Kiraŭnica internet-prajektaŭ ANT raspaviała, čamu raptoŭna zvolniłasia ŭ 2022 hodzie i jak źjechała ŭ Aŭstraliju

Dziavočaje proźvišča Śviatłany — Błažej. Jana pracavała na ANT šmat hadoŭ — pryjšła tudy jašče kali vučyłasia na fakultecie žurnalistyki BDU. Paśla taho, jak dziaŭčyna stała pres-sakratarkaj kanała, jaje adpravili vučycca ŭ Akademiju kiravańnia, dzie jana atrymała druhi dypłom u 2019 hodzie. Pavyšeńnie było nie za harami: u 2020 hodzie Cichanava ŭznačaliła dyrekcyju internet-prajektaŭ.

Raskazvajučy pra pośpiechi dyrekcyi, jana adznačyła intervju Marata Markava z Ramanam Pratasievičam, jakoje sabrała šmat prahladaŭ u internecie.

U adkaz na pytańnie pra pracu paśla falsifikavanych vybaraŭ 2020 hoda i masavych represij, jakija za tym pačalisia, Śviatłana paryravała:

«Ja ŭdziačnaja ludziam sa svajoj dyrekcyi, jakija zastalisia i praciahvali pracavać, niahledziačy na cisk. My pabyvali na vajnie — biez strat, viadoma, nie abyšłosia, pieramoha jašče nie zdabytaja, ale my sapraŭdy stali macniejšyja ducham».

Pavialičyć

Ale ŭ zvyčajnym žyćci Cichanava była nastrojenaja mienš aptymistyčna. Na svaich zakrytych staronkach u sacyjalnych sietkach jana skardziłasia na toje, jak šmat ludziej ad jaje adviarnułasia praz palityčnyja pohlady. A tym siabram, što zastalisia ź joj, płakałasia, jak joj maralna składana praciahvać pracavać na ANT. I adnačasova abstaŭlała novuju kvateru.

Pra toje, što adbyvałasia ŭ pryvatnym žyćci, Śviatłana ciapier raskazvaje ŭ instahramie, jaki narešcie vyrašyła zrabić adkrytym.

Niaŭdały šlub, razvod i praciahły raman, jaki, pa słovach dziaŭčyny, dla jaje byŭ jak čamadan biez ručki: i kinuć škada, i nieści ciažka.

Pavialičyć

I voś u takoj situacyi Śviatłana nie prydumała ničoha lepšaha, akramia jak pajechać u sanatoryj na Narač. Tam jana paznajomiłasia ź vielmi aktyŭnaj žančynaj, jakuju zvali Ała. Niejak uviečary za siabroŭskaj hutarkaj pad kańjak Ała pačała nastojvać, kab Śviatłana zarehistravałasia na sajcie znajomstvaŭ.

Tut treba adznačyć, što ŭ Śviatłany ŭžo byŭ niehatyŭny vopyt pošuku chłopca na sajcie znajomstvaŭ. Jana pisała ŭ błohu, što paśla Badoo była ŭpeŭniena, što tam siadziać vyklučna vyčvarency: «Dyjapazon prapanovaŭ uražvaŭ: ad kachańnia za hrošy da prośby paniuchać maje stupni (taksama nie biaspłatna)».

Ale ž u vyniku Śviatłana ŭsio ž sastupiła novaj znajomaj i zarehistravałasia na servisie Mamba.

— I voś u adnoj ruce ŭ mianie telefon, u druhoj — kańjak. Ja rehistrujusia na sajcie znajomstvaŭ. Siabroŭka prapanavała vybrać krainy, mužčyn ź jakich mnie buduć pakazvać. Vybirała krainy jana: Aŭstraliju, Šviejcaryju i ZŠA.

Śviatłana pryznajecca, što ŭ toj momant usio zdavałasia joj žartam, jana śmiajałasia z taho, što adbyvajecca. Jana zahruziła adno fota z Ryma, dzie vyhladała vielmi rassłablenaj i viasiołaj, i łajknuła niejkich troch advolnych mužčyn. Ale rankam Śviatłana sa ździŭleńniem pabačyła paviedamleńnie ad chłopca z Aŭstralii — jaho zvali Vadzim.

— Dumaju: «Nie, nu chopić. Učora paśmiajalisia, ale jakaja Aŭstralija? Dzie Biełaruś, a dzie Aŭstralija?».

Ale ŭsio ž vyrašyła, što nie adkazvać budzie niejak niavietliva. Pačałasia pierapiska, niekalki miesiacaŭ Śviatłana pa-siabroŭsku razmaŭlała z tym chłopcam.

Pavialičyć

— Tut jon raptam dasyłaje mnie bukiet maich lubimych biełych ruž. I ja razumieju: «Zdajecca, usio surjozna». I jon stavić mianie pierad faktam, što pryjedzie ŭ Minsk. My pačynajem płanavać, užo niejkaje pradčuvańnie…

Ale Aŭstralija praz karanavirus začyniła miažu, vandroŭku pryjšłosia pieranieści na nieviadomy čas. Para praciahnuła pierapisvacca i stelefanoŭvacca praz Skype — navat z baćkami Vadzima jana znajomiłasia praz hetu prahramu.

