Jak žyvie chłopiec, jaki 9 žniŭnia 2020 hoda išoŭ u sčepcy z amapaŭcam
U žniŭni 2020 hoda suśvietnyja miedyi publikavali fota minčuka, jaki idzie pa horadzie ŭ sčepcy ź siłavikom, a paśla staić pierad šeraham amapaŭcaŭ. «Radyjo Svaboda» raskazvaje, jak ciapier žyvie Maksim.
«U mianie nikoli nie było bolš ščaślivaha dnia»
Maksimu 31 hod. Da 2020-ha jon byŭ apalityčny. Ale ŭ paślavybarnym žniŭni vychodziŭ na pratesty. Staŭ papularnym zdymak Agence France-Presse, na jakim jon staić u sčepcy z amapaŭcam uviečary 9 žniŭnia 2020 hodu. Na fota taksama vidać baćka Maksima i jahonaja žonka. Usio adbyvałasia pablizu Pałaca sportu ŭ Miensku.
Pa słovach Maksima, hety amapaviec chacieŭ jaho zatrymać, ale pratestoŭcu ŭdałosia pierakanać siłavika hetaha nie rabić. Jakimi mienavita słovami Maksim zaachvociŭ siłavika stać razam ź imi ŭ sčepku, mužčyna nia pamiataje. Kaža, što vychodziŭ na pratesty na praciahu pieršych troch načej paśla vybaraŭ. Za hety čas, ź jahonych słovaŭ, zdaryłasia kala 20 padobnych sytuacyj.
Na dumku Maksima, bolšaść siłavikoŭ vychodzili razhaniać mitynhoŭcaŭ jak na pracu. Jon miarkuje, što milicyjanty pracavali nia dziela idei i nie tamu, što nienavidzieli pratestoŭcaŭ. U niekatorych vypadkach, ź jahonych nazirańniaŭ, siłavik advodziŭ pratestoŭca ŭbok i, kali jaho ŭžo nia bačyŭ načalnik, adpuskaŭ, a nie zatrymlivaŭ.
Surazmoŭca adznačaje, što fota sa sčepkaj pastajanna traplaje jamu na vočy. Ciapier, kali jon znajomicca ŭ Eŭropie z novymi ludźmi, prykładam, z haspadarami sabakaŭ na špacyry, to raskazvaje im pra pratesty ŭ Biełarusi i pakazvaje fota, na jakija trapiŭ. Kaža, što eŭrapiejcy čaściej asacyjujuć pratesty ź niečym nieadekvatnym. Tamu jon tłumačyć, što ŭ Biełarusi było inakš.
Razdrukavanaha fota ŭ ramcy doma ŭ Maksima niama. Ale jon nie vyklučaje, što razdrukuje jaho nieŭzabavie. Jahonyja fatazdymki z pratestaŭ vyklikajuć u biełarusa «pryjemnuju nastalhiju».
«Heta było 9 žniŭnia. My vybrali novaha prezydenta. Ja byŭ ščaślivy. U mianie nikoli nie było bolš ščaślivaha dnia ŭ žyćci. U hałavie adrazu malujecca demakratyja. Zaraz, voś jana, kali ty nie razumieješ, što tvoj susied — heta Rasieja. Ja byŭ naiŭny. Ale kali hladziš na hetyja fota, to biare śviata», — tłumačyć Maksim.
«Dla kahości ja staŭ symbalem u hetaj biezvychodnaści»
Pretenzij da fatohrafa, jaki zrabiŭ jaho publičnym, Maksim nia maje. Chutčej naadvarot.
«Dla kahości ja staŭ symbalem u hetaj biezvychodnaści», — miarkuje surazmoŭca.
Jon raskazaŭ, što adzin biełarus, jaki ciapier žyvie ŭ Vialikaj Brytanii i nia moža viarnucca ŭ Biełaruś, znajšoŭ Maksima pa hetym fatazdymku. Adšukaŭ jahonyja kantakty, patelefanavaŭ, vykazvaŭ zachapleńnie jahonymi pavodzinami. Chacieŭ sustrecca, prapanavaŭ pieravieści hrošy ci vysłać padarunki.
