«Heta harantyja dla ŭsioj majoj palihamnaj siamji». Biełarusy raskazali, čamu prosiać daviedki ad lekaraŭ u svaich seks-partnioraŭ
Vydańnie CityDog.io daviedałasia ŭ biełarusaŭ, jakija prosiać daviedki pra infiekcyi, navošta jany heta robiać i nakolki ŭvohule heta norma ŭ Biełarusi.
Mikita (32 hady): «Daviedka patrebnaja, kab zachavać zdaroŭje ŭ palihamnych adnosinach»
«Ja pačaŭ prasić daviedki, kali ŭstupiŭ u palihamnyja adnosiny. U kabiniecie ŭ psichołaha my z partniorkaj padpisali ŭmoŭny «pakt», što budziem prasić miedycynskuju vypisku va ŭsich, z kim u nas patencyjna moža być seks. Tak spakajniej nie tolki nam abodvum, ale i ŭsioj našaj vialikaj «siamji».
Za apošni hod u mianie nie było seksu ź nieadekvatnymi ludźmi. Kožny raz, kali ja abo partniorka pytalisia pra daviedki, usie reahavali narmalna. Samyja aśviečanyja sami zdajuć analizy minimum raz u paŭhoda, maksimum (idealna) — paśla kožnaha novaha partniora. Mienavita tamu ja ni razu nie sutykaŭsia ź niehatyŭnaj reakcyjaj na padobnuju prośbu.
Sami my zdajem analizy z kožnym novym partnioram. Čaściej niama patreby».
Kola (20 hadoŭ): «Prasić daviedku pra zdaroŭje pavinna stać normaj»
«Mnie zdajecca absalutna łahičnym prasić daviedku pra infiekcyi ŭ patencyjnaha pałavoha partniora. Mnie nie chočacca vypadkova zarazicca, a zatym doŭha lačycca i addavać lekaram usie svaje hrošy. U mianie ŭžo byŭ taki vopyt, i mnie heta nie spadabałasia.
Hadoŭ u 14 na adnym z prafiłaktyčnych pryjomaŭ va ŭrołaha ŭ mianie vyjavili prablemy pa pałavoj častcy. Ja mučyŭsia ź imi niekalki hadoŭ, pakul kančatkova nie vylečyŭsia. Lekary dahetul nie da kanca razumiejuć, što heta było. Ryzykavać svaim zdaroŭjem znoŭ ja nie hatovy.
Nichto z papiarednich partnioraŭ nikoli nie reahavaŭ niehatyŭna. Dla mianie zaŭsiody niajomka havaryć na hetuju temu, ale ŭsie vydatna razumieli važnaść zapytu i zaŭsiody išli nasustrač».
Alaksandra (28 hadoŭ): «Kali b u partniora byli niejkija pałavyja zachvorvańni, to ja sto razoŭ padumała b, ci treba mnie być z takim čałaviekam»
«Pieršy raz ja paprasiła daviedku, kali zadumałasia, što chaču kłasnych adnosin. Jany nie mohuć być pabudavanyja pa pryncypie «avoś i tak abydziecca», tamu dla mianie daviedka była važnym punktam. Chłopiec adreahavaŭ pazityŭna, z pavahaj. Praz peŭny čas i ja, i jon pakazali adzin adnamu zaklučeńnie ad daktaroŭ.
Napeŭna, tut byŭ upłyŭ seks-ed-błohaŭ. Ale ŭ mianie taksama była śviadomaść taho, što prasić daviedku pra infiekcyi i dbać pra svajo zdaroŭje — adekvatnaja reč. Za zdaroŭjem, a ŭ emihracyi asabliva, treba sačyć.
Radaja, što ŭ mianie nie było vypadkaŭ, kali ŭ partniora byli niejkija pałavyja zachvorvańni. Adnak kali b ja pra ich daviedałasia, to sto razoŭ padumała b, ci treba mnie być z takim čałaviekam. Kali jon pra svoj stan nie dbaje, to što budzie z maim?
Mnie zdajecca, što pamiž ludźmi ŭ adnosinach treba vybudoŭvać miežy. Tady ŭ śviecie budzie bolš ščaślivych i zdarovych ludziej. Pierad seksam pavinna być kamunikacyja. Ja ź vioski, a tam pra heta nie pryniata razmaŭlać. Tam pracuje inšaja schiema: kali ty ŭśmichaješsia chłopcu abo zhadžaješsia na špacyr, to majecca na ŭvazie, što ty aŭtamatyčna ŭžo addałasia hareźlivamu mača. Razumieju, što tak być nie pavinna».
