Jak skłałasia žyćcio vunderkinda z Žodzina, jaki ŭ 12 hadoŭ pastupiŭ u miedycynski ŭniviersitet?
U 2015 hodzie 12-hadovy Cimur Suško staŭ studentam miedycynskaha ŭniviersitetu. Jon kazaŭ, što maryć trapić na Alimpijadu-2020 jak płyviec, a taksama choča stać niejrachirurham. Ź pieršym nie skłałasia, a ci staŭ vunderkind doktaram?
Baćki Cimura z honaram raskazali žurnalistam, što syn u dzieviać miesiacaŭ dobra razmaŭlaŭ, u hod — patrabavaŭ nabirać vadu ŭ vannu i pa try hadziny tam płavaŭ, a va ŭzroście dvuch hadoŭ navat umieŭ čytać.
Treba adznačyć, što tata z mamaj šukali vielmi roznyja (i niebanalnyja) varyjanty raźvićcia talentaŭ syna. Naprykład, u YouTube jość videa, na jakim 11-hadovy Cimur (tady ŭžo 11-kłaśnik žodzinskaj škoły №8) zajmajecca ŭ škole Volhi Čurylinaj u Maskvie. Ekśpiertka nibyta dapamahała chłopčyku raźvivać ekstrasensornyja zdolnaści.
Na videa nastaŭnica kaža chłopčyku, što jamu treba zdahadacca, jaki malunak vybrała jaho maleńkaja siastryčka Vola. Dziaŭčynka vybiraje malunak z manha. Cimur schilaje hałavu i pavolna pierakładaje listy malunkam uniz — i ŭ vyniku dastaje toje samaje manha.
Cimur prafiesijna zajmaŭsia płavańniem i raskazvaŭ, što płanuje pryniać udzieł va Alimpijadzie-2020. Treniery kazali: u talenavitaha chłopca jość šancy praź niekalki hadoŭ uvajści ŭ skład moładzievaj zbornaj krainy.
Miarkujučy pa nastupnych intervju, pieršyja miesiacy ŭ VNU byli dla Cimura vielmi nasyčanymi: užo ŭ 6:30 u jaho pačynałasia pieršaja treniroŭka ŭ basiejnie, potym byli zaniatki va ŭniviersitecie, a potym — znoŭ płavańnie. Da domu jon zvyčajna pryjazdžaŭ u 21:00 — i jamu ž patrebna było niešta zrabić pa vučobie. Padčas spabornictvaŭ Cimur adsutničaŭ na zaniatkach, a potym sprabavaŭ samastojna dahnać adnakurśnikaŭ. Ščyra kažučy, nie kožny darosły čałaviek zmoh by doŭha vytrymać taki rytm žyćcia.
U adnym ź intervju Cimur raskazaŭ, što adnosiny z adnakurśnikami ŭ jaho nie skłalisia — u asnoŭnym praz toje, što ŭsie jany byli starejšyja hadoŭ na piać. Ale pry hetym adznačaŭ, što stavilisia da jaho dobra. A vykładčyki pabłažak nie rabili i ispyty prymali hetak ža stroha, jak i va ŭsich astatnich studentaŭ.
U 14 hadoŭ chłopiec užo mieŭ kala 200 uznaharod na roznych spabornictvach. Z vučobaj na dzionnym adździaleńni BDMU ŭsio było nie tak dobra: paśla pieršaha kursa chłopcu pryjšłosia ŭziać akademičny adpačynak. Cimur tłumačyŭ heta tym, što tolki vučycca ŭ miedycynskim univiersitecie dla jaho było nieskładana, ciažej za ŭsio akazałasia adnačasova dobra vučycca i dobra vystupać na spabornictvach.
Padčas akademičnaha adpačynku chłopiec praciahnuŭ zajmacca płavańniem: u jaho było pa dźvie treniroŭki pa budniach i pa adnoj u vychodnyja dni. Cimur vykanaŭ narmatyŭ kandydata ŭ majstry sportu, zaniaŭ treciaje miesca ŭ pieršynstvie Minska siarod darosłych. A jašče debiutavaŭ u čempijanacie Biełarusi.
U 2017 hodzie žurnalist «Trybuny» sustrakaŭsia ź Cimuram i byŭ vielmi ŭražany źniešnim vyhladam padletka. U svaje 14 hadoŭ toj vymachaŭ da 184 santymietry i nasiŭ abutak 43 pamieru. Tady Cimur kazaŭ, što pastaleŭ i ź vieraśnia vierniecca da zaniatkaŭ u BDMU.
