Pravacentrysckaja Jeŭrapiejskaja narodnaja partyja lidziruje na vybarach u Jeŭraparłamient, ale pazicyi ŭmacoŭvajuć ultrapravyja

Druhoje miesca zojmuć sacyjał-demakraty, atrymaŭšy 135 miescaŭ. Libieralna-centrysckaje abjadnańnie ALDE atrymaje 82 miescy. Pravakansiervatyŭnaja partyja «Jeŭrapiejskija kansiervatary i refarmisty» (ECR) — 71 miesca. Pravaradykalnaja partyja «Identyčnaść i demakratyja», skaročana — ID Party, uzmocnić svaje pazicyi, atrymaŭšy 62 miescy. Najbolšyja straty paniasuć «zialonyja».

Pravacentryscki Chryścijanska-demakratyčny sajuz, da jakoha naležyć kiraŭnica Jeŭrakamisii Ursuła fon der Lajen, daminuje ŭ Hiermanii, samaj hustanasielenaj krainie ES, amal na 30% apiaredžvajučy Sacyjał-demakratyčnuju partyju fiederalnaha kanclera Ołafa Šolca, jakaja apuściłasia da 14 %, sastupiŭšy navat krajnie pravaj «Alternatyvie dla Hiermanii». Prahnozy niamieckich hramadskich viaščalnikaŭ ARD i ZDF zaśviedčyli, što «Alternatyva dla Hiermanii», abo AfD, ciapier budzie mieć 16,5%, u paraŭnańni z 11% u 2019 hodzie. Sukupny vynik troch partyj, jakija ŭvachodziać u kiroŭnuju kaalicyju Hiermanii, ledź pieravysiŭ 30%.

U Hiermanii adsotak deputataŭ ad Partyi «Zialonych», pavodle prahnozaŭ, upadzie z 20 da 12%, a ŭ Francyi i niekatorych inšych krainach ES partyi hetaha tołku čakajuć jašče bolšyja straty. Ich paražeńnie moža paŭpłyvać na ahulnuju palityku ES u śfiery baraćby z klimatyčnymi źmienami.

U Hiermanii ultrapravaja partyja «Alternatyva dla Hiermanii» zaniała druhoje miesca, nabraŭšy 16,5% hałasoŭ (u 2019-m partyja atrymała 11%), miarkujučy pa dadzienych ekzit-poła, apublikavanych hramadskaj viaščalnaj kampanijaj ARD.

U Aŭstryi, chutčej za ŭsio, pieramoža krajnie pravaja «Partyja svabody». Pra heta śviedčać apublikavanyja ŭviečary ŭ niadzielu vyniki apytańniaŭ, praviedzienych u apošni tydzień.

U Niderłandach, dzie hałasavańnie prajšło ŭ čaćvier, vyniki apytańniaŭ pakazali, što antyimihracyjnaja partyja nacyjanalista Hiejerta Viłdersa atrymaje 7 z 29 miescaŭ u Asamblei ES, h. zn. tolki na adno miesca mienš, čym u aljansa sacyjał-demakrataŭ i «zialonych».

Pavodle papiarednich acenak, na vybarach u Polščy ŭradavaja Hramadzianskaja kaalicyja atrymała kala 38%, Kansiervatyŭnaja partyja «Prava i spraviadlivaść» maje kala 34%, krajnie pravaja «Kanfiederacyja» — kala 12%.

U Ispanii najbolš nabiraje kansiervatyŭnaja Narodnaja partyja (kala 32%), na druhim miescy Sacyjalistyčnaja partyja, jakaja ciapier va ŭładzie (kala 30%), na trecim miescy krajnie pravaja partyja Vox (kala 10%).

Hałasujučy ŭ Fłandryi, premjer-ministr Bielhii Alaksandr de Kro (Bielhija ciapier staršyniuje ŭ ES) papiaredziŭ, što Jeŭropa znachodzicca «na rostaniach» i «pad ciskam, jak nikoli».

• 12
• 0
• 0
• 4
• 3
• 5
• 4
• 0