Z sajta maskoŭskaj Vyšejšaj škoły ekanomiki źnikła staronka palitołaha Suzdalcava. Imavierna, praź pieraśled biełaruskimi ŭładami

Andrej Suzdalcaŭ rehularna vystupaŭ u praŭładnych rasijskich ŚMI, u pryvatnaści jon raspaviadaŭ pra toje, što za pratestami ŭ Kazachstanie ŭ studzieni 2022 hoda stajała Ukraina, a vyratavać Uładzimira Zialenskaha mohuć tolki pieramovy z Uładzimiram Pucinym. U studzieni MUS Biełarusi pryznała telehram-kanał Suzdalcava «ekstremisckim farmavańniem». 

Suzdalcaŭ admoviŭsia adkazać «Ahientstvu» na pytańnie, ci nie źviazana vydaleńnie profilu z sajta VŠE ź jaho zvalnieńniem z VNU.

«Dziakuj za ŭvahu da majoj ścipłaj piersony, ale ja nie daju kamientaroŭ ab svaich dziejańniach abo zachadach, jakija robiać ułady toj ci inšaj krainy da mianie. Prašu mianie zrazumieć», — napisaŭ jon u adkaz na pytańnie. 

Admoviłasia kamientavać situacyju z Suzdalcavym i dekan fakulteta suśvietnaj ekanomiki i suśvietnaj palityki VŠE Anastasija Lichačova. U razmovie pa telefonie jana skazała, što nie daje kamientary ŭ vychodnyja dni. 

Adnoj z pryčyn mahčymaha zvalnieńnia Suzdalcava moh stać jahony pieraśled uładami Biełarusi. U studzieni MUS Biełarusi ŭnios telehram-kanał Suzdalcava ŭ śpis «ekstremisckich farmavańniaŭ». 

U lutym pasoł Biełarusi ŭ Maskvie Dźmitryj Kruty anansavaŭ stvareńnie abjadnanaha rejestra terarystaŭ i ekstremistaŭ dla Rasii i Biełarusi, paśla čaho ŭ kanale Suzdalcava zjaviłasia paviedamleńnie: «Pakul nie zmožam abnaŭlać kanał. Jość prablemy». 

Praz 10 dzion u kanale vyjšła jašče adno paviedamleńnie: «Prabačcie, prablemy zachoŭvajucca. Ja ŭ Maskvie». Paśla hetaha Suzdalcaŭ publikavaŭ tolki reposty i spasyłki. 

Suzdalcaŭ žyŭ i pracavaŭ u Biełarusi z 1993 pa 2006 hod. U 2006-m jaho departavali ŭ Rasiju. Biełaruskija ŭłady patłumačyli svajo rašeńnie tym, «što Suzdalcaŭ ujaŭlaje saboj pahrozu nacyjanalnaj biaśpiecy Biełarusi». 

U žniŭni 2021 hoda Suzdalcaŭ zajaviŭ ab zvalnieńni z VŠE: «Ja tam bolš nie pracuju, tamu što mianie zvolnili za krytyku Łukašenki. Pa ŭkazańni ź Minska».

Paśla hetaha jaho staronka na sajcie VŠE była źmienienaja. Kali ŭ pačatku 2021 hoda na joj havaryłasia pra toje, što jon dacent VNU i pracuje tam z 2006 hoda, to ŭ kancy hoda na joj jon staŭ «zaprošanym vykładčykam», jaki pracuje ŭ VŠE z 2021 hoda. 

Suzdalcaŭ rehularna vystupaŭ u jakaści ekśpierta ŭ praŭładnych miedyja. U mai 2022 hoda ŭ efiry «Rasii 1» jon zajaŭlaŭ, što «vyratavać» prezidenta Ukrainy mohuć tolki pieramovy z Rasijaj, a lehitymnym Zialenski nibyta staŭ tolki paśla pieršaj telefonnaj razmovy z Pucinym. 

Suzdalcaŭ nazyvaŭ Zialenskaha zdradnikam ukrainskaha naroda. Vydańniu URA.RU Suzdalcaŭ zajaviŭ, što Ukraina zamiešanaja ŭ kazachstanskich pratestach studzienia 2022 hoda. 

Apošni raz u praŭładnych ŚMI Suzdalcaŭ zjaŭlaŭsia ŭ sieradu: jon kamientavaŭ «Iźviestijam» adstaŭku Alaksieja Daniłava z pasady sakratara Rady nacyjanalnaj biaśpieki i abarony Ukrainy.

• 4
• 0
• 14
• 1
• 2
• 2
• 4
• 0