Na Vałožynščynie błasłavili novy pomnik na mahile śviatara, jakoha zabili kamsamolcy ŭ 1950 hodzie
13 lipienia ŭ parafii Adviedzinaŭ Najśviaciejšaj Panny Maryi ŭ Višnievie adbyłosia błasłaŭleńnie novaha pomnika ajcu Stanisłavu Michalskamu — jezuitu, jaki zahinuŭ mučanickaj śmierciu, paviedamlaje Catholic.by.
Ajciec Stanisłaŭ słužyŭ u Višnievie z 1944 hoda. Tut jon pryniaŭ mučanickuju śmierć ad ruk kamsamolcaŭ u 1950 hodzie, napiaredadni Rastva.
Śviatar naležaŭ da ordena jezuitaŭ i vyzvaŭsia być skiravanym na terytoryi, dzie ŭ toj čas nie chapała śviataroŭ, u miežach tak zvanaj «Uschodniaj misii» Vilenskaj dyjacezii nieŭzabavie paśla svajho śviatarskaha paśviačeńnia.
![](http://d3kcf2pe5t7rrb.cloudfront.net/img/w732d4webp1/photos/z_2024_07/2024-07-13-pomnik-mihalski-3-a6j15.jpg.webp)
Na błasłaŭleńnie pomnika byli zaprošanyja niekalki śviataroŭ.
Błasłaŭleńniu pomnika papiaredničała śviataja imša, na pačatku jakoj svaim śviedčańniem padzialiŭsia ksiondz Artur Lašnieŭski.
«Dziakujučy ajcu Stanisłavu naradziłasia majo śviatarskaje paklikańnie. Pamiataju ź dziacinstva, jak babula pryvodziła mianie na jaho mahiłu, i my razam ź joj malilisia ab novych paklikańniach.Taksama jana raspaviadała ab tym, jakim čałaviekam byŭ ajciec Michalski, tamu jon staŭ dla mianie prykładam dobraha śviatara.
![](http://d3kcf2pe5t7rrb.cloudfront.net/img/w732d4webp1/photos/z_2024_07/2024-07-13-pomnik-mihalski-9yzc8.jpg.webp)
Babula raskazała, jak ajciec Stanisłaŭ, kab dapamahčy majoj prababuli ź dziećmi, jakaja zastałasia ŭdavoj, kali jaje muža zabili kamunisty, padkłaŭ pad abrus padčas adviedzinaŭ usie hrošy, jakija sabraŭ na ramont kaścioła. Dziakujučy hetamu maja siamja vyžyła», — padkreśliŭ ksiondz Artur.
Naprykancy śviatoj imšy ksiondz Artur znoŭ źviarnuŭsia da viernikaŭ, prosiačy nie zabyvacca pra dobruju tradycyju, jakaja skłałasia ŭ Višnievie, «kab mahiła ajca Stanisłava zaŭsiody była miescam malitvy ab śviatych paklikańniach».
Kamientary