Ziamlu na bierazie Čornaha mora atrymała kampanija, źviazanaja ź Viktaram Šejmanam.
Biełaruski rasśledavalnicki centr u sumiesnym rasśledavańni z «Biełpołam» i «Biełsatam» raskazvaje, što adbyłosia paśla vizitu Łukašenki ŭ Abchaziju.
Jak viadoma, u vieraśni 2022 hoda Alaksandr Łukašenka niečakana naviedaŭ Abchaziju i sustreŭsia ź jaje lidaram Asłanam Bžanija. Choć da hetaha jon zajaŭlaŭ, što pryznańnie Abchazii naniesła b škodu Minsku.
Na nastupny dzień paśla vizitu Kabiniet ministraŭ Abchazii zaćvierdziŭ pieradaču 20 hiektaraŭ ziamli na bierazie Čornaha mora kampanii «Žamčužyna 2010» pad inviestycyjny prajekt — budaŭnictva sanatorna-kurortnaha kompleksu. Płanavany abjom inviestycyj składaŭ 15 miljardaŭ rasijskich rubloŭ (amal $260 młn pa tahačasnym kursie). Hetaja suma pieravyšała hadavy biudžet Abchazii, jaki ŭ 2022 hodzie skłaŭ kala 13,3 miljarda rubloŭ.
Były achoŭnik Łukašenki i tajamničy abchaz
Jak vyśvietliŭ BRC, «Žamčužyna 2010» naležyć biełaruskamu pradpryjemstvu «Termalija» i hramadzianinu Abchazii Dato Kvicynii. Biełaruskuju kampaniju ŭ lipieni 2022 hoda za dva miesiacy da vizitu Łukašenki ŭ Abchaziju zarehistravaŭ na siabie były supracoŭnik słužby biaśpieki palityka Alaksandr Ramanoŭski.
Dato Kvicynija ŭ razmovie z žurnalistam BRC raskazaŭ, što jon nie kiruje kampanijaj i byŭ vykarystany tolki dla afarmleńnia dakumientaŭ. Jon taksama pryznaŭsia, što pieradaŭ hienieralnuju davieranaść na kiravańnie kampanijaj inšamu čałavieku — byłomu palavomu kamandziru padčas hruzinska-abchazskaha kanfliktu Zoryku Čkonija. Jak vyśvietlili žurnalisty, Dato Kvicynija plamieńnik Čkonii.
Zoryk Čkonija zajmaje pasadu staršyni pasiołka Kyndyh, dzie znachodzicca vydzieleny ŭčastak, i ŭvachodzić u niefarmalny kansultatyŭny orhan, ź jakim abchazski prezident Asłan Bžanija pravodzić narady pa važnych dla Abchazii pytańniach.
Žurnalisty taksama źviartajuć uvahu, što Čkonija i Bžanija — uradžency adnaho rajona — Ačamčyrskaha. Brat Zoryka — Nuhzar — u pačatku 1990-ch zasnavaŭ na termalnych krynicach u rajonie kurortny kompleks.
Pa infarmacyi žurnalistaŭ BRC, Nuhzara Čkoniju nazyvajuć davieranaj asobaj kryminalnaha aŭtaryteta pa mianušcy «Pałtava», jaki da 2017 hoda kantralavaŭ «abščak» u Adesie. Z hetym horadam źviazany i Viktar Šejman. Pad Adesaj naradziŭsia jaho syn, a ŭ samim horadzie praciahvajuć žyć svajaki jaho byłoj žonki.
«Žamčužyna» Šejmana
Žurnalisty BRC śćviardžajuć, što faktyčnym kiraŭnikom kampanii źjaŭlajecca nie Čkonija i nie Ramanoŭski, a Viktar Šejman i jaho ludzi. Pra heta śviedčyć pierapiska z aficyjnymi asobami Abchazii, jakuju BRC pieradaŭ «Biełpoł».
Tak, u adnym ź listoŭ za krasavik 2023 hoda ministr pa padatkach i zborach Abchazii nazyvaje kirujučym partnioram kampanii «Žamčužyna 2010» Mikałaja Sielivanava, jaki za 7 miesiacaŭ da hetaha zajmaŭ pasadu pieršaha namieśnika kiraŭnika spravami Łukašenki. Jaho niepasrednym načalnikam z 2013 pa 2021 hod byŭ Viktar Šejman.
Viktar Šejman sam nie zajmaje aficyjnych pasad z červienia 2021 hoda, adnak zastajecca važnaj fihuraj u biznes-prajektach, jakija źviazany z režymam Łukašenki.
Tak, u adnym z dakumientaŭ za krasavik 2023 hoda ministr zamiežnych spraŭ Abchazii nazyvaje Šejmana «śpiecyjalnym pradstaŭnikom prezidenta Biełarusi». Akramia taho, jon prysutničaŭ jak na sustrečy Łukašenki z Bžanija ŭ Abchazii ŭ 2022 hodzie, tak i padčas vizitu abchazskaha lidara ŭ Minsk u 2023 hodzie.
Budaŭnictva tak i nie pačałosia
U kastryčniku 2022 hoda, paśla vyłučeńnia ziamielnaha ŭčastka dla prajekta «Žamčužyna 2010», deputaty parłamienta Abchazii papiaredžvali, što, kali budaŭnictva nie pačniecca na praciahu troch hadoŭ, ziamla moža być adabranaja ŭ inviestara. Adnak na žnivień 2024 hoda ŭčastak zastavaŭsia nieasvojenym. Jak patłumačyli BRC u kampanii «Abchazskija prajekty», prajekt farmalna moža ličycca pačatym pry minimalnych dziejańniach, naprykład, ustalavańni aharodžy.
Niahledziačy na adsutnaść realnych budaŭničych rabot, inviestary praciahvajuć płacić padatki na ziamlu, što pakazvaje na ich namier utrymać učastak. Što kankretna źbirajucca rabić z učastkam Šejman i jaho ludzi, BRC vyśvietlić nie atrymałasia. Žurnalisty źviartajuć uvahu, što košt ziamli, raźmieščanaj na bierazie Čornaha mora, moža dasiahać miljonaŭ dalaraŭ, što robić hety ŭčastak vielmi kaštoŭnym aktyvam.
Rasija dabivajecca, kab Abchazija dazvoliła masavaje pierasialeńnie tudy rasijan. Dla hetaha spyniła vypłatu zarobkaŭ abchazam
Prezident samaabvieščanaj Abchazii zajaviŭ, što zacikaŭleny va ŭstupleńni ŭ Sajuznuju dziaržavu. Ale pry ŭmovie
U Abchazii pieradača dziaržaŭnaj dačy pad rezidencyju Pucinu vyklikała biesparadki
Kamientary