacca paradku vymiareńnia zarobku.
— Ciapier zarobak źjaŭlajecca adnym z pakazčykaŭ, jaki ŭpłyvaje na sumu piensii. Siońnia zarobak biarecca za apošnija 30 hadoŭ stažu pracy. U 2000 hodzie my brali zarobak za 6 hadoŭ, ciapier — 30 hadoŭ. Ukazam fiksujecca hety 30-hadovy pieryjad.
Zarobak da 2003 hoda paćviardžajecca daviedkaj pracadaŭcy.
— Časta pracadaŭca likvidavany i nie zdaŭ dakumienty ŭ archiŭ, tamu dla vyličeńnia piensii pieryjad takoj pracy prymajecca z nulavym značeńniem. Čałavieku nieabchodna było źviartacca ŭ sud za vyznačeńniem zarobku. Va ŭkazie zamacavanaja miera, jakaja dazvalaje tyja pieryjady, za jakija nie zachavalisia źviestki ab zarobku, prapuścić i zamianić ich bolš rańnimi pieryjadami. Tym samym budzie źniataja nahruzka na sudy, jakaja była značnaja ŭ suviazi sa zvarotam našych hramadzian pa paćviardžeńni hetaha zarobku.
Piensija na pošcie
Śpikier taksama nahadała, što z 1 lipienia 2024 hoda ŭ Minsku, abłasnych centrach i rajonnych centrach piensijaniery atrymlivajuć piensiju praz banki. Vyklučeńni składajuć asoby, jakija starejšyja za 70 hadoŭ, invalidy I i II hrupy, asoby, jakija pražyvajuć u sielskaj miascovaści. Jany mohuć atrymlivać piensiju pa-raniejšamu na pošcie.
— My praanalizavali situacyi i padrychtavali prapanovy dla asobnych katehoryj, kab była mahčymaść atrymańnia piensij na pošcie, jak u kasie, tak i doma. Heta invalidy III hrupy, asoby, abmiežavanyja da samastojnaha pieramiaščeńnia, asoby, jakija ažyćciaŭlajuć dohlad dziciaci-invalida va ŭzroście da 18 hadoŭ i atrymlivajuć dapamohu, asoby, zarehistravanyja ŭ žyłym pamiaškańni ź invalidam.
Ukazam praduhledžvajecca miera, što inšyja katehoryi, jakija nie praduhledžanyja zakanadaŭstvam, mohuć atrymlivać piensiju na pošcie, ale samastojna apłačvać pasłuhi pošty. Pa słovach Aleny Hamaravaj, apłata składzie 0,7-0,9% u zaležnaści ad pamieru piensii.
Kamientary