Marharyta (24 hady): «Daviedka — heta pakazčyk dobraha staŭleńnia da mianie»
«Adnojčy ŭ adnaho z maich pałavych partnioraŭ znajšli papiłoma-virus. Heta nie strašnaja chvaroba, jakaja jość amal va ŭsich ludziej. Ale ja ŭsio roŭna vielmi spužałasia i pačała dumać, što seksualnaje žyćcio moža być sapraŭdy niebiaśpiečnym.
Plus kali sprava dachodzić da aralnaha seksu, zvyčajna nichto miniet z preziervatyvam nie robić. Ja niejak sprabavała: takoje adčuvańnie, byccam ty sprabuješ źjeści humovyja boty. Heta nivodnamu z bakoŭ nie pryjemna. Tamu dla mianie lepiej i praściej znajści partniora z daviedkaj, ź jakim ja budu adčuvać biaśpieku i nie chvalavacca ŭ pracesie.
Jašče adzin punkt — košt lačeńnia. Tańniej budzie adzin raz paprasić daviedku, čym potym źbirać vializnyja sumy, kab vylečycca. Heta nierazumnyja traty, asabliva kali ty emihrantka.
Amal nichto nie admaŭlaŭsia prynieści daviedku. Byŭ adzin chłopiec, jaki skazaŭ, što jon nie budzie jaje rabić, i zapeŭniŭ mianie, što jon i tak zdarovy. Tady my damovilisia, što seks u nas budzie, ale vielmi aściarožny: jon budzie kranacca rukami tolki svaich hienitalij, ja taksama tolki svaich, abaviazkova prysutničaŭ preziervatyŭ. Nie skažu, što heta kiepski dośvied, ale jon usio roŭna nikoli nie paraŭnajecca ź biaśpiečnym i dynamičnym seksam.
Astatnija partniory zaŭsiody razumieli, čamu važna prynosić daviedku. Mnohija i sami chodziać pa daktarach, kab zdać analizy. Tyja, chto tak nie robić rehularna, usio roŭna nikoli nie reahavali na prośbu drenna.
Kali b ja daviedałasia pra chvarobu partniora, napeŭna, adrazu nie panikavała b. Jak čałaviek, jaki adnojčy pieražyŭ karostu, prusakoŭ i vošaj, ja razumieju, što heta moža być nijak nie źviazana z čyścinioj čałavieka. Infiekcyi ja ŭsprymaju jak parazitaŭ, ad jakich časam niemahčyma schavacca. Kali ty karystaješsia hramadskim transpartam, jość vierahodnaść zachvareć na hryp. Kali ty viadzieš aktyŭnaje pałavoje žyćcio, jość vierahodnaść padchapić pałavuju chvarobu. Heta narmalna.
U lubym vypadku daviedka dla mianie — heta pakazčyk dobraha staŭleńnia da mianie. Kali čałaviek admaŭlajecca jaje davać, značyć, jon niedastatkova pavažaje mianie i maje miežy. Daviedka — svojeasablivy test, jaki dapamahaje na rańnich etapach zrazumieć, jak u dalejšym da ciabie budzie stavicca partnior».
Lizavieta (24 hady): «Samaja vialikaja prablema ŭ daviedkach pra infiekcyi ŭ tym, što jany kaštujuć hrošaj»
«Dźvie maje najlepšyja siabroŭki vučylisia na miedycynskim fakultecie i davoli mocna ŭpłyvali na maje mierkavańni datyčna roznych chvarob. Spačatku mnie było niejak niajomka prasić daviedki, ale siabroŭki praciahvali kazać pra važnaść analizaŭ, i pastupova ja ŭsio ž pačała ich prasić.
Ciapier ja žyvu ŭ Hruzii. Tut usie narmalna reahujuć na prośbu pra daviedku. Časam uźnikajuć pytańni nakont koštu analizaŭ, ale možna znajści śpiecyjalnyja arhanizacyi, dzie možna ŭsio zrabić biaspłatna. Ich ja b raiła asobna šukać pa łakalnych čatach tam, dzie vy žyviacie. Naprykład, časta padobnyja pasłuhi akazvajuć kvir-arhanizacyi.
Mianie zabaŭlajuć momanty, kali vy z čałaviekam tolki paznajomilisia i pačynajecca etap aktyŭnaha flirtu. Potym uźnikaje momant, kali treba ŭdakładnić pra chvaroby i daviedki. Heta nie zaŭsiody zručna rabić, ale nichto nikoli nie reahavaŭ ź niehatyvam».
Kamientary
Oni nie očień chorošo izučieny i vchodiat v tak nazvannuju fłoru połovych orhanov.
A ich vrači nie fiksirujut, sčitaja ich biezopasnymi dla zdorovja.
Biesporiadočnyj sieks vriedit zdorovju i razrušajet moral.