Ułaśnik aŭto, jakoje pravaliłasia pad ziamlu ŭ Babrujsku, raskazaŭ, ci vypłacili jamu kampiensacyju za heta
«Nu i što ciapier, na vulicu nie vychodzić», — pa-fiłasofsku zaŭvažaje babrujčanin Alaksandr. Heta jaho aŭtamabil pieršym vosieńskim dniom pravaliŭsia pad ziamlu na parkoŭcy kala doma №197 pa Sacyjalistyčnaj. Niepryjemnyja ŭražańni ab tym, što zdaryłasia, jašče śviežyja ŭ jaho pamiaci, piša «Viačerni Babrujsk».
Na złaščasnuju stajanku Alaksandr pryjechaŭ nie adzin. U sałonie Renault Espace znachodziłasia ŭsia jaho siamja: na piarednim siadzieńni — žonka, na zadnim šerahu raźmiaścilisia dzieci — 6-hadovy syn i 16-hadovaja dačka.
— Usioj siamjoj pryjechali ŭ kafe «Atmaśfiera», kab pajeści sušy, — kaža surazmoŭca. I praciahvaje: — Pačaŭ parkavacca, jak tut ža pravaliłasia piaredniaje levaje koła. Vyhlanuŭ u akno i ŭbačyŭ jamu biez dna. Svaim blizkim skazaŭ chutka adšpilicca i vyjści z mašyny. Usie vyjšli. Vyklikaŭ DAI.
Pa słovach Alaksandra, supracoŭnik Dziaržaŭtainśpiekcyi źviazaŭsia z pradstaŭnikom «Vodakanała», toj apieratyŭna prybyŭ na miesca. Tudy ž pryjechała i «Niva», z dapamohaj jakoj i pasprabavali adbuksiravać «Reno» ad niebiaśpiečnaha miesca. Jakraz u hety čas miniven i syšoŭ pad ziamlu.
— Ad momantu, kali my pryjechali, da abvalvańnia hruntu prajšło prykładna paŭhadziny, — raspaviadaje Alaksandr.
Uvieś hety čas siamja znachodziłasia pobač. Nieabyjakavyja haradžanie, kaža surazmoŭca, jak mahli, sprabavali supakoić žonku i dziaciej. Čullivaja žančyna pryniesła vady z valarjankaj.
Mašyna praviała ŭ ziamli amal try hadziny. Jak kaža Alaksandr, amal usie kuzaŭnyja elemienty paciarpieli: parohi, dźviery, uvieś levy bok, škło, dach.
— Bolš za ŭsio dastałasia frantalnaj častcy — raźbityja i pakamiačanyja piaredni bampier, kapot, fary, — pieraličvaje paškodžańni ŭładalnik.
Ruchavik zapuskajecca, ale svaim chodam miniven jedzie ź ciažkaściu. Ad padzieńnia i ŭdaru paciarpieła i chadavaja častka: mašynu viadzie ŭbok.
Na nastupny dzień babrujčanin źviarnuŭsia ŭ kampaniju, dzie zastrachavanaja jaho hramadzianskaja adkaznaść jak kiroŭcy.
— Adkazali, što niestrachavy vypadak. Kali b «kaska», tady možna było b raźličvać na kampiensacyju, — kaža ŭładalnik.
Z surazmoŭcam źviazaŭsia i pradstaŭnik «Vodakanała»:
— Paviedamili, što buduć zakazvać ekśpiertyzu ŭ handlova-pramysłovaj pałacie. Da ekśpiertyzy nijakaha ramontu rabić nielha. Kali jaje praviaduć — nieviadoma. Jak pa mnie, tak najbolš spraviadlivym rašeńniem była b poŭnaja vypłata mnie koštu aŭtamabila, a mašynu «Vodakanał» chaj by zabraŭ sabie.
Pakul Alaksandr i jaho blizkija jeździać na aŭtamabili, jaki naležyć žoncy.
Svoj Renault Espace 4 2003 hoda vypusku Alaksandr kupiŭ u 2010 hodzie. Sam pryhaniaŭ ź Litvy. Za hety čas na dyzielnym minivenie babrujčanin prajechaŭ kala 200 tysiač kiłamietraŭ. Hetym letam siamjoj jeździli na aŭto ŭ Sočy. Mašyna ŭ darozie nie padviała.
Bort Łukašenki z-za techničnych prablem viarnuŭsia ŭ Minsk bieź jaho16
Kamientary
=====
My za vas radyja