Jon navat staŭ udzielnikam pracoŭnaj hrupy ŭ Instytucie fizijałohii Akademii navuk. Cimur u kampanii navukoŭcaŭ pracavaŭ nad prafiłaktykaj posttraŭmatyčnaj škody chrybietnika i hałaŭnoha mozhu. Vynikam pracy stali publikacyi ŭ amierykanskich i šviejcarskich navukovych časopisach.
Tady ž Cimur raspavioŭ, što čaściej za ŭsio čytaje padručniki, ale lubimaj knihaj ličyć «Maleńkaha prynca» Antuana de Sent-Ekziupiery. Svaim kumiram padletak nazyvaŭ Majkła Fiełpsa, jaki zavajavaŭ na Hulniach 23 zołata. Sam Cimur maryŭ pra alimpijskija hulni ŭ Tokia. Ale pryznavaŭsia, što lubić ź siabrami pahaniać na rovarach, zhulać u futboł ci zarubicca ŭ dotu.
Dalej niešta pajšło nie tak. U 2019 hodzie «Trybuna» zaŭvažyła, što pośpiechi padletka ŭ płavańni pierastali ŭražvać. «U kancy minułaha hoda Cimur płavaŭ za minskuju kamandu «Traktar» u mižnarodnym turniry na pryzy Siarhieja Kaplakova, i na dvuchsotmietroŭcy brasam zaniaŭ 13-je miesca — miakka kažučy, siaredni vynik dla płyŭca, jaki niekalki hadoŭ tamu maryŭ trapić na Alimpijskija hulni ŭ Tokia», — pisała vydańnie.
Jak udałosia daviedacca «Trybunie», praz adjezd za miažu asabistaha treniera Ihara Niežanca tynejdžar uziaŭ paŭzu ŭ zaniatkach płavańniem. Adnak paviedamlałasia, što koŭč chutka vierniecca, a 16-hadovy Suško znoŭ pačnie treniravacca.
Paśla ŭ miedyjnaj prastory vielmi mała źviestak pra žyćcio Cimura.
U 2019 hodzie ŭ adnym sa ŚMI Vasil Suško (tata chłopca), kazaŭ: «My sioleta napisali zajavu na adličeńnie ź miedycynskaha ŭniviersiteta, jon skončyŭ dva kursy. My zrabili vysnovu, što nielha sumiaščać vialikuju prafiesiju doktara i płavańnie».
Baćka taksama paviedamlaŭ, što paśla hetaha chłopiec pačaŭ vučycca ŭ BNTU na spartyŭna-techničnym fakultecie. Padkreślivałasia toje, što ŭsie rašeńni tata i syn abmiarkoŭvali i prymali razam.
Što z vunderkindam ciapier? Na Cimura Vasiljeviča Suško zarehistravana firma ŭ Smalensku — TAA «Sinerhija», dzie toj źjaŭlajecca dyrektaram z 2023 hoda. Zasnavalnicaj «Sinerhii» źjaŭlajecca jaho maci Śviatłana Suško.
Raniej «Biełaruskaja dziełavaja hazieta» pisała ab tym, što mienavita «Sinerhija» stała ŭładalnikam SAAT «Biełaviežskija syry» (znachodzicca ŭ horadzie Vysokaje Bresckaj vobłaści). Ciapier Śviatłana Suško paznačana jak zasnavalnica TAA «HD «Biełaviežskija syry».
Atrymlivajecca, Cimur pakinuŭ u minułym mary pra Alimpijadu i pracu doktaram i vyrašyŭ zajmacca siamiejnym biznesam.
Tata Cimura — Vasil Suško — naadvarot kinuŭ biznes, kab realizavać dziciačuju maru i stać śpievakom. Jak jon śćviardžaje, pakinuŭ svoj pakiet akcyj «Biełaviežskich syroŭ» maci svaich dziaciej. Pa viersii byłoj žonki — Śviatłany Suško — jana sama vykupiła ŭ jaho pakiet akcyj i samastojna pieratvaryła prablemnaje pradpryjemstva ŭ prybytkovaje.
Vasil Suško ciapier pazicyjanuje siabie jak «biełaruskaha miljaniera, jaki śpiavaje». Sioleta jon atrymaŭ uznaharodu ad rasijskaha «Radyjo Šanson». Na toj ža cyrymonii ŭznaharodžańnia «Šanson hoda — 2024» dypłom dali i niaviestcy Łukašenki, jakaja piša pieśni pad psieŭdanimam Hanna Siałuk.
«Siarhiej» nie adzin. Voś jak KDB prapanuje zarabić na sačeńni za biełaruskimi emihrantami1
Kamientary