Bielhijski prync asabista pryvioz pikap dla Pałka Kalinoŭskaha
Dyjaspara biełarusaŭ Bielhii i «Misija Ihara Vitenka» nabyli pikap dla Pałka Kalinoŭskaha. Pryvioz jaho asabista bielhijski prync Mišel de Lińje, a kalinoŭcy zabrali aŭtamabil z ukrainskaha zamka, paviedamlaje Połk.
9 vieraśnia ŭ maleńkim horadzie Zbaraž Ternopalskaj vobłaści Ukrainy adbyłasia ŭračystaść: u haradskim zamku vałanciory pieradali mašyny chutkaj dapamohi ŭkrainskim špitalam i vajskovym padraździaleńniam, a Pałku Kalinoŭskaha — pikap i FPV-drony.
Arhanizacyja, dziakujučy jakoj usio adbyłosia — «Misija Ihara Vitenki». Heta NKA, jakaja padtrymlivaje Ukrainu, źbirajučy achviaravańni na nabyćcio miedycynskaha abstalavańnia, humanitarnaj dapamohi i inš. Ihar Vitenka — ukrainski chirurh. Jon 25 hadoŭ žyŭ u Bielhii, adnak adrazu paśla pačatku poŭnamaštabnaj vajny viarnuŭsia va Ukrainu, kab lačyć paranienych. Paźniej jon zasnavaŭ vyšejzhadanuju misiju, dziakujučy jakoj va Ukrainu ŭžo dastavili vialikuju kolkaść aŭtamabilaŭ. A dziakujučy biełaruskaj dyjaspary ŭ Bielhii dapamohu ŭžo druhi raz atrymali i my.
Pikap — heta dobra. Ale pryčym tut bielhijski prync?
Miesca sustrečy było abranaje nie vypadkova. Niekalki stahodździaŭ tamu horad Zbaraž i bližejšyja vioski naležali bielhijskamu Domu Liń. Heta adzin z najstaražytnych dvaranskich rodaŭ Bielhii, zhadki pra jaki ŭ histaryčnych krynicach sustrakajucca z XII stahodździa. Zbaražski zamak, dzie i prajšła ŭračystaść, taksama, zrazumieła, niekali naležaŭ Domu Liń.
Prync Mišel de Lińje, zhadany ŭ pačatku hetaj historyi — spadčyńnik Doma Liń. Jamu 73 hady i jon užo 14-y prync hetaha Domu. Heta pieršy jahony vizit va Ŭkrainu ŭ ramkach humanitarnaj misii. Prync Mišel maje značny ŭpłyŭ na bielhijskuju palityku pa dapamozie Ukrainie, a Dom Liń u naš čas — adna z samych upłyvovych siemjaŭ u Bielhii.
Jak patłumačyła ŭdzielnica misii, biełaruskaja vałanciorka Halina Maciušyna, prync daŭno žadaŭ naviedać Zbaražski zamak. I hetaja mahčymaść źjaviłasia, ale faktyčna vypadkova: u prynca Mišela i Ihara Vitenki znajšoŭsia ahulny siabar, jaki ich i paznajomiŭ. Hety siabar — bielhijski hraf, jaki sam nieadnarazova dapamahaŭ Ukrainie.
Dalej padziei raźvivalisia chutka: spačatku kiraŭnik Zbaražskaj terytaryjalnaj abščyny Raman Palikroŭski razam z delehacyjaj naviedaŭ rezidencyju Doma Liń u Bielhii. A zaraz užo sam prync Mišel de Lińje prybyŭ va Ukrainu.
Jechaŭ prync na mašynie, hrošy na jakuju sabrała dyjaspara biełarusaŭ Bielhii i «Misija Ihara Vitenka». Kiroŭcam byŭ siabar prynca baron Biernard de Hieršalem. Voś i atrymlivajecca, što pikap dla Pałka Kalinoŭskaha dastaviŭ asabista bielhijski prync i baron.
Va ŭnutranym dvary zamka ŭ jakaści hanarovaj varty stajać navučency Ternopalskaha vajskovaha Kaledža. Pobač raźmiaściŭsia nievialiki arkiestr. Kala centralnaha ŭvachodu ŭ zamak vystaŭleny mašyny, a pobač ź imi znachodziacca ŭdzielniki misii, miascovyja pasadoŭcy i hości. Sam zamak adrestaŭravany ŭ 2019-m i za jaho stanam vidavočna sočać. Za stahodździ jon niekalki razoŭ pierabudoŭvaŭsia, a ŭ savieckija časy pryjšoŭ u zapuścieńnie. A zaraz sustrakaje naščadka byłych haspadaroŭ.
Pierad pačatkam mierapryjemstva ŭ nas adbyłasia adna niečakanaja sustreča. Da kamandzira Pałka Kalinoŭskaha «Dziadźki» padyšoŭ pryvitacca miascovy katalicki śviatar. Śviatar ubačyŭ bieł-čyrvona-bieły patč na plačy Paŭła Šaurmieja dy mocna zaradavaŭsia, kali ŭpeŭniŭsia, što my biełarusy. U hutarcy vyśvietliłasia, što ajciec David u 2000-ch hadach słužyŭ u Sanktuaryi horada Budsłaŭ, što znachodzicca ŭ Mienskaj vobłaści. Sam jon ukrainiec, ale lubić i pavažaje Biełaruś. Pra Połk Kalinoŭskaha viedaŭ niamała i byŭ mocna ździŭleny, kali zrazumieŭ, što havoryć z kamandziram padraździaleńnia. My krychu parazmaŭlali, abmianialisia ŭspaminami pra Budsłaŭski Fest i adpravilisia dalej.
Padčas samoha mierapryjemstva ŭkrainskim vajskoŭcam i miedykam było pieradadziena try aŭtamabili chutkaj dapamohi, napoŭnienyja miedycynskim abstalavańniem. Dva ź ich adrazu adpraviacca na front, a adzin da miascovaj TRA. Pałku Kalinoŭskaha pieradali pikap i 7 FPV-dronaŭ. Ahułam heta ŭžo soty aŭtamabil, pieradadzieny Ukrainie z pačatku poŭnamaštabnaj vajny ŭ ramkach humanitarnaj «Misii Ihara Vitenki».
Tak a što za pikap?
Pikap Nissan Navara. Heta ŭžo druhi raz, kali biełaruskaja dyjaspara Bielhii nam dapamahaje. U traŭni hetaha hoda jany taksama, sumiesna z «Misijaj Ihara Vitenki», pieradali nam pikap i drony.
Užo viarnuŭšysia sa Zbaraža my vyjavili, što ŭnutry pikapa nas čakaŭ jašče adzin siurpryz: biełaruskaja dyjaspara Bielhii pieradała Pałku Kalinoŭskaha niekalki karobak z padarunkami.
Połk imia Kastusia Kalinoŭskaha vykazvaje svaju padziaku kožnamu, chto dapamahaje nam. Vaš układ u ahulnuju spravu važlivy i tolki razam my zmožam pieramahčy!
Kola Łukašenka syhraŭ na rajali na «Dni narodnaha adzinstva». Jaho tata pierad hetym pryhraziŭ Treciaj suśvietnaj vajnoj11
Kamientary