Što viadoma pra źniavolenych u Biełarusi hramadzian Ukrainy, jakija niečakana zdabyli volu?
Siońnia ŭviečary źjaviłasia niečakanaja viestka, što ŭładam Ukrainy ŭdałosia dabicca na pakul nieviadomych umovach vyzvaleńnia 10 svaich hramadzian, źniavolenych u Rasii i Biełarusi. Piaciora ź ich byli źniavolenyja ŭ biełaruskich turmach, i kali pra Mikołu Švieca, jaki abvinavačvaŭsia ŭ padrychtoŭcy i praviadzieńni dyviersii suprać rasijskaha samalota A-50 u Mačuliščach, raniej pisali dastatkova šmat, to inšyja čaćviora viadomyja kudy mienš. Ale ŭsie jany mieli status palitviaźniaŭ, tamu pra toje, chto jany i za što ich sudzili, źbirała infarmacyju «Viasna».
Natalla Zacharanka
44-hadovaja Natalla Zacharanka — pradprymalnica, hramadzianka Ukrainy. U pačatku lipienia 2023 hoda žycharka Čarnihava źnikła pa darozie ŭ biełaruski Mazyr, dzie žyvie jaje siastra. Tryvohu zabiła dačka žančyny: numary i kantakty maci paśla pierasiačeńnia polska-biełaruskaj miažy stali niedasiažnyja, a aficyjnyja orhany maŭčali.
Vyśvietliłasia, što žančynu zatrymali i abvinavačvali ŭ špijanažy na karyść Ukrainy pavodle art. 358 KK. Razam ź joj sudzili taksama Łarysu Krupu.
Jak paviedamlali ŭkrainskija miedyja, Natalla źjaŭlałasia vałanciorkaj, jakaja paśla pačatku vajny pieravoziła ŭ ES i Biełaruś ukrainskich uciekačoŭ, pieradavała dakumienty i leki. Viadoma taksama, što Zacharanka jeździła ŭ Biełaruś na ŭłasnym aŭtamabili.
Homielski abłasny sud mierkavana 5 sakavika 2024 hoda ŭ zakrytym režymie vynies prysud Natalli Zacharancy i Łarysie Krupa. Zacharanku abvinavacili ŭ špijanažy na karyść Ukrainy, a jaje znajomuju ŭ niedaniasieńni pra złačynstva (č. 2 art. 406 KK).
Sud pastanaviŭ pakarać ukrainku pazbaŭleńniem voli terminam na 9 hadoŭ, a taksama kanfiskavać u jaje mikraaŭtobus. Łarysa Krupa atrymała štraf u pamiery 100 bazavych vieličyń (4 tysiačy biełaruskich rubloŭ).
Pakarańnie žančyna adbyvała ŭ Homielskaj kałonii № 4.
Pavieł Kupryjenka
56 hadovaha hramadzianina Ukrainy Paŭła Kupryjenku ŭ Homielskim abłasnym sudzie 9 sakavika 2023 hoda asudzili pavodle art. 358-1 (ahienturnaja dziejnaść) i pryznačyli siem hadoŭ kałonii va ŭmovach uzmocnienaha režymu. Praces prachodziŭ u zakrytym režymie, prysud vynies sudździa Rusłan Caruk.
Taksama pa spravie za «ahienturnuju dziejnaść na karyść Ukrainy» tady asudzili žychara Homielščyny Tarasa Mačynskaha, abvinavaciŭšy jaho ŭ «zdradzie dziaržavie» (č. 1 art. 356 KK), i prysudzili 10 hadoŭ kałonii va ŭmovach uzmocnienaha režymu. Jašče adnaho fihuranta toj spravy, 32-hadovaha Dźmitryja Sałaviančyka, pryznali vinavatym va «ŭkryvalnictvie śladoŭ ciažkaha złačynstva» (č. 1 art. 405 KK) i pryznačyli štraf u pamiery 400 bazavych vieličyń (14 800 rubloŭ).
U Kupryjenki i Mačynskaha taksama kanfiskavali telefony.
Ludmiła Hančarenka
Pra hetu 44-hadovuju žančynu viadoma tolki toje, što jana była asudžanaja pa art. 358-1 KK (ahienturnaja dziejnaść). Pravaabaroncam nie ŭdałosia zdabyć navat jaje fota.
19 śniežnia 2023 hoda spravu Hančarovaj u zakrytym režymie razhledzieŭ sudździa Jaŭhien Šaršnioŭ, a kolki hadoŭ źniavoleńnia jana atrymała, tak i nie było viadoma.
Kaciaryna Bruchanava
30-hadovaja Kaciaryna Bruchanava rodam z horada Chierson. Jana advučyłasia ŭ Kitai, skončyła tam univiersitet u 2015 hodzie, a ŭ 2016 hodzie pierajechała ŭ Biełaruś. U Biełarusi pracavała pierakładčycaj z kitajskaj.
Kaciarynu zatrymali, kali jana prachodziła biełaruskuju miažu. Ad jaje zapatrabavali dać na pravierku telefon, jana padała jaho supracoŭnikam razam z parolami. Biełaruskija siłaviki znajšli, što 30 sakavika 2022 hoda jana adpraviła dva videa ŭ čat-bot redakcyi vydańnia «Lusterka». Na videa było pieramiaščeńnie rasijskaj vajskovaj techniki pad Minskam, jakoje jana sama źniała.
Žančynu abvinavacili pavodle č. 1 art. 361-4 Kryminalnaha kodeksu (sadziejničańnie ekstremisckaj dziejnaści). Sud nad Kaciarynaj adbyŭsia ŭ kastryčniku 2023 hodu ŭ Bresckim abłasnym sudzie. Viadoma, što dla jaje zaprasili dva z pałovaj hady kałonii. Taki prysud i vynies 13 kastryčnika 2023 hoda sudździa Andrej Siz.
Pakarańnie žančyna adbyvała ŭ Homielskaj kałonii № 4.
Kaho z palitviaźniaŭ mohuć vypuścić paśla anonsu Łukašenki?3
Kaho z palitviaźniaŭ mohuć vypuścić paśla anonsu Łukašenki?
«Kadebist u čornych skuranych palčatkach zadavaŭ pytańni, i kali ja nie adkazvała, pačynaŭ mianie dušyć»11
Kamientary
(U akupavanaj Danieckaj vobłaści kiruje ŭradženiec Ukrainy Dzianis Pušylin, kiraŭnik tak zvanaj DNR. Nikomu ŭ hałavu nie pryjdzie nazyvać Pušylina "ukrainskaj uładaj, ukrainskim režymam", choć jon sam pachodzić z Ukrainy i kiruje častkaj Ukrainy. Pušylin heta kiraŭnik akupacyjnaj administracyi.)
Toje ž samaje i Łukašenka. Heta akupacyjnaja administracyja, režym - prarasiejski. Ad samaha pačatku na vyšejšych kiraŭničych pasadach pry Łukašenku byli rasiejcy: Urał Łatypaŭ, Jury Žadobin, Uładzimir Zamiatalin, Andrej Kabiakoŭ i hetak dalej. Pahladzicie ŭ Vikipiedyi ich bijahrafii, chto jany.