Spačatku nazyvali 5000 jeŭra, a potym stała 7500. Kolki płaciać biełarusy za dastaŭku aŭto z Kłajpiedy ŭ Minsk alternatyŭnymi šlachami
Zrazumieŭšy, što litoŭskaja mytnia nie źbirajecca iści na sastupki, biełarusy, čyje aŭtamabili zachraśli ŭ Kłajpiedzie, praciahvajuć vyvozić ich u Biełaruś alternatyŭnymi šlachami. Pacikavilisia, kolki kaštuje dastaŭka transpartu, jaki znachodzicca ad Biełarusi na adlehłaści mienš za 400 kiłamietraŭ.
Nie tolki praz Hruziju
U telehram-čacie, jaki abjadnoŭvaje aŭtaamataraŭ, čyja technika zachrasła ŭ Kłajpiedzie, naličvajecca bolš za try tysiačy ŭdzielnikaŭ. Siarod ich jość jak tyja, chto tolki čakaje adpraŭki, tak i tyja, čyja technika znachodzicca na šlachu abo ŭžo dabrałasia da Minska. Apošnija dzielacca, kolki zapłacili za dastaŭku alternatyŭnym šlacham.
Samy tanny z ahučanych varyjantaŭ — 4700 jeŭra za dastaŭku, plus 450 jeŭra za partovyja pasłuhi ŭ Kłajpiedzie.
Takuju sumu ahučvaje čałaviek, čyj aŭtamabil z Kłajpiedy ŭ Minsk dastavili praź Niderłandy (Roterdam) i Rasiju (Sankt-Piecierburh).
Inšy karystalnik u adkaz napisaŭ, što heta vielmi dobraja cana, bo jahony elektramabil pa tym ža maršrucie dastavili ŭ Minsk za 5700 jeŭra, choć pačatkova ahučvali sumu ŭ 5500 jeŭra.
Miarkujučy pa paviedamleńniach, pa maršrucie Litva-Niderłandy-Rasija było dastaŭlena niamała mašyn.
Vyhladaje, što ličba 5500 jeŭra za dastaŭku davoli papularnaja, ale niekatoryja nazyvajuć bolš vysokija ličby — pa 6000 jeŭra tolki za dastaŭku praz Hruziju, biez uliku prastoju ŭ Litvie.
Tak, naprykład, adzin z karystalnikaŭ zapłaciŭ za dastaŭku BMW x5 praz Hruziju ŭ Minsk 7500 dalaraŭ, plus prastoj u Kłajpiedzie — 750 jeŭra.
Aproč rascenak na dastaŭku, karystalniki dzielacca sumami, jakija nabiehli za prastoj u porcie Kłajpiedy.
Sumy roznyja, mnohim za prastoj daviałosia zapłacić bolš za 1000 jeŭra, a ŭ niekatorych navat kala 1500 jeŭra.
Niekatoryja praciahvajuć čakać
Praz toje, što dastaŭka alternatyŭnymi maršrutami — heta dadatkovyja 4000-5000 jeŭra, častka ludziej vybiraje varyjant pačakać, pakul mašynie spoŭnicca 5 hadoŭ. Tady dla afarmleńnia tranzitu litoŭskaja mytnia pierastanie patrabavać dekłaracyju ad vytvorcy.
Nahadajem, što ciapier Litva afarmlaje tranzit i vypuskaje ŭ Biełaruś tolki tyja aŭto z ZŠA, jakija adpaviadajuć nastupnym kryteryjam:
- mašyny z abjomam ruchavika da 1,9 litra niezaležna ad uzrostu aŭto;
- starejšyja za 5 hadoŭ aŭto niezaležna ad abjomu ruchavika;
- elektramabili i hibrydy, starejšyja za 5 hadoŭ.
Pieršaja vice-mer Minska Nadzieja Łazarevič prajšła praz zatrymańnie, muž zastaŭsia ŭ SIZA11
Kamientary