Rasija prapanuje źmianić čatyry pazicyi adzinaha mytnaha taryfu

Rasija ŭniesła ŭ Kamisiju Mytnaha sajuza prapanovy ab źmienie čatyroch pazicyj adzinaha mytnaha taryfu, jaki pačaŭ dziejničać 1 studzienia 2010 hoda.

Pra heta paviedamiŭ žurnalistam u Maskvie dyrektar zvodnaha departamienta analizu i rehulavańnia źniešnieekanamičnaj dziejnaści Minekanamraźvićcia Alaksiej Lichačoŭ.

«My ŭnieśli prapanovy pa źmienie adzinaha taryfu. Pakul jany nakiravany ŭ Kamisiju Mytnaha sajuza. Pakul aficyjna prapanovy nie pastupali ŭ Kazachstan i Biełaruś», — cytuje čynoŭnika RIA Novosti.

Pavodle słoŭ Lichačova, Rasija prapanuje pavysić mytny taryf na aptyčnyja polikarbanaty (vykarystoŭvajucca jak škłopadobnaje pakryćcio) z 0 da 5% u suviazi z raźvićciom rasijskaj vytvorčaści hetych materyjałaŭ i ŭ metach abarony miascovych vytvorcaŭ. Akramia taho, prapanujecca źnizić taryf z 15 da 5% na niekatoryja vidy papiery i kardonu, bo ŭ vytvorčaści hetych tavaraŭ, naadvarot, adbyvajecca tarmažeńnie inviestycyjnych prajektaŭ. Taksama padrychtavany prapanovy pa ŭvozie trapičnych alejaŭ — pavieličeńnie pošliny ŭ častcy śpiecyfičnaha składnika i ŭviadzieńnie novaj namienkłatury hetaha vidu tavaraŭ.

Pavodle słoŭ Lichačova, mytnyja pradstaŭniki Rasii, Biełarusi i Kazachstana źbiarucca 25 studzienia, kab abmierkavać u tym liku i hetyja prapanovy. A 27 studzienia projdzie pasiadžeńnie Kamisii Mytnaha sajuza, u paradak jakoha ŭklučana pytańnie ab źmienie mytnych pošlin.

Jak paviedamlałasia raniej, Kamisija Mytnaha sajuza razhledzić taksama pytańnie ab praporcyjach raźmierkavańnia ŭvaznych pošlin pamiž biudžetami ŭdzielnikaŭ Mytnaha sajuza.

Pavodle słoŭ Lichačova, isnujuć try padychody dla raźmierkavańnia pošlin: pieršy — pa abjomach płaciažoŭ, jakija źbirajucca, druhi — pa abjomach impartu, treci — da papiarednich dadajucca niejkija makraekanamičnyja pakazčyki, naprykład VUP.

Lichačoŭ adznačyŭ, što hetyja try padychody pryblizna dajuć praporcyju, pry jakoj 90% płaciažoŭ zaličvajucca ŭ rasijski biudžet, 6% — u biełaruski i 4% — u biudžet Kazachstana. «Ja b pakul staviŭsia da hetaha jak da niejkaha virtualnaha prykładu. Treba razumieć, što kožnaja dziesiataja dola pracenta — heta miljony rubloŭ, i treba razumieć, što nie budzie ŭzhodniena hetaja ličba, pakul nie projduć nie tolki ŭnutryrasijskija ŭzhadnieńni, ale i hałoŭnaje — pakul jany nie buduć uzhodnieny z kazachstanskim i biełaruskim bakami», — skazaŭ jon. Pry hetym rasijski čynoŭnik dadaŭ, što «pieramovy buduć surjoznyja».

BiełaPAN

• 0
• 0
• 0
• 0
• 0
• 0