Na druhim fota z pratestaŭ vidać, što Maksim staić nasuprać šerahu siłavikoŭ sa ščytami. Jon uzhadvaje, što paśla hetaha siłaviki pajšli ścianoj na ludziej, bili ich dručkami. Samoha Maksima, pavodle jahonych uspaminaŭ, pakłali na ziamlu i taksama źbili, ale nie zatrymali. Surazmoŭca nia moža ŭzhadać dakładna, što było dalej, bo prajšło ŭžo čatyry hady. Ale dapuskaje, što jaho jakraz addali ŭ ruki taho siłavika, jaki ŭrešcie staŭ ź im razam u sčepku.
Miančuk uspomniŭ, što ŭ adnu z pratestavych načej pobač ź im razarvałasia śviatłašumavaja hranata. Kali ŭbačyŭ prylot, to zapluščyŭ vočy. Pry hetym usio adno paśla vybuchu ničoha nia bačyŭ sekundaŭ dvaccać.
Na jahonych vačach vybuchnuła nastupnaja hranata. Maksim kaža, što bačyŭ, jak mužčynu adarvała stupniu. I jak u ludziej stralali humovymi kulami. Paśla čaho jany padali i nie padavali prykmietaŭ žyćcia. Śćviardžaje, što jon tolki na svaje vočy bačyŭ na pratestach bolš paranienych, čym pra heta pisali publična.
«Ja navat rady, što my prajhrali»
Maksim źjechaŭ ź Biełarusi ŭ vieraśni 2020 hodu, kali zrazumieŭ, što vialikich pratestaŭ užo nia budzie.
«Ja zrazumieŭ, što sensu tam znachodzicca ŭ mianie niama. Ničoha karysnaha ja nie zrablu. Možna być dyversantam-adzinočkaj. Treba być vielmi razumnym i vielmi advažnym dla hetaha. Mianie b, chutčej za ŭsio, paśla pieršaj ža dyversii znajšli. Ja ličyŭ, što byŭ sens u «načnych vojnach» z 9 žniŭnia i try nastupnyja (nočy. — RS). Ja braŭ udzieł va ŭsich», — kaža jon.
U žniŭni 2020 hodu surazmoŭca dumaŭ, što biełarusy zmohuć pamianiać sytuacyju ŭ krainie. Ciapier jon miarkuje, što kali b biełarusy pratestavali z bolšym hvałtam, to pucinskaja armija ŭsio adno zdušyła b pratest. U prykład jon pryvodzić pratesty ŭ Kazachstanie 2022 hodu i vajnu va Ŭkrainie.
Maksim značycca ŭ bazie vyšuku Rasiei. Ź jakoj pryčyny, jon nia viedaje.
«Ja navat rady, što my prajhrali, hruba kažučy, ź minimalnymi stratami», — kaža surazmoŭca.
Čatyry hady čakańnia
U 2020 hodzie ŭ Maksima była viza ŭ Vialikuju Brytaniju, tamu jon ź siamjoj źjechaŭ tudy. Užo amal čatyry hady jany žyvuć u Londanie. Maksim i jahonaja žonka ciapier u statusie prośbitaŭ ab uciakactvie. Zajavu padali adrazu, jak pryjechali. Jany majuć znajomych, jakija pryjechali paźniej i ŭžo atrymali status uciekačoŭ. Viedajuć i tych biełarusaŭ, chto čakaŭ hetaha statusu vosiem hadoŭ. Čamu tak, surazmoŭca nia viedaje.
Praz svoj status Maksim nia maje prava pracavać u Vialikaj Brytanii. Dziaržava płacić jamu i žoncy dapamohu — prykładna pa 5 funtaŭ u dzień na čałavieka. Mužčyna adznačaje, što hetaha nie chapaje, kab pražyć.
Za što siamja žyvie ciapier, jon nia choča raskazvać. Biełarus krychu škaduje, što źjechaŭ u Anhliju. Raniej jon chacieŭ pajechać žyć u Aŭstraliju. Vialikuju Brytaniju abrali jak časovy punkt, ale hety peryjad akazaŭsia daŭžejšy, čym planavali.
Baćka Maksima, jaki taksama jość na viadomym pratestavym fota, pryjechaŭ u Londan 2,5 hoda tamu. Jon užo atrymaŭ status uciekača. Zajmajecca antykvaryjatam. U Biełarusi jaho padčas zavočnaha pracesu asudzili za hvałt nad biełaruskim ambasadaram u Londanie na 10 hadoŭ źniavoleńnia. A taksama ŭnieśli ŭ «śpis terarystaŭ» u Biełarusi.
