Najbujniejšy bank Vialikabrytanii spyniŭ absłuhoŭvańnie klijentaŭ ź Biełarusi
Najbujniejšy bank Vialikabrytanii HSBC spyniŭ apracoŭku ŭsich płaciažoŭ ź Biełarusi i Rasii dla pryvatnych klijentaŭ. Klijentam paraili šukać «alternatyŭnyja schiemy» pieravodaŭ i płaciažoŭ, paviedamiła ahienctva Reuters.
U infarmacyjnym liście kampanii ad 12 listapada 2024 hoda, jaki źjaviŭsia na aficyjnym sajcie adździaleńnia HSBC u Tajvani, klijentaŭ papiaredžvajuć pra mahčymyja ciažkaści pry praviadzieńni płaciežnych apieracyj, prapanavaŭšy šukać «alternatyŭnyja schiemy» bankaŭskich raźlikaŭ.
«My pryniali rašeńnie spynić apracoŭku płaciažoŭ u/z Rasii i Biełarusi. Lubyja płaciažy, praviedzienyja praz HSBC z udziełam Rasii ci Biełarusi, mohuć być zatrymanyja dla dalejšaj pravierki i mohuć pavodle našaha vyklučnaha i absalutnaha mierkavańnia być adchilenyja, a srodki viernutyja», — papiaredzili ŭ banku.
Hongkong and Shanghai Banking Corporation (HSBC) ličycca adnym z najbujniejšych finansavych kanhłamierataŭ u śviecie i najbujniejšym bankam Vialikabrytanii pa pamiery aktyvaŭ i rynkavaj kapitalizacyi. Z 2011 hoda jon uvachodzić u lik hłabalna sistemna značnych bankaŭ, jaho adździaleńni adkrytyja ŭ 67 krainach śvietu, a klijentami ŭstanovy, pa padlikach kampanii, źjaŭlajucca 39 młn čałaviek.
Niahledziačy na ŭviedzienyja Vialikabrytanijaj i ES ekanamičnyja sankcyi suprać Biełarusi, HSBC praciahvaŭ absłuhoŭvać karparatyŭnych klijentaŭ u Biełarusi i Rasii až da vosieni 2023 hoda. Adnak z 27 kastryčnika ŭsie tranzakcyi karparatyŭnych klijentaŭ byli spynienyja, a ciapier čarha dajšła i da pryvatnych bankaŭskich apieracyj.
Restaŭracyi ŭ Biełarusi zastałosia na try dni. Hałoŭnamu pradpryjemstvu krainy faktyčna padpisali śmiarotny prysud2
Kamientary
Ci tolki šarahovyja biełarusy rasijanie pad " pilnym vokam"?)))