Hrodzienskaha žurnalista Uładzimira Chilmanoviča zavočna asudzili na piać hadoŭ i dali hihancki štraf
Spravu ŭ paradku śpiecvytvorčaści raźbiraŭ Hrodzienski abłasny sud. Žurnalista źvinavacili pavodle dvuch artykułaŭ Kryminalnaha kodeksa: u sadziejničańni ekstremisckaj dziejnaści i va ŭdziele ŭ ekstremisckim farmiravańni, piša BAŽ.
![](http://d3kcf2pe5t7rrb.cloudfront.net/img/w840d4webp1/photos/z_2024_08/3e37a6db-ce4d-49bd-8870-7b6ab2656c28_mw1024_s_n-lsq97.jpg.webp)
Sudździa Ihar Sobaleŭ pastanaviŭ pryznać Uładzimira Chilmanoviča vinavatym u sadziejničańni ekstremisckaj dziejnaści i na padstavie častki 1 artykuła 361—4 KK pryznačyć za heta pakarańnie ŭ vyhladzie 2 hadoŭ pazbaŭleńnia voli.
Taksama žurnalist pryznany vinavatym u inšym sadziejničańni ekstremisckaj dziejnaści, učynienaj paŭtorna, i pakarany za heta tryma hadami pazbaŭleńnia voli sa štrafam 600 bazavych vieličyń (24000 rubloŭ).
Pavodle častki 3 artykuła 361—1 KK sud pryznaŭ Chilmanoviča vinavatym va ŭvachodžańni ŭ skład ekstremisckaha farmiravańnia ŭ metach učynieńnia złačynstva ekstremisckaj nakiravanaści. Na padstavie hetaha jamu prysudžana pakarańnie ŭ vyhladzie 3 hadoŭ pazbaŭleńnia voli sa štrafam 500 bazavych vieličyń (20 000 rubloŭ).
Pa sukupnaści złačynstvaŭ šlacham častkovaha składańnia pryznačanych asnoŭnych i dadatkovych pakarańniaŭ kančatkova Uładzimiru Chilmanoviču pryznačana pakarańnie ŭ vyhladzie pazbaŭleńnia voli na 5 hadoŭ z adbyćciom u papraŭčaj kałonii va ŭmovach uzmocnienaha režymu sa štrafam 1000 bazavych vieličyniaŭ (40 000 rubloŭ).
Termin adbyćcia prysudu abvinavačanamu budzie adličvacca sa dnia jaho faktyčnaha zatrymańnia. Na siońnia žurnalist znachodzicca ŭ zamiežžy i pryjazdžać u Biełaruś bližejšym časam nie płanuje.
U sudovaj pastanovie pa spravie Uładzimira Chilmanoviča, apublikavanaj na sajcie Viarchoŭnaha suda, ničoha nie havorycca pra sutnaść abvinavačańnia. Adno što siarod rečavych dokazaŭ zhadanyja «skrynšoty aŭtarskaha błoha z artykułami Chilmanoviča», jakija sud pastanaviŭ «zachoŭvać z materyjałami kryminalnaj spravy».
Samamu Uładzimiru Chilmanoviču taksama dahetul nieviadoma, za što kankretna jaho asudzili.
«Vidavočna, što za maju prafiesijnuju dziejnaść, ale pracu na jaki kankretna infarmacyjny internet-resurs pastavili mnie ŭ vinu, dakładna skazać nie mahu», — prakamientavaŭ žurnalist siońniašni vierdykt Hrodzienskaha abłsuda.
Pavodle sudovaha vyraku, zdymajecca aryšt ź ziamielnaha ŭčastka ŭ Pareckim sielsaviecie Hrodzienskaha rajona i z kvatery, jakaja naležyć žoncy Chilmanoviča.
Ale inšuju aryštavanuju majomaść, u tym liku kvateru žurnalista ŭ Hrodnie i pobytavuju techniku, vyrašana pradać dziela kampiensacyi hrašovych spahnańniaŭ, nakładzienych sudom. Na tyja ž mety pojduć i hrašovyja srodki ŭ sumie 100,12 EUR, zabranyja śledčymi padčas pieratrusu.
Pra toje, što suprać jaho zaviedzienaja kryminalnaja sprava, Uładzimir Chilmanovič daviedaŭsia naprykancy listapada 2023 hoda. Tady siłaviki apisali majomaść pa miescy jaho rehistracyi ŭ Hrodnie. Jašče praz tydzień byŭ praviedzieny pieratrus u kvatery žonki Uładzimira, dzie jon žyŭ z 2014 pa 2021 hod. Adtul zabrali pracesar kampjutara, staroje paśviedčańnie, 25 knih, muzyčny dysk, paštovyja marki, kanvierty, paštoŭki, buklety, znački, haziety. Taksama apisali pobytavuju techniku.
Na toj čas Uładzimir Chilmanovič užo dva z pałovaj hady nie žyŭ u Biełarusi.
-
«Ci nie zašmat vy na siabie ŭziali?» Cichanoŭskaja adkazała na vostryja pytańni pra status Nacyjanalnaj lidarki
-
«Vialiki čałaviek dla biełarusaŭ». Łukašenku paprasili nazvać vulicu ŭ Minsku ŭ honar savieckaha maršała
-
Ajcišnik z EPAM, jaki žyvie ŭ ZŠA, naviedaŭ Biełaruś. Ciapier jamu pahražaje da siami hadoŭ kałonii
Kamientary