Eks-dyrektara škłozavoda «Nioman» sudziać za zdradu dziaržavie. Pahražaje da 15 hadoŭ
Ihar Bacian bolš za 12 hadoŭ uznačalvaŭ škłozavod «Nioman». Paśla vyzvaleńnia z pasady jon syšoŭ u kiraŭnictva chakiejem, a paśla apynuŭsia ŭ cieni. Ciapier stała viadoma, što Bacian u SIZA, pryčym artykuł — palityčny, choć mužčyna nie byŭ zaŭvažany ŭ ruchu za svabodnyja vybary.
Iharu Bacianu 60 hadoŭ. Rodam jon ź Lidy. Paśla škoły pajechaŭ vučycca ŭ Minsk u Biełaruski dziaržaŭny politechničny instytut (ciapier — BNTU) pa śpiecyjalnaści «Mašyny i technałohija liciejnaj vytvorčaści».
Nieviadoma, dzie jon pracavaŭ u saviecki čas, ale ŭ niezaležnaj Biełarusi karjera zadałasia. Z 2000 pa 2004 hady Bacian pracavaŭ dyrektaram pa markietynhu na Lidskim piŭzavodzie. A nieŭzabavie jaho pryznačyli kiraŭnikom škłozavoda «Nioman» u Biarozaŭcy — horadzie ŭ Lidskim rajonie
Praca išła nie biez składanaściaŭ — za adsutnaść addačy ad zavoda ŭ 2009-m Baciana pakrytykavaŭ KDK, paśla čaho na jaho zaviali kryminalnuju spravu. Bacian u adkaz pačaŭ słać čałabitnyja Łukašenku, pad jakimi zmušaŭ padpisvacca rabotnikaŭ zavoda.
«My viernyja svajmu Prezidentu i inšaha Kiraŭnika našaj dziaržavy nie ŭjaŭlajem», — pisałasia ŭ zvarocie. Praŭda, sami rabotniki tady kazali «Našaj Nivie», što Bacian dla ich čužy, a ŭmovy pracy na zavodzie vielmi ciažkija.
Tady Baciana nie pasadzili, patrymaŭšy pad padpiskaj, a sprava niejak zamiałasia.
Nastupny «kazus» adbyŭsia ŭ 2014 hodzie. Tady dziaržmiedyja pisali, što Bacian «adkaža materyjalna» za zryŭ prajekta pa adkryćci vytvorčaści škłavaty na zavodzie «Nioman». Praz hod cech adkryŭsia, ale źjaviłasia novaja prablema — žychary Biarozaŭki byli niezadavolenyja paharšeńniem jakaści pavietra, adkazvać znoŭ daviałosia Bacianu.
U vyniku dyrektara źniali z pasady ŭ 2017 hodzie. Bacian nie razhubiŭsia dy adkryŭ u sabie talent chakiejnaha mieniedžara — uznačaliŭ adździeł dziciača-junackaha chakieja i raźvićcia Fiederacyi chakieja Biełarusi.
Imavierna, chakiejem jon cikaviŭsia i dahetul — u 2016 jon hieraična abaraniaŭ ajčynny chakiej u kamientarach vydańnia Tribuna.com. Paśla 2018 hoda Ihar Bacian źnik z radaraŭ.
U 2020-m Bacian publična nijak siabie nie prajaviŭ. 16 žniŭnia, u dzień najbolš masavych u historyi sučasnaj Biełarusi pratestaŭ, jahony telehram-akaŭnt ustupiŭ u vialikuju supołku jabaciek «Za Biełaruś!», ale ničoha nie pisaŭ. Mahčyma, jaho tudy prosta zaprasili — tudy zakinuli niekalki tysiač funkcyjanieraŭ za adzin dzień, dakładna pa raznaradcy źvierchu.
Na staronkach u sacsietkach Ihar Bacian publikuje ikony dy vyjavy śviatych, cytaty roznych viadomych ludziej minułaha, fota dy videa z padarožžaŭ, pieśni pra vielič šmatnacyjanalnaj Rasii. A siarod jaho padpisak u asnoŭnym rasijskija miedyja (ź jakich na pieršym miescy kanał «Caŕhrad»), relihijnyja supołki, a taksama pabliki pra padarožžy dy pryrodu. Ničoha nie vydaje ŭ im praciŭnika režymu.
Bacian pierastaŭ być anłajn va ŭsich sacsietkach u kastryčniku 2023 hoda – imavierna, tady jaho i zatrymali.
Sud nad Bacianom pačniecca 26 žniŭnia ŭ Hrodzienskim abłasnym sudzie. Jaho abvinavačvajuć u «zdradzie dziaržavie» (č. 1 art. 356 KK). Jamu pahražaje ad 7 da 15 hadoŭ kałonii. Akaličnaści spravy nieviadomyja.
«Naša Niva» — bastyjon biełaruščyny
PADTRYMAĆ
Kamientary