«Rasiejcy vyhrabli ŭsie visiaki». Što adbyvajecca na aŭtamabilnym rynku Biełarusi paśla ŭviadzieńnia novych sankcyj
Biełaruś stračvaje status chaba. Na aŭtarynku «Malinaŭka» ŭ Minsku ź miesiac tamu pačali źjaŭlacca pustyja miescy, choć da abmiežavańniaŭ takoha nie było.
Niama taho, što raniej było
Prajšło kala dvuch miesiacaŭ, jak ź Jeŭropy ŭ Biełaruś nielha lehalna vyvieźci aŭtamabili z abjomam ruchavika bolšym za 1,9 litra, hibrydy i elektramabili. Praz novyja abmiežavańni ceny na padsankcyjnyja aŭtamabili vyraśli, a vybar skaraciŭsia.
«Pradaŭcy, jakija paśpieli ŭvieźci ŭ Biełaruś mašyny z abjomam ruchavika, bolšym za 1,9 litra, ciapier, jak praviła, nie hatovyja rabić źnižki. Niekatoryja navat pierapisali ceńniki, kali zrazumieli, što novych pastavak užo nie budzie», — kaža pierahonščyk.
Ź jaho słoŭ, mašyny ź Jeŭropy praz Turcyju ŭ Biełaruś kali i viazuć, to heta, jak praviła, tyja aŭtamabili, jakija nabyli ŭ Jeŭropie jašče da abmiežavańniaŭ, ale nie paśpieli vyvieźci.
«Dastaŭka alternatyŭnymi maršrutami — darahaja i davoli niebiaśpiečnaja zaduma. Cana mašyny ŭzrastaje minimum na 5-7 tysiač jeŭra.
Plus uźnikajuć dadatkovyja ciažkaści pry kupli, bo mnohija firmy-prakładki, jakija da ŭviadzieńnia abmiežavańniaŭ pierapradavali mašyny na Biełaruś, nie chočuć źviazvacca z padobnymi schiemami, bo aścierahajucca nastupstvaŭ», — kaža surazmoŭca.
Biełaruskija pierahonščyki rasiejcam bolš niepatrebnyja?
Dastaŭka mašyn ź Jeŭropy ŭ Biełaruś praz Turcyju i Hruziju nie zajmieła vialikaj papularnaści ŭ tym liku praz toje, što ich ciapier praściej dastaŭlać adrazu ŭ Rasiju.
«Bolšaja častka mašyn premijalnaha siehmientu pierapradavałasia na Rasiju. Tamu niama asablivaha sensu dastaŭlać ich alternatyŭnym šlacham u Biełaruś, kab potym ź Biełarusi dastaŭlać u Rasiju», — tłumačyć pierahonščyk.
Ź jaho słoŭ, rasiejcy ciapier voziać darahija aŭto ź Jeŭropy biez dapamohi biełarusaŭ. Ich zamianili hramadzianie Hruzii, Kazachstana, Uźbiekistana, Kyrhyzstana abo Armienii.
Padsankcyjnyja aŭto ŭ deficycie
Praz toje, što aŭto z abjomam ruchavika, bolšym za 1,9 litra, ciapier amal nie traplajuć u Biełaruś, na rynku pačaŭ naziracca ich deficyt.
«Na aŭtarynku «Malinaŭka» ź miesiac tamu pačali źjaŭlacca pustyja miescy, choć da abmiežavańniaŭ takoha nie było. Rasiejcy nie spynialisia jechać da nas pa aŭto. U vyniku jany chutka vyhrabli ŭsie «visiaki», jakija ludzi doŭha nie mahli pradać».
Biznesmien ličyć, što bolšaja častka śviežapryhnanych «padsankcyjnych» mašyn, jakija paśpieli pryvieźci ŭ Biełaruś da ŭviadzieńnia abmiežavańniaŭ, užo pradadzienyja.
