Jak anansavaŭ staršynia Homielskaha harvykankama Uładzimir Pryvałaŭ, da Dnia horada na 198-mietrovaj televyšcy źjaviacca «śviatłodyjodny miedyjafasad i kiravanaja padśvietka», što dazvolić «u dni dziaržaŭnych śviataŭ u viačerni čas dadać nacyjanalnaha kałarytu i padkreślić asablivy honar za krainu», piša «Fłahštok».
Staršynia harvykankama spasłaŭsia na toje, što nibyta ad žycharoŭ horada «pastupili prapanovy arhanizavać śviatočnuju iluminacyju televyški». A taksama na vyniki apytańnia, «pa vynikach jakoha ideja była padtrymana bolšaściu».
Na samaj spravie za iluminacyju vykazalisia mienš za tysiaču žycharoŭ paŭmiljonnaha horada.
Akramia taho, Pryvałaŭ pramaŭčaŭ pra toje, u kolki hamialčanam abydziecca stvareńnie «patryjatyčnaj» padśvietki, ale zhadaŭ, što padobny dośvied majecca ŭ inšych haradach i krainach. Sakretnym zastajecca i krynica finansavańnia — na dadzieny momant servisy dziaržzakupak nie ŭtrymlivajuć tendaraŭ na zakupku padśviatleńnia.
Vierahodna, staršynia harvykankama Pryvałaŭ ubačyŭ takuju iluminacyju ŭ adnym z rasijskich haradoŭ. U apošnija hady ŭ mnohich abłasnych centrach Rasii na televyškach robicca padśviatleńnie. Takaja, da prykładu, jość u susiednim Bransku.
Iluminacyja vykarystoŭvajecca dla prapahandysckich metaŭ: z dapamohaj dynamičnaj padśvietki na rasijskija vyški vyvodziacca simvały rasijskaj vajny va Ukrainie, adznačajecca hadavina akupacyi Kryma.
Fłahštok znajšoŭ publikacyi ŭ miascovych rasijskich ŚMI, pryśviečanych padśvietcy mačtaŭ, padobnych na homielskuju, u Tambovie i Bracku — kab vyśvietlić, kolki kaštavali pracy, pakul tendar na padśviatleńnie ŭ Homieli jašče nie abvieščany.
Na iluminacyju 180-mietrovaj televyški ŭ Tambovie ŭ kancy 2022 hoda vydatkavali ź biudžetu amal 23 młn rasijskich rubloŭ, što vyklikała buru abureńnia miascovych žycharoŭ (383 tysiačy dalaraŭ pavodle kursu na čas ustanoŭki).
U Bracku padśviatleńnie rabili paźniej — letam 2023 hoda, i heta kaštavała ŭžo 25 młn (kala 263 tys. dalaraŭ pa kursie na toj pieryjad). Vyška ŭ Bracku — amal takaja ž pa vyšyni, jak i ŭ Homieli (196 mietraŭ), jaje iluminacyja składajecca z 8 280 śviatłodyjodnych piksielnych śviacileń i 44 pražektaraŭ.
-
Vierniki prosiać biskupa, kab jon adnaviŭ Zavalniuka na pasadzie probašča Čyrvonaha kaścioła
-
Vyhladaje, što Bondaravu zvolnili z «Kamunista Biełarusi». Ciapier jana abvinavačvaje byłych kaleh u derusifikacyi
-
«Nam pakupniki časam vočy vyjadajuć». Kolki ciapier kaštujuć siezonnyja sadavina i harodnina ŭ fiermieraŭ i ŭ kramie?
Kamientary