Čamu zbornaja Japonii pa futbole pačynaje ŭsie matčy ŭ dziŭny čas? Hulnia z KNDR startavała ŭ 19:23

Zbornaja Japonii pačała adboračny matč na čempijanat śvietu 2026 z Paŭnočnaj Karejaj u vielmi dziŭny čas — u Tokia matč startavaŭ u 19:23. Tak, mienavita ŭ 23 chviliny. Heta nie zatrymka, nie pamyłka, nie što-niebudź jašče — i aficyjny sajt FIFA, i ŭsie pastaŭščyki statystyki dajuć mienavita taki čas, piša Championat.com.

Akazvajecca, čas pačatku matčaŭ napramuju zaležyć ad televizijščykaŭ. Telekanał, jaki tranśluje matč, sam pryznačaje čas pačatku hulni, kab sastykavać jaho z rekłamnymi słotami i puścić u prajm-tajm.

Bolšaść japonskich prahram (u pryvatnaści — dramy i anime) nie pačynajucca roŭna a niejkaj hadzinie ci, naprykład, a 19:30: adny filmy startujuć u 20:58, inšyja — u 21:07.

Kali pačałasia bitva kanałaŭ za rejtynhi, niekatoryja stali śpiecyjalna pačynać svaje šou na niekalki chvilin raniej za kankurentaŭ, kab telehladač, hartajučy kanały, natknuŭsia mienavita na ich prahramu. Ale z časam kancepcyja pra kankurencyju syšła, a na źmienu joj pryjšli rekłamadaŭcy.

Pavodle daśledavańnia Magnite, u 2023 hodzie 71% telehledačoŭ u Japonii hladziać patokavyja servisy z padtrymkaj rekłamy, spažyvajučy bolš za dźvie hadziny ŭ dzień televizijnaha kantentu na asnovie rekłamy. Źviestki padmacoŭvajucca ŭražalnymi sumami vydatkaŭ na rekłamu: u 2023 hodzie jany skłali 1,73 tryljona jien (8,5 młrd dalaraŭ).

Nacyjanalnaja asacyjacyja kamiercyjnych viaščalnikaŭ Japonii ŭstanaviła vyraznyja krytery dla rekłamy. Tak, na 10 chvilin televizijnaha siehmienta dazvolena dźvie chviliny rekłamnaha času, na 20 — 2,5 chviliny, na 30 — 3 i h.d. Taksama jość siehmienty prajm-tajma, kali rekłama varta asabliva doraha. Pieršy — heta ranica, kali ludzi ŭstajuć i rychtujucca da pracy ci vučoby.

Tady pakazvajuć naviny, dziciačyja prahramy i anime (u hetym vypadku zaŭsiody jość hadzińnik, kab ludzi nie zahledzielisia i svoječasova vyjšli z doma). Druhi — apoŭdni: heta čas chatnich haspadyń i tych, u kaho jość pierapynak na abied. Treci — pamiž 19:00 i 22:00 — nazyvajecca «załatym časam»: ludzi viartajucca z pracy abo vučoby i ŭklučajuć televizar, kab rassłabicca.

Rekłama ŭ hety čas asabliva važnaja, tamu ŭsie słoty raśpisanyja pa chvilinach.

Japoncy viadomyja svajoj punktualnaściu, i heta nie stereatyp. Kali ciahnik spaźniajecca na adnu chvilinu (!), to za abjavaj pra heta na stancyi abaviazkova buduć doŭhija prabačeńni za niazručnaść. Na telebačańni taksama ŭsio pavinna pracavać dakładna. Rasijski arbitr Nail Łutfulin niejak pajechaŭ u Japoniju pracavać na matčy alimpijskaj zbornaj i pačaŭ hulniu na chvilinu paźniej zajaŭlenaha času. Paśla hetaha japonski bok dasłaŭ u Azijackuju fiederacyju futbołu poŭny kryŭdaŭ list, što jany stracili rekłamadaŭcaŭ.

U Japonii ŭsio pavinna być dakładna, bo kolkaść rekłamy i ŭsie słoty padličanyja — zruch na adnu chvilinu aznačaje mienš rekłamnaha času na cełych 60 siekund. A jany kaštujuć hrošaj.

Tak što zbornaja Japonii pačynaje svaje matčy ŭ rozny (dziŭny) čas, bo tak im skazali na telebačańni. Startavać treba, naprykład, roŭna ŭ 23 chviliny, tak jak kanał pradaŭ peŭnuju kolkaść rekłamnaha času, i ŭsio padličana pad heta.

• 8
• 0
• 4
• 3
• 7
• 4
• 3
• 0