Jak tolki źjaviłasia navina pra toje, što Aŭstralija adčyniła miažu, kachany nabyŭ kvitok u Biełaruś.

— Lacieŭ dvoje sutak, rejsaŭ paśla kavidu było mała. Šlach z Aŭstralii ŭ Biełaruś byŭ praz Kitaj, Finlandyju i Rasiju. Pamiataju, jak siarod nočy telefanavała pres-sakrataru pamiežnaj słužby i pytałasia, ci puściać kachanaha bieź vizy pa aŭstralijskim pašparcie. Vyśvietliłasia, što nie.

Ale ž u Vadzima byŭ jašče i małdaŭski pašpart, jaki jon i pakazaŭ u Maskvie — inakš jaho b naŭprost departavali b.

— Pamiataju, staju ja i čakaju jaho z šarykam u vyhladzie serca. Čakaju 15 chvilin, 30, hadzinu! Usie pasažyry vyjšli, a jaho niama. Vyśvietliłasia, što zhubili jahony bahaž. I pakul jon tam zapaŭniaŭ zajavu na vyšuk, u mianie serca syšło ŭ piatki.

Pavialičyć

Zakachanyja pajechali ŭ toj samy sanatoryj, dzie niekali kańjak natchniŭ Śviatłanu zarehistravacca na sajcie znajomstvaŭ. U jaje dzień naradžeńnia Vadzim vyrašyŭ zrabić dziaŭčynie prapanovu ruki i serca (heta byŭ jaho piaty dzień u Biełarusi).

Dla taho, kab usio było jak u kino pryhoža, małdavanin-aŭstralijec sprabavaŭ znajści prystojny restaran u Miadzielskim rajonie — ale dla biełaruskaj pravincyi, da jašče i zimoj nie ŭ siezon, heta zadača z zoračkaj.

— Ja zahuhliła restaran, dzie na fota mužčyna lažaŭ na niejkaj łavačcy. Vadzima heta ŭsio tak uraziła, što jon admoviŭsia ad idei z pošukam restaranu.

Pavialičyć

U vyniku chłopiec prosta dačakaŭsia momantu, kali kachanaja vyjdzie z dušu z ručnikom na hałavie, staŭ na kalena i prapanavaŭ stać jahonaj žonkaj. Śviatłana z radaściu pahadziłasia. Ale paśla taho, jak žanich źjechaŭ, skaciłasia ŭ depresiju i adnačasova vyharała na pracy. Spačatku paprasiłasia ŭ svoj samy praciahły ŭ pracoŭnym žyćci adpačynak, a potym zvolniłasia «ŭ nikudy». Kaža, što ŭ toj čas šmat zajmałasia sportam, vučyłasia i dumała pra budučyniu. A tut jakraz joj dali aŭstralijskuju vizu.

U studzieni 2022 hoda Śviatłana palacieła ŭ Aŭstraliju — jak jana kaža, z dvuma čamadanami. Heta stała šokam navat dla jaje baćkoŭ i siabroŭ, bo dziaŭčyna amal nikomu nie kazała pra płany — bajałasia suročyć.

Tak byłaja ŭdarnica łukašenkaŭskaj prapahandy trapiła ŭ aŭstralijski Bryśbien, dzie stała žonkaj Vadzima. Naprykancy 2023 hoda Śviatłana znajšła pracu ŭ najbujniejšaj u śviecie hornazdabyŭnaj kampanii BHP. Pracuje dziaŭčyna na pazicyi project support i zajmajecca stvareńniem prezientacyj, robić videa dla karparatyŭnaha partała, piša teksty.

Pavialičyć

Niadaŭna Śviatłana pryjechała ŭ adpačynak u Biełaruś. Ciapier jana zachaplajecca nievialikimi biełaruskimi koštami (što nie vielmi składana rabić, kali ty atrymlivaješ aŭstralijskuju zarpłatu). Jana raskazvaje padpisčycam, što ŭ Aŭstralii štomiesiac vydatkoŭvaje na svoj nieabchodny minimum bjuci-pracedur $1000.

Taksama dziaŭčyna atrymlivaje asałodu ad biełaruskich praduktaŭ — asabliva ad ajčynnaha ziefiru, chałvy i małočnaj kaŭbasy, jakich u Aŭstralii niama. Śviatłana raspaviadaje, što kali ŭ Biełarusi čaściej za ŭsio abiedała ŭ kafe, a viačerała ŭ restaranie ci zamaŭlała dastaŭku, to ŭ Bryśbienie pačała varyć tvaroh, piačy draniki i rabić kvašanuju kapustu.

Byłaja supracoŭnica prapahandy ščyra pryznajecca, što ŭžo nie ličyć svaim domam Biełaruś, bo navat kvatery ŭ Minsku ŭ jaje ŭžo niama.

• 1
• 28
• 17
• 21
• 2
• 2
• 11
• 0