Udzielnik apazicyjnaha ruchu Vital Łuchvič vyjaviŭsia płatnym milicejskim stukačom
U 2019-m jon udzielničaŭ u pratestach suprać intehracyi z Rasijaj. Na apublikanych fota jon staić pobač ź Mikołam Statkievičam i Siarhiejem Cichanoŭskim, trymaje bieł-čyrvona-bieły ściah.
Vitalu Łuchviču 46 hadoŭ. Jon minčuk. Skončyŭ Biełaruski dziaržaŭny piedahahičny ŭniviersitet.
Najpierš jon viadomy jak kiraŭnik škoły pa adzinaborstvach u tak zvanym ruskim styli, jakaja isnuje nie mienš za 15 hadoŭ. Ciapier jana nazyvajecca «Samba» i znachodzicca ŭ Zavodskim rajonie Minska.
Ahułam u bazach Fonda sacyjalnaj abarony nasielnictva i DAI, jakija jość u «Kibierpartyzanaŭ», u mužčyny pad sotniu zapisaŭ pra miescy pracy. Tam i ŭniviersitety z kaledžami, i pradpryjemstvy, departamient finansaŭ i tyłu MUS i navat kompleks «Stajki».
Vital niejki čas pracavaŭ na ANT i na «Biełaruśfilmie», imavierna, jak apieratar.
Ablivaŭ farbaj susieda i ŭdzielničaŭ u demanstracyjach
Pieršuju viadomaść u niezaležnych miedyja Łuchvič atrymaŭ u 2017 hodzie, na heta źviarnuŭ uvahu prajekt Luka.Zone. Tady jon abliŭ biełaj farbaj susieda, jaki sprabavaŭ advučyć jaho parkavacca na tratuary. Zhodna z bazami «Kibierpartyzanaŭ», u vyniku Łuchvič atrymaŭ adnu bazavuju štrafa.
Paralelna Łuchvič staŭ sprabavać prymazacca da roznych demakratyčnych ruchaŭ. Naprykład, naviedvaŭ akcyi rucha salidarnaści «Razam». Jaho navat adnojčy zatrymlivali ŭ 2019-m padčas sproby ŭšanavać pamiać zabitych nacystami ŭ Chatyni (praŭda, anijakaha pakarańnia jon nie atrymaŭ).
Sustaršynia «Razam» Alena Tałstaja raskazała «Našaj Nivie», što anijakaj pasady ŭ ruchu Łuchvič nie zajmaŭ i nie braŭ udzieł u schodach ci rabočych hrupach arhanizacyi. Ale chadziŭ na akcyi:
«Jany byli adkrytyja, publičnyja, z anonsami ŭ ŚMI i fejsbuku. Akcyi ładzilisia ŭłasnymi siłami, kožny dapamahaŭ čym moh: transpartam, źničkami, kvietkami i hetak dalej. Vital pryjšoŭ na adnu z akcyjaŭ ušanavańnia, skazaŭ, što jamu heta padabajecca.
Nie chavaŭ, što pracuje ŭ sportzale ź milicyjantami, trenieram abo niešta takoje. Sam z hetaha paśmiejvaŭsia. Krychu niezvyčajny dla našaha atačeńnia čałaviek, ale nijakich padstaŭ jaho prahaniać nie było. Padčas akcyj nas štoraz i tak zdymali seksoty.
Nikudy nie lez, ničoha nie vypytvaŭ, nie nabivaŭsia. Trymaŭ siabie pa-kampaniejsku. Asablivych siabroŭskich stasunkaŭ ni z kim nie padtrymlivaŭ. [Niejak] prosta pierastaŭ prychodzić na akcyi i ŭsio».
A ŭ 2019-m udzielničaŭ u pratestach suprać intehracyi z Rasijaj, jakija inicyjavaŭ Mikoła Statkievič. Na fota jon trymajecca pobač ź Mikołam Statkievičam i Siarhiejem Cichanoŭskim.
Na miažy 2019-ha i 2020-ha Łuchvič źnik z publičnych radaraŭ. Apošniaje jaho fota ŭ miedyja — prahułka ŭ rajonie Niamihi ŭ žniŭni 2020-ha, ale tam jon nie ŭdzielničaje ŭ pratestach.
«Łaryskor» i stukactva
Stała viadoma, što Łuchvič byŭ supracoŭnikam «Łaryskor». Nahadajem, heta firma dla farmalnaha pracaŭładkavańnia płatnych stukačoŭ MUS. Pa źviestkach z bazaŭ «Kibierpartyzanaŭ», Łuchvič pracavaŭ tam z krasavika 2016-ha pa 2020-ty ŭklučna.
Jahony zarobak u «Łaryskory» za 2020 hod, naprykład, skłaŭ 7000 rubloŭ, kala 3000 dalaraŭ na toj momant.
Jašče ŭ 2020-m Łuchvič jak minimum dvojčy danosiŭ na pratestoŭcaŭ. 28 vieraśnia jon paviedamiŭ, što susied vyviesiŭ bieł-čyrvona-bieły ściah. A ŭ dzień śmierci Ramana Bandarenki 12 listapada jon skardziŭsia, što «kampanija z bčb-ściahami pierakryła darohu ŭ rajonie vulicy Čarviakova, šumiać». Numar i adras vykliku supadajuć sa źviestkami Łuchviča.
Cikava, što ŭ Łuchviča jość brat-bliźniuk Vadzim. Jon taksama pryśviaciŭ žyćcio sportu. I jon taksama stukač. U vieraśni 2020-ha Vadzim Łuchvič paviedamiŭ, što na vodanapornaj viežy ŭ Ratamcy visić bieł-čyrvona-bieły ściah.
Vital Łuchvič ža dahetul kiruje svaim kłubam pa adzinaborstvach. Pravodzić sieminary, siarod inšaha i dla kursantaŭ akademii MUS.
A taksama pracuje ŭ škole. Pa źviestkach prajekta DIT, mužčyna zajmajecca vajenna-patryjatyčnym vychavańniem u himnazii №29 u Minsku.
Publikacyja zroblenaja z dapamohaj Digital Intelligence Team (DIT) i bazaŭ «Kibierpartyzanaŭ». DIT — heta OSINT-prajekt, jaki supracoŭničaje z prademakratyčnymi strukturami dy prajektami ŭ raśledavańniach i daśledavańniach roznych temaŭ.
«Naša Niva» — bastyjon biełaruščyny
PADTRYMAĆ«Zašmat u vas dziaciej». Jak žyvie siamja ź siamiu dziećmi, jakoj daviałosia vyjechać ź Biełarusi6
Kamientary
Nu a jak ža ž, treba i tam pastučać, i tam.