Dyrektar Departamienta dziaržbiaśpieki Litvy: Biełaruski režym maje namier vykradać litoŭcaŭ
«Situacyja nam viadomaja, i jana vyklikaje zaniepakojenaść», — kaža Darus Jaŭniškis.
![](http://d3kcf2pe5t7rrb.cloudfront.net/img/w840d4webp1/photos/z_2024_07/darius240711-92tp2.jpg.webp)
Jak śćviardžaje dyrektar Departamienta dziaržaŭnaj biaśpieki (DDB) Litvy Darus Jaŭniškis, biełaruski režym maje namier vykradać litoŭskich hramadzian, paviedamlaje delfi.lt sa spasyłkaj na partał 15min.lt.
«Situacyja nam viadomaja, i jana vyklikaje zaniepakojenaść. Ja jaje ŭsprymaju tak, što biełaruski režym pierajšoŭ da vykradańnia litoŭskich hramadzian biez usialakaj nahody», — zajaviŭ D. Jaŭniškis.
U minułym miesiacy ŚMI paviedamili pra toje, što Minski haradski sud pryznaŭ hramadzianku Litvy Alenu Ramanaŭskienie vinavataj u špijanažy i prysudziŭ jaje da šaści hadoŭ pazbaŭleńnia voli.
Uličvajučy takija dziejańni, kiraŭnik DDB zaklikaje žycharoŭ admovicca ad pajezdak u Biełaruś, kab paźbiehnuć padobnych situacyj.
«Chaču pieraścierahčy našych hramadzian, u jakich jašče jość žadańnie jeździć u Biełaruś pa bolš tannyja tavary abo bienzin — hety vypadak surjozna śviedčyć ab tym, što biełaruski režym maje namier vykradać litoŭskich hramadzian. Miarkujučy pa ŭsim, z boku ŭładaŭ Litvy taksama buduć peŭnyja zachady i adkazy», — skazaŭ jon.
«(…) Jany vykradajuć hramadzian, fabrykujuć dokazy, na ich padstavie asudžajuć i sadžajuć u turmu. Heta vielmi tryvožnyja tendencyi. Źviartaju ŭvahu hramadskaści — surjozna padumajcie, pierš čym jechać u toj bok, tamu što vy možacie apynucca na miescy toj hramadzianki», — adznačyŭ D. Jaŭniškis.
Biełaruskaje abvinavačańnie śćviardžała, što A. Ramanaŭskienie, jakaja pracavała načalnikam słužby markietynhu sanatoryi «Biełaruś» u Druskienikach, była zavierbavanaja Departamientam dziaržbiaśpieki Litvy bolš za 10 hadoŭ tamu.
Raniej, da dzieviaci hadoŭ pazbaŭleńnia voli za dziaržaŭnuju zdradu byŭ prysudžany były hałoŭny ŭrač sanatoryja «Biełaruś» Andrej Kobiel pa abvinavačvańni ŭ supracoŭnictvie z Departamientam dziaržbiaśpieki Litvy.
Kamientary