«Ciapier siarod mašyn z matorami, bolšymi za 1,9 litra, u asnoŭnym zastalisia varyjanty paśla surjoznych DTZ abo sa skručanym prabieham. Jašče adna katehoryja — mašyny z nastolki zavyšanym prajsam, što jany prosta nie cikavyja pakupnikam i pierakupam z Rasii.
Kali ŭ prodaž traplaje hodny varyjant pa adekvatnaj canie, to jon chutka pradajecca», — zapeŭnivaje pierahonščyk.
Mužčyna adznačaje, što ŭsie hetyja źmieny ŭ pieršuju čarhu zakranuli mienavita tych, chto śpiecyjalizavaŭsia na pryhonie darahich mašyn.
«Tyja, chto pracavaŭ u «narodnym» siehmiencie (aŭto koštam ad 10 da 20 tysiač dalaraŭ), paciarpieli mienš. Mašyny ź Jeŭropy praciahvajuć pryhaniać, ale tolki adnosna tannyja i z abjomam da 1,9 litra. Taksama pryvoziać davoli šmat «nieprachadnych» mašyn (starejšych za 5 hadoŭ).
Dziesiacihodki ŭ asnoŭnym karystajucca popytam mienavita siarod biełaruskich pakupnikoŭ. U takim siehmiencie ŭsio stabilna, bo našy ludzi majuć patrebu ŭ takich aŭto».
Taksama surazmoŭca adznačaje, što paśla ŭviadzieńnia novych abmiežavańniaŭ niekatoryja hulcy pačynajuć vychodzić z aŭtapryhonnaha biznesu.
«Tym, chto zajmaŭsia mašynami za 50-100 tysiač, nie cikava pryhaniać śviežyja małalitražki abo 10-hodki ź Litvy. Na ich možna zarabić 1000, maksimum 1500 dalaraŭ, a na premijalnych aŭto jany zarablali pa 5-10 tysiač z mašyny», — pryznajecca mužčyna.
Sa Štataŭ praz Hruziju
Surazmoŭca, jaki zajmajecca prodažam mašyn sa Štataŭ, taksama adznačaje, što vybar mašyn krychu pamienšaŭ, bo mnohija mašyny zachraśli ŭ Kłajpiedzie, a staryja zapasy pakrychu raskuplalisia.
Mužčyna ličyć, što dastaŭlać mašyny praz Hruziju nie tak vyhadna, jak heta było ŭ vypadku ź Litvoj.
Pierahonščyk miarkuje, što za padsankcyjnymi aŭto sa Štataŭ rasiejcy ciapier buduć jeździć achvotniej u Hruziju, čym u Biełaruś.
«Hruziny ŭ adroźnieńnie ad biełarusaŭ zastanucca ŭ vyjhryšy. Ciapier uvieś trafik mašyn z abjomam ruchavika, bolšym za 1,9 litra, idzie praź ich krainu. Tamu rasiejcy, prynamsi pa padsankcyjnyja mašyny, buduć vymušany pieraklučycca na Hruziju».
Surazmoŭca ŭpeŭnieny, što ŭ Hruzii znojdziecca šmat achvotnych padzarabić na hetym, choć farmalna Hruzija jašče letam 2023 hoda zabaraniła reekspart u Rasiju i Biełaruś transpartnych srodkaŭ, impartavanych z ZŠA.
Tamu ŭ padobnych schiemach nie abyścisia biez udziełu pamočnikaŭ z takich krain, jak Azierbajdžan, Kyrhyzstan ci Kazachstan.
Praź Litvu, a značyć i praź Biełaruś, z ZŠA praciahnuć dastaŭlać tolki mašyny z abjomam ruchavika da 1,9 litra. A heta znoŭ ža jaŭna nie premium siehmient.
Vyhladaje, što praz novyja sankcyi ES Biełaruś stracić status chaba na šlachu sankcyjonnych aŭto ź Jeŭropy i ZŠA ŭ Rasiju. Najbolš vierahodna, što hetuju rolu, choć i ŭ mienšaj stupieni, ciapier budzie vykonvać Hruzija.
Kamientary
Nu vsie,tiepieŕ na zavod pojdut!