«Pajści na pryncyp i padklučyć Kitaj». Łatuška zaklikaŭ dla spynieńnia represij pierakryć hruzavy čyhunačny ruch ź Biełaruśsiu
Na dumku Paŭła Łatuški, na cisk Łukašenki treba adkazvać jašče bolšym ciskam.
![Pavieł Łatuška Pavieł Łatuško Pavel Latushko](http://d3kcf2pe5t7rrb.cloudfront.net/img/w840d4webp1/photos/z_2024_04/imgonline-com-ua-resize-lcoqakjlwohjvk-lqkbp.jpg.webp)
Kiraŭnik Narodnaha antykryzisnaha ŭpraŭleńnia (NAU) Pavieł Łatuška apublikavaŭ artykuł u Gazeta Wyborcza, pryśviečany situacyi z palitźniavolenymi ŭ Biełarusi. U joj palityk vykazaŭ svajo bačańnie nieabchodnych dziejańniaŭ dla ich vyzvaleńnia. Sa źmiestam artykuła Łatuška znajomić u svaim jutub-kanale.
Artykuł vyjšaŭ u dzień naradžeńnia žurnalista, pradstaŭnika polskaj nacyjanalnaj mienšaści Biełarusi Andreja Pačobuta. Łatuška nahadvaje, što za kratami Pačobut znachodzicca zvyš troch hadoŭ i nazyvaje jaho zakładnikam režymu Łukašenki.
Palityk raskazvaje polskamu čytaču ab tym, što na siońnia viadoma pra śmierć šaści palitźniavolenych u Biełarusi, a taksama pra tych, pra kaho ŭžo hod ničoha nie viadoma.
Sam ža Pačobut, jakoha pryhavaryli da 8 hadoŭ kałonii ŭzmocnienaha režymu, niahledziačy na prablemy z sercam, izalacyju, pazbaŭleńnie pieradač, źmiaščeńnie ŭ PKT i štrafny izalatar, nie raz admaŭlaŭsia pisać Łukašenku prašeńnie ab pamiłavańni.
Łatuška źviartaje ŭvahu, što, niahledziačy na ŭsie dypłamatyčnyja namahańni, roznyja rezalucyi mižnarodnych arhanizacyj, zakryćcio šerahu pahranpierachodaŭ z patrabavańniem vyzvalić Pačobuta i inšych palitviaźniaŭ — pomślivy Łukašenka nie robić hetaha.
Biełaruski palityk stavić šerah pytańniaŭ: jak doŭha buduć praciahvacca represii ŭ Biełarusi, ździeki i katavańni? Jak doŭha Łukašenka budzie praciahvać nabirać i ŭtrymlivać zakładnikaŭ? Jak doŭha budzie praciahvacca hibrydnaja ahresija Łukašenki suprać Polščy i inšych krain ES?
Dla adkazu na hetyja pytańni, na jaho pohlad, patrebna mahutnaja palityčnaja vola.
«Dyktatar razumieje tolki adnu movu — movu pryncypovaści i siły. Movu jašče bolšaha cisku. Jaho nie strašać aharodža na miažy i zakrytyja pahranpierachody.
Mahčymaść dla pieramiaščeńnia prostych biełarusaŭ jaho ŭ pryncypie nie kłapocić. A dakładniej — jaho zadavolać całkam zakrytyja dla takoha pierasoŭvańnia miežy. Nie tak užo pałochajuć jaho i biahučyja handlovyja sankcyi i abmiežavalnyja paŭmiery, bo jany majuć abmiežavany charaktar», — miarkuje Łatuška.
Na pohlad palityka, dla taho, kab vyzvalić Andreja Pačobuta i tysiačy inšych palitviaźniaŭ, prymusić jaho spynić ataki nielehalnymi mihrantami, nieabchodna «pajści na pryncyp i adkazać na cisk Łukašenki jašče bolšym ciskam, padklučyŭšy da vyrašeńnia prablemy Łukašenki jašče i Kitaj — całkam pierakryŭšy hruzavyja znosiny ź Biełaruśsiu, u tym liku čyhunačnyja».
U kancy palityk havoryć:
«Andrej Pačobut siońnia ŭsim nam daje sihnał, što svaboda dla ŭsioj krainy ŭ centry Jeŭropy važniejšaja, čym svaboda dla adnaho. Treba pajści na pryncyp, kab u Andreja Pačobuta i jašče ŭ tysiačy zakładnikaŭ Łukašenki źjaviŭsia realny šaniec na svabodu, bo svaboda i baraćba za jaje zaŭsiody pavinny być spravaj pryncypu».
I ŭrešcie zadaje pytańnie, ci hatovyja my pryniać i ažyćciavić hety pryncyp — «adzin za ŭsich, a my ŭsie za adnaho».
Kamientary
Kitaj sam represii pravodzić - ujhuraŭ. Kali Kitaj ustupicca za biełaruskich palitviaźniaŭ, to da samoha Kitaja paŭstanie pytańnie: vyzvalić ujhuraŭ z kitajskich kancłahieraŭ.