Apublikavanaja pierapiska supracoŭnika FSB, jaki sačyŭ za biełarusami
Chto ź biełarusaŭ patrapiŭ u pole zroku?
U rasparadžeńni vydańnia «Mieduza» akazałasia pierapiska supracoŭnika ŭpraŭleńnia FSB pa abaronie kanstytucyjnaha ładu Siarhieja Dubava za pieryjad sa śniežnia 2007-ha (tady jon jašče byŭ studentam) pa krasavik 2022 hoda.
Jak śćviardžaje vydańnie, karjeru ŭ śpiecsłužbie Dubaŭ pačaŭ z taho, što sačyŭ za «nacyjanalnymi mienšaściami». Pad vyhladam studenta ci «zacikaŭlenaha słuchača» chłopiec prychodziŭ na mierapryjemstvy, u jakich udzielničali pradstaŭniki biełaruskaj i ŭkrainskaj dyjaspary. Jon nie tolki słuchaŭ ich vystupleńni, ale i źbiraŭ bazu karysnych kantaktaŭ.
Siarod ich byŭ staršynia hramadskaj arhanizacyi «Fiederalnaja nacyjanalna-kulturnaja aŭtanomija biełarusaŭ Rasii» (FNKA) Siarhiej Kandybovič.
Ź pierapiski vynikaje, što Kandybovič viedaŭ, što Dubaŭ pracuje ŭ śpiecsłužbie, i śviadoma dapamahaŭ.
Kandybovič šmat hadoŭ pierasyłaŭ jamu svaju pracoŭnuju pierapisku sa znajomymi biełarusami i ŭzhadniaŭ ź im teksty svaich vystupaŭ ab uzajemaadnosinach dźviuch krain.
U adkaz supracoŭnik FSB narakaŭ, što i ŭ Rasii, i ŭ Biełarusi «prapahandujucca jeŭrapiejskija kaštoŭnaści», padkreślivaŭ, što ruskija i biełarusy — heta «adzin narod» i prasiŭ Kandyboviča čaściej publična kazać ab «sprobach nacyjanalistyčnych sił sfalsifikavać histaryčnaje minułaje».
«Maja zadača — nie dapuścić razmyvańnia idei pabudovy Sajuznaj dziaržavy», — cytuje vydańnie pierapisku Dubava.
U sakaviku 2018-ha Dubaŭ i Kandybovič uzhadnili tekst paklopu na polskaha žurnalista Tomaša Maciejčuka, jaki vyznačaŭsia svaimi praŭkrainskimi vystupami padčas tok-šou na rasijskich kanałach. Sam ža Dubaŭ na momant składańnia danosu mieŭ zaklučeńnie ekśpiertyzy dopisaŭ Maciejčuka va «UKantakcie». Śpiecyjalist, jakaja składała dakumient, taksama ŭzhadniała tekst z feesbešnikam.
U vyniku praź niekalki miesiacaŭ pa rasijskim adrasie Maciejčuka prajšoŭ pieratrus, a samomu žurnalistu zabaranili ŭjezd u Rasiju.
Vydańnie adznačaje, što Dubaŭ nieadnojčy atrymlivaŭ niepasredna ad administracyi «UKantakcie» infarmacyju ab kantaktach, jakija jaho cikavili.
Da raboty pa «abaronie» kanstytucyjnaha ładu supracoŭnik FSB dałučaŭ i inšych ludziej, ź jakimi znajomiŭsia. Naprykład, małaviadomamu padmaskoŭnamu žurnalistu Ivanu Anisimavu jon daručyŭ uvajści ŭ davier da biełarusa Ivana Sopava, jaki pad nikam «Hienrych Lićvin» byŭ administrataram takich supołak «UKantakcie», jak «Histaryčnyja i palityčnyja sprečki» i «Bałta-Čarnamorski sajuz».
«Zmožaš jamu siabram stać, spačatku šlacham pierapiski? Pamacać znutry hetaha šnyra? Kali da ich padkraścisia, budzie šykoŭna», — cytuje vydańnie vytrymku ź pierapiski Dubava z Anisimavym u studzieni 2015-ha.
Praŭda, apieracyja chutka pravaliłasia. Jak pryznaŭsia ŭ adnym z elektronnych listoŭ Anisimaŭ, jon napiŭsia i staŭ pisać Sopavu roznuju łuchtu. U vyniku jaho zabanili. Ale na vynik spravy heta nie paŭpłyvała. U mai 2016-ha Sopaŭ byŭ zatrymany. Paźniej jaho ŭklučyli ŭ «pieralik terarystaŭ i ekstremistaŭ», ale zatym vyklučyli.
Čytajcie jašče:
«Słova pacana» i inšyja rasijskija chity zdymali ŭ ramkach padtrymki Pucina na vybarach
Kreml razasłaŭ muzyčnym pradziusaram novy čorny śpis rasijskich muzykaŭ. Ich ažno paŭsotni
«Ciabie b baćka praklaŭ»: maci fihuranta «małočnaj spravy» prabiłasia na spatkańnie ź im, kab ślozna paprasić nie supracoŭničać sa śledstvam3
Kamientary