Łamin Jamal: jak školnik ź biednaha katałonskaha rajona staŭ najlepšym raspasoŭščykam Jeŭra

Jamal, pravy vinhier «Barsiełony», naradziŭsia 13 lipienia 2007-ha ŭ katałonskim haradku Espłuhies-de-Ljobrehat, što niedaloka ad Barsiełony. Baćka chłopca — marakaniec, a maci — uradženka Ekvataryjalnaj Hviniei. Jon ličyć siabie patryjotam usich troch krain — i Ispanii, i zhadanych vyšej afrykanskich dziaržaŭ.

U rańnim dziacinstvie siamja Jamala niekalki razoŭ pierajazdžała z adnaho horada ŭ inšy. Niejki čas jany pražyli ŭ Rakafondzie, šmatkulturnym pryharadzie katałonskaha horada Matara, dzie amal 50% žycharoŭ znachodziacca na miažy biednaści. Tam šmat chto pamiataje jarkaha chłopčyka, a sam jon addaje pavahu svajmu rajonu, kali śviatkuje zabityja hały — u takija momanty Jamal pakazvaje na palcach 304, apošnija ličby paštovaha indeksu Rakafondy.

Jašče tady jon pačaŭ hrać u futboł. Chłopiec zhadvaje, što ŭ dziacinstvie jaho jak samaha małoha pastajanna stavili hrać u bramu: «Časta atrymlivaŭ miačom pa tvary, ale heta nie prynosiła bolu. Ja nie płakaŭ, chacia zaŭždy prychodziŭ dachaty ź siniakami».

Kali Łaminu było siem, jon trapiŭ u «Ła Masiju» — znakamituju futbolnuju akademiju kłuba «Barsiełona», dzie talenavitaha hulca chutka zaŭvažyli. U kožnaj z kamand «Ła Masii», dzie tolki hulaŭ Łamin, jon pakazvaŭ vydatnyja vyniki. Trenier Albiert Puih, jaki pracavaŭ ź Jamalem u dźviuch dziciačych kamandach, raskazvaŭ:

«Bolš za ŭsio mianie ździviła nie toje, što jon užo mieŭ našmat lepšy ŭzrovień za inšych hulcoŭ u abiedźviuch kamandach. Kali prajšoŭ čas, uzrovień nie vyraŭniaŭsia, jak heta zvyčajna byvaje, a Łamin pačaŭ vyłučacca jašče bolej».

U «Ła Masii» zvyčajna dazvalajuć žyć tolki hulcam, jakija pryjechali z-za miežaŭ Katałonii. Ale Łamina ŭsio roŭna paprasili pierajechać u akademiju, kab pryhladać za asablivym talentam: kantralavać jaho dyjetu, treniroŭki i adpačynak, a taksama dapamahčy jamu skancentravacca na hulni. Častkova heta možna patłumačyć tym, što Łamin razam z baćkam jeździŭ u «Ła Masiju» na ciahniku, i heta zajmała bahata času — nie lepšyja ŭmovy dla raźvićcia.

Sapraŭdny praryŭ zdaryŭsia z chłopcam paru hadoŭ tamu. U siezonie 2022/2023 Łamin, jakomu tady było 15, trapiŭ u junackuju kamandu «Barsiełony» (da 19 hadoŭ), što na niekalki hadoŭ apiaredziła jaho ŭzrost. A ŭ vieraśni 2022-ha trenier hałoŭnaj kamandy «Barsiełony» Chavi paklikaŭ Łamina i niekatorych inšych hulcoŭ ź junackich kamand treniravacca ź pieršaj kamandaj. 

Jamu nie daviałosia doŭha čakać debiutu za jaje: 29 krasavika 2023 hoda Łamin vyjšaŭ na pole na zamienu ŭ hulni z «Biecisam». 15-hadovy chłopiec akazaŭsia najmałodšym debiutantam «Barsy» za apošniaje stahodździe! Ciapier jon maje kantrakt z «Barsaj» da 2026-ha, suma mahčymaha vykupu — 1 miljard jeŭra.

Što da ispanskaj zbornaj, Łamin upieršyniu vyjšaŭ na pole za darosłuju kamandu 8 vieraśnia 2023-ha i tady zabiŭ hoł u matčy z Hruzijaj.

20% žycharoŭ Rakafondy, dzie jon žyŭ u dziacinstvie, — marakancy, jak i baćka Jamala. Chłopiec mieŭ mahčymaść trapić u zbornuju Maroka zamiest hulni za Ispaniju, i futbolnyja fiederacyi abiedźviuch krain surjozna za jaho zmahalisia i cisnuli na junaka. 

Ale ž Jamal abraŭ macniejšuju zbornuju, to-bok ispanskuju, i pakul što zdoleŭ u joj nie zhubicca. U hulni z Charvatyjaj Łamin zrabiŭ halavy pas, i znoŭ pabiŭ rekord — staŭ najmaładziejšym hulcom u historyi Jeŭra, chto adznačyŭsia hetym. I heta nie kažučy pra toje, što Łamin uvohule najmaładziejšy hulec u historyi Jeŭra.

U matčy z Hruzijaj Jamal addaŭ jašče adnu halavuju pieradaču. Z asistentami na sioletnim Jeŭra niejak słabavata, tamu ź dźviuma pieradačami małady ispaniec uznačalvaje rejtynh najlepšych raspasoŭščykaŭ. Na takim ža ŭzroŭni, jak i jon, trymajecca jašče vosiem futbalistaŭ. 

Za dzień da finału sioletniaha Jeŭra jamu spoŭnicca 17. Pahladzim, ci zmoža jon razam z partniorami pa zbornaj zabiaśpiečyć sabie samy topavy padarunak — prachod u hałoŭny matč čempijanatu i čempijonski kubak.

• 9
• 1
• 0
• 0
• 0
• 1
• 1
• 0