Syn
Kali Maksimu spoŭniłasia 30 hadoŭ, jon vyrašyŭ, što na nastupny dzień naradžeńnia choča syna. Žonka pahadziłasia. Praz hod naradziŭsia Teadoras. Ciapier niemaŭlaci niekalki miesiacaŭ. Imia vybirali admysłova redkaje.
«Na svoj 33-i dzień narodzinaŭ ja zamoviŭ jašče adnaho syna», — kaža Maksim.
Za hety čas u siamji źjaviŭsia taksama šery šarpej Feni, jakoha chacieła žonka.
Na fota 2020 hodu Maksim z dredami. Jon kaža, što abrezaŭ ich prykładna praź miesiac paśla vybaraŭ. Potym časta mianiaŭ fryzury. Mieŭ karotkija vałasy. Apošnim časam adhadavaŭ byŭ vałasy da plačej. Ciapier znoŭ abrezaŭ ich karotka.
Praz dva hady pierastaŭ bajacca palicejskich
Praz dva hady žyćcia ŭ Londanie, pryznajecca Maksim, jon pierastaŭ bajacca palicyi na vulicach. Kaža, što ŭ Biełarusi adčuvaŭ strach pierad siłavikami.
«U Biełarusi ja žyŭ z hetym zaŭsiody, i da 2020 hodu. Z samych rańnich hadoŭ škoły. U maich baćkoŭ było hetak ža, i ŭ maich siabroŭ z roznych słajoŭ hramadztva. Ja z hetym žyŭ, mnie zdavałasia, što heta narmalna. Ciapier ja razumieju, što palicyja — heta pryjemnyja ludzi. Jany ŭśmichajucca, zaŭsiody rady dapamahčy. U pieršyja dva hady heta prosta łamała mozh. Tut palicyja isnuje, tolki kab dapamahać ludziam», — adznačaje surazmoŭca.
Maksim kaža, što jaho bili siłaviki i da 2020 hodu. Jon mieŭ svoj Youtube-kanał, na jakim zdymaŭ pranki ź siabrami. Śćviardžaje, što amal paśla kožnaha videa jaho źbivali abo milicyjanty, abo achoŭniki ŭ metro, kali vypusk byŭ pra metro. Abo vyklikali na razmovu ŭ pastarunak.
«Ciabie vyklikajuć u milicyju i razmaŭlajuć, jak ź niejkaj nikčemnaściu. Choć u mianie nie było złych videa, dzie b ja napadaŭ na ludziej ci rabavaŭ», — kaža Maksim.
Adzin z vypuskaŭ byŭ, prykładam, pra reakcyju minakoŭ na toje, jak dziaŭčynu skradajuć z prypynku i zvoziać na mašynie. Dziaŭčyna była padrychtavanaja, ź ichnaj kamandy.
Pa Biełarusi nie sumuje
Ciapier Maksim nie čytaje biełaruskich navinaŭ, bo jany pieravažna nehatyŭnyja.
«Nehatyvu mnie chapaje ad taho, što Rasieja robić z Ukrainaj», — tłumačyć jon.
Pra toje, što adbyvajecca na radzimie, Maksim daviedvajecca ad znajomych, jakija zastajucca ŭ Biełarusi. Viedaje pra vypadki, kali za danaty ludziej karajuć pa niekalki razoŭ. Dapamahaje biełarusam «časam paradaj, časam materyjalna». Pra toje, što źjechaŭ, nie škaduje. Viartacca ŭ Biełaruś nia choča.
«Pakul što nie było nivodnaha dnia, kab ja taki: «Ech, ciapier by ŭ Biełaruś!». U mianie Biełaruś asacyjujecca tolki z palicejskim biezzakońniem. U mianie ŭ hałavie adrazu čornyja šałomy, dubinki, i ja dumaju: navošta?», — adznačaje surazmoŭca.
Na jahony hust, Brytanija pryhažejšaja i zielaniejšaja za Biełaruś. Kaža, što kali i sumuje, to tolki pa Aŭstralii abo ZŠA.
Što za čamadan nosić kala Łukašenki jahony achoŭnik? Nie, tam nie jadziernaja knopka20
Kamientary