U Słonimie chłopcy samastojna zatrymali mužčynu, jaki stralaŭ u ich ź pnieŭmatyčnaj vintoŭki
U Słonimie 40-hadovy miascovy žychar u stanie ałkaholnaha apjanieńnia streliŭ u kampaniju maładych ludziej: jany jamu nibyta pieraškadžali. Ale chłopcy nie razhubilisia i zdoleli sami zatrymać mužčynu, paviedamili va UUS Hrodzienskaha abłvykankama.
![](http://d3kcf2pe5t7rrb.cloudfront.net/img/w840d4webp1/photos/z_2024_07/vintovka-pnevmaticheskaya-edgun-leshij-2-635mm-350mm-1-wvsqs.jpg.webp)
Incydent adbyŭsia 3 lipienia. Ranicaj piaciora maładych ludziej va ŭzroście ad 23 da 27 hadoŭ, pavodle infarmacyi milicyi, adpačyvali ŭ słonimskaj kvatery. Zatym jany vyjšli na vulicu pahavaryć, a chutka da chłopcaŭ spuściŭsia pjany žychar doma. Jon staŭ patrabavać, kab jany nieadkładna adtul pajšli, bo, maŭlaŭ, jamu pieraškadžajuć.
Nie dabiŭšysia svajho, mužčyna padniaŭsia da siabie ŭ kvateru, uziaŭ pnieŭmatyčnuju vintoŭku i streliŭ na vulicu ŭ bok kampanii.
Paśla taho chłopcy «samastojna zatrymali złamyśnika i ŭtrymlivali jaho da prybyćcia supracoŭnikaŭ milicyi».
Pry stralbie nichto nie paciarpieŭ. Da hetaha incydentu mužčynu da adkaznaści nie pryciahvali. Sam ža jon raskazaŭ, što chłopcy šumna siabie pavodzili i «pieraškadžali adpačyvać». Ale ŭ inšych žycharoŭ doma skarhaŭ na šum ad kampanii nie było.
Ciapier mužčynu padazrajuć u asabliva złosnym chulihanstvie (č. 3 art. 339 KK Biełarusi), jamu pahražaje da 10 hadoŭ pazbaŭleńnia voli.
Kamientary