Ukraina zajaviła ab stvareńni łaziernaj zbroi «Tryzub». Što heta moža być?
Kamandujučy siłami bieśpiłotnych sistem USU Vadzim Suchareŭski zajaviŭ, što va Ukrainy źjaviłasia ŭłasnaja łaziernaja zbroja. Da hetaha času ab hetaj raspracoŭcy ničoha viadoma nie było, a pierśpiektyŭnyja ŭzory bajavych łazieraŭ majuć tolki niekalki krain. Što ž ujaŭlaje saboj łazierny «Tryzub», piša Ukrainskaja słužba Bi-bi-si.
«Siońnia Ukraina źjaŭlajecca, kali nie pamylajusia, piataj krainaj, jakaja moža skazać, što ŭ jaje jość [bajavy] łazier. My ŭžo na vyšyni bolš za dva kiłamietry hetym łazieram možam źbivać samaloty», — skazaŭ Suchareŭski.
Suchareŭski zrabiŭ hetuju zajavu 16 śniežnia na kanfierencyi, pryśviečanaj pierśpiektyvam supracoŭnictva jeŭrapiejskaj i ŭkrainskaj vajennaj pramysłovaści. Pa słovach kamandujučaha siłami bieśpiłotnych sistem, ukrainskaja raspracoŭka nazyvajecca «Tryzub». Zaraz idzie praca nad jaje maštabavańniem i ŭzmacnieńniem.
Z karotkaj zajavy Suchareŭskaha nie było zrazumieła, jak vyhladaje hetaja zbroja, jakija jaje charaktarystyki, i ci vypraboŭvali jaje ŭ bajavych umovach.
Raspracoŭvać bajavyja łaziery viadučyja dziaržavy pačali jašče 60-70 hadoŭ tamu. Ideja atrymać adnosna niedarahuju, biezadmoŭnuju, univiersalnuju, šmatrazovuju i efiektyŭnuju zbroju była pryvabnaja dla vajennaha kiraŭnictva tahačasnych zvyšdziaržaŭ, SSSR i ZŠA.
U teoryi mahutny pramień łaziera pavinien byŭ za ličanyja siekundy prapalvać techniku praciŭnika.
Takuju zbroju možna było b užyvać i ŭ abaronie, i ŭ nastupie. Zdavałasia, što heta idealny srodak źniščeńnia. Ale na praktycy ŭsio akazałasia składaniej.
Hučnyja zajavy savieckich i amierykanskich uładaŭ ab zdolnaści źbivać rakiety i samaloty łazierami na praktycy akazvalisia tolki słovami. Doślednyja ŭzory raspracoŭvalisia, ale potym raspracoŭki chutka zhortvali z-za niedachopu finansavańnia i pierśpiektyŭ.
Kłub krain, jakija zajaŭlali, što majuć łaziernuju zbroju, nievialiki. Akramia ŭžo zhadanych ZŠA i Rasii (jak pierajemnicy SSSR), takija technałohii, vierahodna, majuć Kitaj, Brytanija, Paŭdniovaja Kareja, Japonija i Izrail.
Što ŭjaŭlaje saboj ukrainskaja łaziernaja zbroja
Nijakich danych ab raspracoŭščyku, charaktarystykach i typie ŭkrainskaha bajavoha łaziera niama. U svajoj zajavie pałkoŭnik Suchareŭski paviedamiŭ, što «Tryzub» moža źbivać samaloty na adlehłaści ŭ dva kiłamietry.
Heta davoli vialiki pakazčyk: brytanski DragonFire moža źbivać celi na adlehłaści kiłamietra. Izrailski Iron Beam maje ŭdvaja bolšuju dalokaść, ale ŭ jaho i mahutnaść łaziera — 100 kiłavat, a nie 55, jak u brytancaŭ.
Kali ŭkrainski «Tryzub» sapraŭdy moža trapić u samalot, to jon pavinien mieć sistemu fakusiroŭki i fiksacyi na cel. Naprykład, DragonFire moža fakusavacca na adlehłaści kiłamietra z dakładnaściu 23 mm.
Sa słoŭ Suchareŭskaha vychodzić, što Ukraina za karotki čas udałosia stvaryć pratatyp efiektyŭnaha bajavoha łaziera. Pry hetym stvaryć va ŭmovach infarmacyjnaj cišyni.
Ukrainski ekśpiert pa ŭzbrajeńniach i były rabotnik kancerna «Ukrabaronpram» Aleh Katkoŭ u hutarcy ź Bi-Bi-Si skazaŭ, što heta całkam mahčyma.
Katkoŭ pryvodzić niekalki arhumientaŭ. Hałoŭny ź ich: za apošnija paŭstahodździa technałohii i kampanienty dla stvareńnia łaziernaj zbroi stali bolš dastupnymi i praściejšymi.
Tamu, na jaho dumku, ukrainski VPK, a taksama pryvatny siektar, całkam mahli raspracavać uzor bajavoj łaziernaj sistemy.
«Jość vodapadzieł pamiž tym, jak ukrainskaja abaronka vyhladała da 2022 hoda, i jak jana vyhladaje ciapier. Ja absalutna nie ździŭlusia, kali vyśvietlicca, što raspracoŭka łaziernaj zbroi va Ukrainie — heta inicyjatyva i vynik pracy jakoha-niebudź pryvatnaha startapa, a nie Dziaržaŭnaha kanstruktarskaha biuro», — kaža Katkoŭ.
Ale ci efiektyŭnaja heta zbroja — heta, jak nahadvaje Katkoŭ, vielmi składanaje pytańnie, i adkaz zaležyć ad mnostva faktaraŭ. Havorka i pra vybar technałohii farmiravańnia łaziernaha promnia, i jaho fakusiroŭku na patrebnaj adlehłaści, i fiksacyi na ruchomaj celi. Plus, viadoma, vialikaja zaležnaść ad umoŭ nadvorja.
«Łaziernaja zbroja na stadyi testavaj ekspłuatacyi na samaj spravie jość u mnohich krain. Ale jość šerah pryčyn dla aściarožnaści, u pryvatnaści, toje, što nichto da hetaha času nie aprabavaŭ jaho ŭ realnych umovach. Ciapier krainy sprabujuć banalna namacać, jak mienavita jaho ŭžyvać na praktycy», — tłumačyć ekśpiert.
Na jaho dumku, kali «Tryzub» — heta nie prosta ekśpierymientalny ŭzor, kali jon stanie sieryjnym praduktam z vysokaj efiektyŭnaściu ŭ bajavych umovach, to heta budzie sapraŭdnaj revalucyjaj.
Ale ciapier kazać pra heta zanadta rana.
Dźmitryjeŭ raskazaŭ niemcam, čaho Łukašenka moža chacieć ad Jeŭropy19
Kamientary